ମୁମ୍ବାଇ:କ୍ରୁଜ ସିପ୍ ଡ୍ରଗ୍ସ ମାମଲା । ଆସିଲା କର୍ଡେଲିୟା କ୍ରୁଜ ସିପ୍ର ସଭାପତି ତଥା ସିଇଓ ଜର୍ଗନ ବେଲମଙ୍କ ପ୍ରତିକ୍ରିୟା । ସିପ୍ରେ ଥିବା କିଛି ଯାତ୍ରୀଙ୍କ ଲଗେଜରୁ NCB ଏହି ଡ୍ରଗ୍ସ ଜବତ କରାଯାଇଥିଲା ବୋଲି ସେ କହିଛନ୍ତି । ଏହାପରେ ସଙ୍ଗେ ସଙ୍ଗେ ଏହି ନିଶାଦ୍ରବ୍ୟକୁ ସିପ୍ ଭିତରୁ ଅନଲୋଡ କରାଯାଇଥିଲା ।
ଏହି ଡ୍ରଗ୍ସ ବାହାରିବା କାରଣରୁ ସିପ୍ଟି ବିଳମ୍ବରେ ଯାତ୍ରା କରିଥିଲା । ଏଥିଲାଗି ସେଥିରେ ଥିବା ଯାତ୍ରୀଙ୍କୁ କ୍ଷମା ପ୍ରାର୍ଥନା କରିଛନ୍ତି ଜର୍ଗନ । ଯାତ୍ରୀମାନେ ସଠିକ ସମୟରେ ଷ୍ଟେଜ ଶୋ', ସ୍ବାଦିଷ୍ଟ ଭୋଜନ, ଗର୍ବା ଡ୍ୟାନ୍ସ ଆଦିକୁ ଉପଭୋଗ କରିବାରେ ବିଳମ୍ବ ଘଟିଥିଲା ବୋଲି ସେ କହିଛନ୍ତି । ଏନସିବି ବିଶେଷ ସୂତ୍ରରୁ ଖବର ପାଇବା ପରେ ମୁମ୍ବାଇରୁ ଗୋଆ ଯାଉଥିବା ଏହି ଲକ୍ସରୀ ସିପ୍ ଉପରେ ଯାତ୍ରୀ ଭାବେ ଛଦ୍ମବେଶରେ ସିପ ଉପରେ ଚଢାଉ କରିଥିଲା । ଏହାପରେ ଘଟଣାରେ ୮ ଜଣଙ୍କୁ ଗିରଫ କରାଯାଇଥିବା ବେଳେ ଏଥିରେ ୨ ଜଣ ମହିଳା ଓ ବଲିଉଡ଼ ସୁପରଷ୍ଟାର ଶାହରୁଖ ଖାନଙ୍କ ପୁଅ ଆରୟାନ ଖାନ ମଧ୍ୟ ରହିଛନ୍ତି ।
୩ ଦିନ ଧରି ଚାଲିଥାନ୍ତା ପାର୍ଟି:-
ଏହି ସିପ୍ଟି ଶନିବାର ଅପରାହ୍ନରେ ଗୋଆ ଅଭିମୁଖେ ବାହାରିଥିଲା । ଏଥିରେ ଲଗାତାର ୩ଦିନ ଧରି ପାର୍ଟି ହେବାର ଯୋଜନା ରହିଥିଲା । ଆସନ୍ତାକାଲି ଅର୍ଥାତ ଅକ୍ଟୋବର ୪ ତାରିଖରେ ପୁଣି ମୁମ୍ବାଇ ଫେରିଥାନ୍ତା ସିପ୍ । ଏହି ସିପ୍ରେ ୬୦୦ ହାଇପ୍ରୋଫାଇଲ ଲୋକ ରହିଥିବା ବେଳେ ପ୍ରାୟ ୨୦୦୦ ଯାତ୍ରୀ ରହିଥିଲେ ।