ମୁମ୍ବାଇ: ରଣବୀର ସିଂହ, ଆଲିୟା ଭଟ୍ଟ ଷ୍ଟାରର ଫିଲ୍ମ 'ଗଲି ବୟ' ଏବେ ବକ୍ସଅଫିସରେ ଧମାଲ କରିଚାଲିଛି । ଫିଲ୍ମଟି ଭାଲେଣ୍ଟାଇନ ଡେ' ଅବସରରେ ରିଲିଜ ହୋଇଥିବାବେଳେ ଉଭୟଙ୍କ ଯୋଡି ସହ ଫିଲ୍ମର କାହାଣୀକୁ ବେଶ ପସନ୍ଦ କରିଛନ୍ତି ଦର୍ଶକ । ହେଲେ ରିଲିଜର ପ୍ରଥମ ସପ୍ତାହ ପରେ ହିଁ ଫିଲ୍ମଟି ପହଁଚିଛି 100କୋଟି କ୍ଲବରେ ।
ଭାରତୀୟ ଫିଲ୍ମ କ୍ରିଟିକ ତଥା ଟ୍ରେଡ ଆନାଲିଷ୍ଟ ତରଣ ଆଦର୍ଶ ଆଜି ସୋସିଆଲ ମିଡିଆରେ ଫିଲ୍ମର ବକ୍ସଅଫିସ କଲେକ୍ସନକୁ ନେଇ ତଥ୍ୟ ପ୍ରକାଶ କରି ଫିଲ୍ମଟି ରିଲିଜର ତୃତୀୟ ଦିନରେ 50କୋଟି, ପଞ୍ଚମ ଦିନରେ 75କୋଟି ଓ ଅଷ୍ଟମ ଦିନରେ 100କୋଟି ପାର କରିଛି ବୋଲି କହିଛନ୍ତି ତରଣ ।
ତେବେ ଫିଲ୍ମଟି ମୁଖ୍ୟତଃ ମେଟ୍ରୋ ସିଟିରେ ବେଶ ପସନ୍ଦ କରାଯାଉଛି । ଖାସକରି ମୁମ୍ବାଇରେ ଏହା କ୍ରିଟିକଙ୍କ ସହ ଦର୍ଶକଙ୍କୁ ବେଶ ପସନ୍ଦ ହେଉଛି । ତେବେ ଏହା ବର୍ଲିନ ଫିଲ୍ମ ଫେଷ୍ଟିଭାଲରେ ବି ଦେଖାଯାଇଥିଲା । ଅନେକ ଆନ୍ତର୍ଜାତୀୟ ଷ୍ଟାର ମଧ୍ୟ ଏହାକୁ ପସନ୍ଦ କରିଥିଲେ । ଏମିତିକି ହଲିଉଡ ଅଭିନେତା ୱିଲ ସ୍ମିଥ ମଧ୍ୟ ରଣବୀରଙ୍କର ଫ୍ୟାନ ହୋଇ ଗୋଟିଏ ଭିଡିଓ ମାଧ୍ୟମରେ ତାଙ୍କ ରାପିଙ୍ଗର ପ୍ରଶଂସା କରିଥିଲେ ।
ମୁମ୍ବାଇର ଦୁଇ ଷ୍ଟ୍ରିଟ ରାପର ନାଭେଦ ଓ ଭିଭିଆନଙ୍କ ଜୀବନ କାହାଣୀକୁ ନେଇ ପ୍ରସ୍ତୁତ ହୋଇଛି ଫିଲ୍ମ 'ଗଲି ବୟ' । ଫିଲ୍ମଟି ଜୋୟା ଅଖତରଙ୍କ ଦ୍ବାରା ନିର୍ଦ୍ଦେଶିତ ଓ ଏହା ଭାଲେଣ୍ଟାଇନ ଡେ ଅବସରରେ ଗତ 14ତାରିଖରେ ରିଲିଜ ହୋଇଯାଇଛି ।