ଆସିଲା ‘ତୁଫାନ’ର ଫାଷ୍ଟଲୁକ ପୋଷ୍ଟର, ବକ୍ସର ଅବତାରରେ ଫରହାନ

ଖୁବଶୀଘ୍ର ଏକ ଶାନଦାର କାହାଣୀ ନେଇ ପରଦାରେ ନଜର ଆସିବେ ଫରହାନ ଅଖତର । ତାଙ୍କ ଆଗାମୀ ଫିଲ୍ମ ‘ତୁଫାନ’ର ଫାଷ୍ଟଲୁକ ପୋଷ୍ଟର ଜାରି ହୋଇଯାଇଛି । ଯାହାକୁ ସୋସିଆଲ ମିଡିଆରେ ସେୟାର କଲେ ଫରହାନ ।

ମୁମ୍ବାଇ: ଗତ ବର୍ଷ ରିଲିଜ ହୋଇଥିଲା ଅଭିନେତା, ନିର୍ଦ୍ଦେଶକ ଓ ଗାୟକ ଫରହାନ ଅଖତରଙ୍କ ଚର୍ଚ୍ଚିତ ଫିଲ୍ମ ‘ଦ ସ୍କାଏ ଇଜ ପିଙ୍କ’ । ଫିଲ୍ମରେ ତାଙ୍କ ସହ ରୋମାନ୍ସ କରୁଥିବାର ନଜର ଆସିଥିଲେ ଦେଶୀ ଗାର୍ଲ ପ୍ରିୟଙ୍କା ଚୋପ୍ରା । ଏହି ଫିଲ୍ମକୁ ଦର୍ଶକ ଓ କ୍ରିଟିକ୍ସଙ୍କ ମିଶ୍ରିତ ପ୍ରତିକ୍ରିୟା ମିଳିଥିଲା । ଆଉ ଇତିମଧ୍ୟରେ ଫରହାନ ପ୍ରସ୍ତୁତ ହୋଇସାରିଲେଣି ପରଦାକୁ ଏକ ଦମଦାର କାହାଣୀ ସହ ଫେରିବାକୁ । ଦୀର୍ଘ ସମୟରୁ ସେ ନିଜ ଆଗାମୀ ଫିଲ୍ମ ତୁଫାନକୁ ନେଇ ବ୍ୟସ୍ତ ନଜର ଆସୁଛନ୍ତି । ଫ୍ୟାନ୍ସଙ୍କୁ ନୂଆ ବର୍ଷ ଉପହାର ଦେବାକୁ ଯାଇ ସେ ‘ତୁଫାନ’ର ଫାଷ୍ଟ ଲୁକ ପୋଷ୍ଟର ଜାରି କରିଛନ୍ତି ।

ଗୁରୁବାର ସେ ‘ତୁଫାନ’ର ଫାଷ୍ଟଲୁକ ପୋଷ୍ଟର ସୋସିଆଲ ମିଡିଆରେ ସେୟାର କରି ଫିଲ୍ମର ରିଲିଜ ତାରିଖ ମଧ୍ୟ ଘୋଷଣା କରିଛନ୍ତି । ଫିଲ୍ମକୁ ଚଳିତ ବର୍ଷ ଗାନ୍ଧୀ ଜୟନ୍ତି ତଥା ଅକ୍ଟୋବର 2ରେ ରିଲିଜ କରିବାକୁ ଯୋଜନା କରିଛନ୍ତି ମେକର୍ସ ।

ଫରହାନ ଇନଷ୍ଟାଗ୍ରାମରେ ‘ତୁଫାନ’ର ଫାଷ୍ଟଲୁକ ପୋଷ୍ଟର ସେୟାର କରିଛନ୍ତି । ଯେଉଁଥିରେ ସେ ବ୍ଲୁ କଲରର ବକ୍ସିଂ ଆଉଟଫିଟ୍ ପିନ୍ଧିଥିବାର ନଜର ଆସୁଛନ୍ତି । ‘ଯଦି ଜୀବନ ଜଟିଳଦାୟ ହେଉଛି, ତେବେ ତୁମେ ସାହାସୀ ହୋଇଯାଅ । ଚଳିତ ବର୍ଷ ଆସିବ ତୁଫାନ । ନୂଆ ବର୍ଷରେ ଆପଣଙ୍କ ସହ ଏହାକୁ ସେୟାର କରି ବହୁତ ଖୁସି ଅନୁଭବ ହେଉଛି । ଆଶା କରୁଛି ଆପଣ ଏହାକୁ ପସନ୍ଦ କରିବେ’ ବୋଲି କ୍ୟାପସନରେ ଲେଖିଛନ୍ତି ଫରହାନ ।

ପ୍ରକାଶ ଥାଉକି ସ୍ପୋର୍ଟ୍ସ ଡ୍ରାମା ଫିଲ୍ମ ‘ତୁଫାନ’ ଏକ ବକ୍ସର କାହାଣୀକୁ ନେଇ ଆଧାରିତ । ଯାହାର ପ୍ରଯୋଜନା କରିଛନ୍ତି ରିତେଶ ସିଦ୍ଧିୱାନି, ଫରହାନ ଓ ରାକେଶ ଓମପ୍ରକାଶ ମେହରା । ସେହିପରି ଫିଲ୍ମର ନିର୍ଦ୍ଦେଶନା ଦାୟିତ୍ବ ମଧ୍ୟ ତୁଲାଇଛନ୍ତି ରାକେଶ ।