ମୁମ୍ବାଇ: ବଲଉଡର ସୁପରଷ୍ଟାର ହ୍ରିତିକ ରୋଶନ ତାମିଲ ସୁପରଷ୍ଟାର ୟଶଙ୍କ ଆଗାମୀ ଫିଲ୍ମ ‘କେଜିଏଫ ଚାପ୍ଟର 2’ର ଟିଜିର ଦେଖି ଦିୱାନା ହୋଇଯାଇଛନ୍ତି । ଆଉ ଆଜି ୟଶଙ୍କ 35ତମ ଜନ୍ମଦିନ ଅବସରରେ ସୋସିଆଲ ମିଡିଆରେ ତାଙ୍କ ପ୍ରଶଂସା କରିବାରେ ଲାଗିଛନ୍ତି । ଯାହାକୁ ନେଇ ବର୍ତ୍ତମାନ ଚର୍ଚ୍ଚା ।
ସେ ଟ୍ବିଟରରେ ‘କେଜିଏଫ 2’ର ଟିଜର ଭିଡିଓ ପୋଷ୍ଟ କରି ଲେଖିଛନ୍ତି, ‘ଗ୍ରେଟ୍ ଟ୍ରେଲର । କେଜିଏଫ 2ର ପୁରା ଟିମକୁ ଶୁଭେଚ୍ଛା ଏବଂ ୟଶ ତୁମକୁ ଜନ୍ମଦିନରେ ଅନେକ ଅନେକ ଶୁଭେଚ୍ଛା ଓ ଶୁଭକାମନା ।’
ହେଲେ ଏହି ପୋଷ୍ଟରେ ଟିଜର ପରିବର୍ତ୍ତେ ହ୍ରିତିକ ଟ୍ରେଲର ଲେଖି ଦେଇଛନ୍ତି । ସେ ଯାହା ବି ହେଉ ଫ୍ୟାନ୍ସଙ୍କୁ କିନ୍ତୁ ପସନ୍ଦ ଆସିଛି ହ୍ରିତିକଙ୍କ ଏହି ଅନ୍ଦାଜ । ଜଣେ ସୁପରଷ୍ଟାର ଆଉ ଜଣେ ସୁପରଷ୍ଟାରଙ୍କ କରୁଥିବା ପ୍ରଶଂସାକୁ ନେଇ ସମସ୍ତେ ଖୁସି ।
ପ୍ରକାଶ ଥାଉକି ୟଶଙ୍କ ଜନ୍ମଦିନରେ ଦର୍ଶକଙ୍କୁ ସରପ୍ରାଇଜ ଦେବାକୁ ଯାଇ ଗୁରୁବାର ଟିଜର ରିଲିଜ କରିଦେଇଥିଲେ ମେକର୍ସ । ଆଉ ରିଲିଜ ହେବାର କିଛି ଘଣ୍ଟା ମଧ୍ୟରେ 15 ମିଲିୟନ ଭ୍ୟୁ ମିଳିଛି ଟିଜରକୁ । ଯାହାକୁ ନେଇ ମେକର୍ସ ଖୁସି । ଏବର୍ଷ ଫିଲ୍ମ ରିଲିଜ କରିବାକୁ ଯୋଜନା କରାଯାଇଛି ।