ରେଳ ଷ୍ଟେସନରେ ଯାତ୍ରୀଙ୍କୁ ଟିକେଟ ବିକିବେ କୁଇନ

ନିଜର ଆଗାମୀ ଫିଲ୍ମକୁ ନେଇ ବ୍ୟସ୍ତ କଙ୍ଗନା ରଣାୱତ । ଫିଲ୍ମ ପ୍ରମୋଶନ କରିବାରେ ଆପଣାଇଛନ୍ତି ନୂଆ ଉପାୟ । ମୁମ୍ବାଇର ଛତ୍ରପତି ଶିବାଜୀ ମହାରାଜ ଟର୍ମିନଲ(ବିଟି ଷ୍ଟେସନ)ରେ ଯାତ୍ରୀଙ୍କୁ ଟିକେଟ ଯୋଗାଇବେ କଙ୍ଗନା ।

ମୁମ୍ବାଇ: ଚର୍ଚ୍ଚିତ ଫିଲ୍ମ ‘ଜଜମେଣ୍ଟାଲ ହେ କ୍ୟା’ ଫ୍ଲପ ପରେ ବର୍ତ୍ତମାନ ବି-ଟାଉନର କୁଇନ କଙ୍ଗନା ରଣାୱତ ନିଜର ଆଗାମୀ ଫିଲ୍ମ ‘ପଙ୍ଗା’ ନେଇ ଦର୍ଶକଙ୍କ ସାମ୍ନାକୁ ଆସିବେ । ନୂଆବର୍ଷରେ ରିଲିଜ ହେବାକୁ ତାଙ୍କ ଫିଲ୍ମ ପ୍ରସ୍ତୁତ । ‘ପଙ୍ଗା’ର ନିର୍ଦ୍ଦେଶନା ଦାୟିତ୍ବ ତୁଲାଇଛନ୍ତି ଅଶ୍ବିନୀ ତିୱାରୀ । ଯିଏ ପୂର୍ବରୁ ‘ନିଲ ବଟେ ସନ୍ନାଟା’ ଓ ‘ବରେଲୀ କି ବର୍ଫି’ ଭଳି ଫିଲ୍ମ ନିର୍ମାଣ କରିଥିଲେ ।

‘ପଙ୍ଗା’ରେ କଙ୍ଗନା ଜଣେ ରାଷ୍ଟ୍ରୀୟ କବାଡି ଖେଳାଳି ଭୂମିକାରେ ନଜର ଆସିବେ । ଯିଏ ଫିଲ୍ମରେ ଟିକେଟ କାଟୁଥିବା ରେଳବାଇ କର୍ମଚାରୀ ମଧ୍ୟ ସାଜିଛନ୍ତି । ଫିଲ୍ମ ପ୍ରମୋଶନରେ ବର୍ତ୍ତମାନ ଖୁବ୍ ବ୍ୟସ୍ତ କଙ୍ଗନା । ସେ ନିଜ ଭୂମିକା ଅନୁଯାୟୀ ମୁମ୍ବାଇର ଛତ୍ରପତି ଶିବାଜୀ ମହାରାଜ ଟର୍ମିନଲ(ବିଟି ଷ୍ଟେସନ)ରେ ନିଜ ରିଲ ଅବତାରକୁ ରିୟଲ ଲାଇଫରେ ଦେଖାଇବାକୁ ଯାଉଛନ୍ତି । ସେ ଯାତ୍ରା କରୁଥିବା ଯାତ୍ରୀଙ୍କୁ ଟିକେଟ ଝରକାରେ ଟିକେଟ ଦେଉଥିବାର ନଜର ଆସିବେ ।

ଫିଲ୍ମର ପ୍ରମୋଶନ ପାଇଁ ମେକର୍ସ ଏପରି ଭିନ୍ନ ଉପାୟ ଆପଣାଇଛନ୍ତି । ଏହାସହ ସୋମବାର ସନ୍ଧ୍ୟାରେ ଫିଲ୍ମର ଅନ୍ୟ ଷ୍ଟାରକାଷ୍ଟଙ୍କ ସହ କଙ୍ଗନା ଫିଲ୍ମର ଦମଦାର ଟ୍ରେଲର ଲଞ୍ଚ କରିବେ । ଫିଲ୍ମରେ କଙ୍ଗନାଙ୍କ ସହ ରିଚା ଚଡ୍ଡା, ନୀନା ଗୁପ୍ତା, ରାଜେଶ ତେଲଙ୍ଗ ଓ ଜଶି ଗିଲ ମଧ୍ୟ ମୁଖ୍ୟ ଭୂମିକାରେ ନଜର ଆସିବେ । ଆସନ୍ତା ବର୍ଷ ଜାନୁଆରୀ 24ରେ ରିଲିଜ ହେବ ଏହି ଫିଲ୍ମ ।