ମୁମ୍ବାଇ: ବିବାହ ପରେ ଦୀପିକା ପାଦୁକୋନ ପୁଣି ପରଦାରେ ନଜର ଆସିବେ । ସେ ଲୋକପ୍ରିୟ ନିର୍ଦ୍ଦେଶିକା ମେଘନା ଗୁଲଜାରଙ୍କ ଆଗାମୀ ଫିଲ୍ମ ‘ଛପାକ’ରେ ଦେଖାଯିବେ । ଅଭିନୟ ସହ ଏହି ଫିଲ୍ମର ପ୍ରଯୋଜନା ଦାୟିତ୍ବ ମଧ୍ୟ ତୁଲାଇଛନ୍ତି ଦୀପିକା । ଆଉ ଏବେ ସେ ଏମିତି ଏକ ପ୍ରୋଜେକ୍ଟ ହାତରେ ନେଇଛନ୍ତି । ଯାହା କୌଣସି ମଧ୍ୟ ଫିଲ୍ମମେକର୍ସଙ୍କ ପାଇଁ ସହଜ କଥା ନୁହେଁ ।
ଦୀପିକା ମହାଭାରତ କାହାଣୀକୁ ନେଇ ନିର୍ମାଣ କରିବେ ଫିଲ୍ମ। ଆଉ ମୁଖ୍ୟ କଥା ହେଲା କି ମହାଭାରତ ଫିଲ୍ମରେ ସେ ଦ୍ରୌପଦୀ ଭୂମିକାରେ ଅଭିନୟ ମଧ୍ୟ କରିବେ । ଫିଲ୍ମଟି ଦ୍ରୌପଦୀଙ୍କ କାହାଣୀକୁ ନେଇ ନିର୍ମାଣ ହେବ । ଅନ୍ୟପଟେ ଦୀପିକାଙ୍କ ସହ ମିଶି ମଧୁ ମଣ୍ଟେନା ମଧ୍ୟ ଏହି ଫିଲ୍ମର ସହ-ପ୍ରଯୋଜକ ହେବ ।
ଫିଲ୍ମର ଅନ୍ୟ ଷ୍ଟାରକାଷ୍ଟର ଚୟନ ଏଯାବତ ହୋଇନାହିଁ । ପ୍ରକାଶ ଥାଉକି ମହାଭାରତ ଫିଲ୍ମଟି ଦୁଇଟି କମ୍ବା ତିନୋଟି ଭାଗରେ ନିର୍ମାଣ କରାଯିବ । ସେହିପରି ଏହାର ପ୍ରଥମ ଭାଗ 2021ରେ ରିଲିଜ ହେବ । ଏହି ଫିଲ୍ମର ନିର୍ଦ୍ଦେଶନା ଦାୟିତ୍ବ ତୁଲାଇବା ପାଇଁ କୌଣସି ନିର୍ଦ୍ଦେଶକଙ୍କ ନାମ ସାମ୍ନାକୁ ଆସିନାହିଁ ।
ଦୀର୍ଘ ସମୟରୁ ମହାଭାରତ ଫିଲ୍ମ ଖୁବ୍ ଚର୍ଚ୍ଚାରେ ରହିଆସୁଛି । ଏହାକୁ ନେଇ ଅନେକ ଖବର ମଧ୍ୟ ଶୁଣିବାକୁ ମିଳିଛି । କିଛି ମାସ ପୂର୍ବରୁ ଖବର ଜୋର ଧରିଥିଲା ଯେ ମହାଭାରତରେ ମିଷ୍ଟର ପରଫକ୍ସେନିଷ୍ଟ ଆମୀର ଖାନ ଭଗବାନ କ୍ରିଷ୍ଣାଙ୍କ ଅବତାରରେ ଅଭିନୟ କରିବେ । ଫିଲ୍ମରେ କୋଟି କୋଟି ଟଙ୍କା ଖର୍ଚ୍ଚ ହେବା ବୋଲି ମଧ୍ୟ ଶୁଣିବାକୁ ମିଳିଥିଲା ।
ପ୍ରକାଶ ଥାଉକି ସାଉଥର ସୁପରଷ୍ଟାର ମୋହନଲାଲ ମଧ୍ୟ କିଛି ମାସ ପୂର୍ବରୁ ମହାଭାରତ ନିର୍ମାଣ କରିବା ଘୋଷଣା କରିଥିଲେ । ଯାହାର ବଜେଟ 1000 କୋଟି ଟଙ୍କା କୁହାଯାଉଥିଲା । ଫିଲ୍ମରେ ଭୀମଙ୍କ କାହାଣୀକୁ ଦେଖିବାକୁ ପାଇଥାଆନ୍ତେ ଦର୍ଶକ । କିନ୍ତୁ ଏହି ପ୍ରୋଜେକ୍ଟ ମଧ୍ୟ ପ୍ରୀ-ପ୍ରଡକ୍ସନରୁ ଆଗକୁ ବଢିପାରିନଥିଲା ।
