ମୁମ୍ବାଇ: ଅଭିନେତ୍ରୀ କଙ୍ଗନା ରଣାୱତ କାହାକୁ ଟାର୍ଗେଟ କରିବା ପାଇଁ କୌଣସି ସୁଯୋଗ ହାତଛଡା କରନ୍ତି ନାହିଁ । ନେତାଙ୍କ ଠାରୁ ଆରମ୍ଭ କରି ବଲିଉଡ ସେଲିବ୍ରିଟିଙ୍କ ପର୍ଯ୍ୟନ୍ତ ସେ ସମସ୍ତଙ୍କ ସମାଲୋଚନା କରୁଥିବାର ନଜର ଆସନ୍ତି । ଗତ ବର୍ଷ ତାଙ୍କର ବାକ୍ ଯୁଦ୍ଧ ଅଭିନେତ୍ରୀ ତଥା ନିକଟରେ ଶିବସେନାରେ ସାମିଲ ହୋଇଥିବା ଉର୍ମିଲା ମାତୋଣ୍ଡକରଙ୍କ ସହ ହୋଇଥିଲା । ଯାହା ଚର୍ଚ୍ଚାର ବିଷୟ ପାଲଟିଥିଲା । ଏବେ ପୁଣିଥରେ ସେ ଉର୍ମିଲାଙ୍କୁ ଟାର୍ଗେଟ କରିଛନ୍ତି ।
ତେବେ କଥାଟି ହେଲା ଯେ ନିକଟରେ କଂଗ୍ରେସ ଛାଡି ଶିବସେନାରେ ସାମିଲ ହୋଇଥିବା ଉର୍ମିଲା ନିଜ ପାଇଁ ଏକ ନୂଆ ଅଫିସ କିଣିଛନ୍ତି । ସେ 3 କୋଟି ଟଙ୍କାର ଅଫିସ ପାଇଁ ରୁମ କିଣି ଚର୍ଚ୍ଚାରେ । ଯାହାକୁ ଆଧାର କରି ତାଙ୍କୁ କଡା କଥା ଶୁଣାଇଛନ୍ତି କଙ୍ଗନା ।
ଏହି କଥାରେ ମଜାକ ଉଡାଇ କଙ୍ଗନା କହିଛନ୍ତି ଯେ ସେ ବିଜେପି ସାଥ ଦେବାରେ ତାଙ୍କୁ କୌଣସି ଫାଇଦା ମିଳିଲା ନାହିଁ ହେଲେ ଉର୍ମିଲାଙ୍କୁ କଂଗ୍ରେସର ସହଯୋଗ ମିଳିପାରିଛି । ଏହା ବିଷୟରେ ସେ ଆଲୋଚନା କରି ଟ୍ବିଟରେ ଲେଖିଛନ୍ତି, ‘ଉର୍ମିଲା ମୁଁ ନିଜ ପରିଶ୍ରମରେ ଘର ତିଆରି କରିଥିଲି । କଂଗ୍ରେସ ଯାହାକୁ ଭାଙ୍ଗିବାରେ ଲାଗିଛି । ବିଜେପିକୁ ଖୁସି କରି ମୋ ହାତରେ କେବଳ 25-30ରୁ କେସ ଲାଗିଛି । କାସ୍ ମୁଁ ବି ତୁମ ଭଳି ବୁଦ୍ଧିଆ ଝିଅ ହୋଇଥାଆନ୍ତି ଆଉ କଂଗ୍ରେସକୁ ଖୁସି କରିପାରିଥାଆନ୍ତି । ମୁଁ ତ ସତରେ ମୁର୍ଖ ବାହାରିଲି ।’
ସେପଟେ କଙ୍ଗନାଙ୍କ ଏପରି ବୟାନବାଜି ଉପରେ ଏଯାବତ ଉର୍ମିଲା କୌଣସି ପ୍ରତିକ୍ରିୟା ଦେଇନାହାଁନ୍ତି । ତେବେ ନିକଟରେ ଉର୍ମିଲାଙ୍କୁ ସଫ୍ଟ ପର୍ଣ୍ଣ ଷ୍ଟାର କରି ସମାଲୋଚନା କରିଥିଲେ କଙ୍ଗନା । ଅନ୍ୟପଟେ ଉର୍ମିଲା ମଧ୍ୟ କଡା କଥା ଶୁଣାଇଥିଲେ । ଯାହା ପରଠୁ ଆରମ୍ଭ ହୋଇଥିଲା ଏହି ଦୁଇ ଅଭିନେତ୍ରୀଙ୍କ ବାକ୍ ଯୁଦ୍ଧ ।
