ମୁମ୍ବାଇ:ଅଡୁଆରେ ଫ୍ୟାଶନ ଡିଜାଇନର ସବ୍ୟସାଚୀ ମୁଖାର୍ଜୀ । ଅର୍ଦ୍ଧନଗ୍ନ ମଡେଲଙ୍କ ସହ ମଙ୍ଗଳସୂତ୍ର ବିଜ୍ଞାପନ ସୁଟିଂ କରି ସେ ବିବାଦରେ ଛନ୍ଦି ହୋଇପଡ଼ିଛନ୍ତି । ୨୪ ଘଣ୍ଟା ମଧ୍ୟରେ ଏହି ବିଜ୍ଞାପନକୁ ହଟାଇବା ପାଇଁ ମଧ୍ୟପ୍ରଦେଶ ଗୃହମନ୍ତ୍ରୀ ନରୋତ୍ତମ ମିଶ୍ରା ଚେତାବନୀ ଦେଇଛନ୍ତି । ନିର୍ଦ୍ଦିଷ୍ଟ ସମୟ ମଧ୍ୟରେ ଏହାକୁ ହଟାନଗଲେ ସବ୍ୟସାଚୀଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ ଟ୍ବିଟ କରି କହିଛନ୍ତି ।
ମିଶ୍ରା ଟ୍ବିଟ କରି ଲେଖଛନ୍ତି ଯେ, "ଫ୍ୟାଶନ ଡିଜାଇନର ସବ୍ୟସାଚୀ ମୁଖାର୍ଜୀଙ୍କ ମଙ୍ଗଳସୂତ୍ର ବିଜ୍ଞାପନ ବହୁତ ଆପତ୍ତିଜନକ ତଥା ମନରେ ଆଘାତ ଦେଇଛି । ଯଦି ଏହି ବିଜ୍ଞାପନକୁ ଆଗାମୀ ୨୪ ଘଣ୍ଟା ମଧ୍ୟରେ ହଟାନଯାଏ, ତେବେ ସବ୍ୟସାଚୀଙ୍କ ବିରୋଧରେ ସେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିବେ" ବୋଲି ଚେତାବନୀ ଦେଇଛନ୍ତି । ଏହି ମଙ୍ଗଳସୂତ୍ରର ବିଜ୍ଞାପନରେ ମଡେଲଙ୍କୁ ଅର୍ଦ୍ଧନଗ୍ନ ଅବସ୍ଥାରେ ଦେଖିବାକୁ ମିଳିଛି । ମଡେଲମାନେ ମଙ୍ଗଳସୂତ୍ର ପିନ୍ଧି କିଛି ଅନ୍ତରଙ୍ଗ ପୋଜ ଦେଇଛନ୍ତି । ଯାହାକୁ ବିରୋଧ କରିଛନ୍ତି ମିଶ୍ରା ।