ମୁମ୍ବାଇ: ବିଶିଷ୍ଟ ଅଭିନେତ୍ରୀ ଶ୍ରୀଦେବୀଙ୍କ ତନୟା ଖୁସି କପୁର 19 ବର୍ଷରେ ପଦାର୍ପଣ କରିଛନ୍ତି । ଏହି ଅବସରରେ ତାଙ୍କୁ ଜନ୍ମଦିନର ଶୁଭେଚ୍ଛା ସୋସିଆଲ ମିଡିଆରେ ଖାସ୍ ଅନ୍ଦାଜରେ ଜଣାଇଛନ୍ତି ବଡ ଭଉଣୀ ତଥା ‘ଧଡକ’ ଫେମ ଜାହ୍ନବୀ କପୁର । ପାଖାପାଖି 10ଟି ଫଟୋ ଏବଂ କିଛି ଭିଡିଓ ସେୟାର କରି ବର୍ଥଡେ ୱିଶ କରିଛନ୍ତି ଜାହ୍ନବୀ ।
ଏହାକୁ ସେୟାର କରି ସେ କ୍ୟାପସନରେ ଲେଖିଛନ୍ତି, ‘ତୁମେ ମୋ ଲାଇଫଲାଇନ, ହାପି ବର୍ଥଡେ, ମୁଁ ତୁମକୁ ବହୁତ ମିସ୍ କରୁଛି ।’ ଆଉ ଜାହ୍ନବୀ ସେୟାର କରିଥିବା ଭିଡିଓରେ ସେ ଖୁସିଙ୍କ ସହ ‘ହାପି ବର୍ଥ ଟୁ ୟୁ’ ଗୀତ ଗାଉଥିବାର ନଜର ଆସୁଛନ୍ତି । ଭିଡିଓରେ ଏବଂ ଫଟୋରେ ଦୁଇ ଭଉଣୀଙ୍କ ସ୍ନେହ ଓ ପ୍ରେମ ଦେଖି ଲାଗୁଛି ଯେ ଦୁଇଜଣ ପରସ୍ପରର ବନ୍ଧୁ ପରି ।
ପ୍ରକାଶ ଥାଉକି ବର୍ତ୍ତମାନ ଖୁସି ନ୍ୟୁୟର୍କରେ ଫିଲ୍ମ ଏକାଡେମୀରେ ଆକ୍ଟିଂର ଟ୍ରେନିଂ ନେଉଛନ୍ତି । ଏହି ଟ୍ରେନିଂ ପାଇଁ ସେ ସେପ୍ଟେମ୍ବରରେ ଭାରତ ଛାଡିଥିଲେ । ନିକଟରେ ଖୁସିଙ୍କୁ ଜାହ୍ନବୀ ଓ ପିତା ବୋନି କପୁର ସାକ୍ଷାତ କରିବା ପାଇଁ ଯାଇଥିଲେ । ଟ୍ରେନିଂ ଶେଷ କରିସାରିବା ପରେ ଖୁସି ବଲିଉଡରେ ଏଣ୍ଟ୍ରି କରିବେ ବୋଲି ଚର୍ଚ୍ଚା ଜୋର ଧରିଛି । ଫିଲ୍ମ ବ୍ୟତୀତ ଖୁସି ମଡେଲିଂରେ ମଧ୍ୟ କ୍ୟାରିୟର ଗଢିବାକୁ ଚାହୁଁଛନ୍ତି ।
ଯଦି ଜାହ୍ନବୀଙ୍କ କଥା ହେବା ତେବେ ‘ଧଡକ’ ଫିଲ୍ମରୁ ବଲିଉଡରେ ଡେବ୍ୟୁ କରିଥିଲେ । ଆଉ ନିଜ ଦମଦାର ଅଭିନୟରେ ଦର୍ଶକଙ୍କ ମନ କିଣିବାରେ ମଧ୍ୟ ସଫଳ ହୋଇଥିଲେ । ନିକଟରେ ସେ ‘ଗୁଞ୍ଜନ ସକ୍ସେନା: ଦ କାରଗିଲ ଗାର୍ଲ’ର ସୁଟିଂ ଶେଷ କରିଥିଲେ । ଏହାବ୍ୟତୀତ ସେ ରାଜକୁମାରଙ୍କ ଆଗାମୀ ହରର କମେଡି ଫିଲ୍ମ ‘ରୁହି ଅଫଜା’, ‘ଦୋସ୍ତାନା 2’ ଏବଂ କରନ ଜୋହରଙ୍କ ମଲ୍ଟି ଷ୍ଟାରର ଫିଲ୍ମ ‘ତଖ୍ତ’ରେ ମଧ୍ୟ ନଜର ଆସିବେ ।
