ମୁମ୍ବାଇ:ନିର୍ଦ୍ଦେଶକ ଏସ.ଏସ ରାଜମୌଲୀଙ୍କ ବହୁ ପ୍ରତିକ୍ଷିତ ଆକ୍ସନ ଡ୍ରାମା ଫିଲ୍ମ 'RRR'ର ଲିଡ଼ ଆକ୍ଟରଙ୍କ ଦେଖିବାକୁ ମିଳିଛି ଝଲକ । ଏହି ଫିଲ୍ମର ରିଲିଜ ତାରିଖକୁ ଦର୍ଶକ ଚାତକ ପରି ଚାହିଁ ରହିଥିବା ବେଳେ ମୁଖ୍ୟ କଳାକାରଙ୍କ ଫଟୋକୁ ସୋସିଆଲ ମିଡ଼ିଆରେ ସେୟାର କରି ଦର୍ଶକଙ୍କୁ ଆହୁରି ଉତ୍ସାହିତ କରିଛନ୍ତି ମେକର୍ସ । ଫିଲ୍ମଟି ଆସନ୍ତା ୨୦୨୨ ଜାନୁଆରୀ ୭ ତାରିଖରେ ରିଲିଜ ହେବାକୁ ଯାଉଛି । ଏକ ଭିଡ଼ିଓ ମାଧ୍ୟମରେ ଫିଲ୍ମର ଝଲକକୁ ନିଜ ସୋସିଆଲ ମିଡ଼ିଆ ହ୍ୟାଣ୍ଡେଲ ସେୟାର କରିଛନ୍ତି ଆଲିଆଙ୍କ ସମେତ ଫିଲ୍ମର ଅନ୍ୟ କଳାକାର ।
ଏହି ଫିଲ୍ମରେ ମୁଖ୍ୟ ଭୂମିକାରେ ଅଭିନୟ କରିଛନ୍ତି ସାଉଥ ସୁପରଷ୍ଟାର ରାମ ଚରଣ ଓ ଜୁନିଅର NTR ଏବଂ ବଲିଉଡ଼ର ସିଘଂମ ଅଜୟ ଦେବଗନ ଓ ଡିମ୍ପଲ ଗର୍ଲ ଆଲିଆ ଭଟ୍ଟ । ସୋମବାର ମେକର୍ସ ଏହି ବହୁ ପ୍ରତିକ୍ଷିତ ଫିଲ୍ମର ଛୋଟିଆ ଝଲକ ଦର୍ଶକଙ୍କୁ ଭେଟି ଦେଇଛନ୍ତି । ଏହି ଫିଲ୍ମଟି ପରାଧୀନ ଭାରତର କାହାଣୀ ଉପରେ ହୋଇଛି ଆଧାରିତ । ଏଥିରେ ସ୍ବାଧୀନତା ସଂଗ୍ରାମୀ କୋମରାମ ଭୀମ ଓ ଆଲୁରି ସିତାରାମ ରାଜୁଙ୍କ ଭୂମିକାରେ ଜୁନିଅର ଏନଟିଆର ଓ ରାମ ଚରଣ ନଜର ଆସିବେ ।