ନୂଆଦିଲ୍ଲୀ: କୋର୍ଟରେ ହାଜର ହୋଇଛନ୍ତି କମେଡି କୁଇନ ଭାରତୀ ସିଂ ଏବଂ ତାଙ୍କ ସ୍ବାମୀ ହର୍ଷ ଲିମ୍ବାଚିୟା । ଡ୍ରଗ୍ସ ମାମଲାରେ ଗିରଫ ହୋଇଥିବା ଭାରତୀ ଏବଂ ହର୍ଷଙ୍କୁ ଡିସେମ୍ବର 4 ତାରିଖ ପର୍ଯ୍ୟନ୍ତ ମୁମ୍ବାଇର ଏକ କୋର୍ଟ 14 ଦିନିଆ ନ୍ୟାୟିକ ହେପାଜତକୁ ପଠାଇଛନ୍ତି ।
ରବିବାର ସକାଳେ ଡାକ୍ତରୀ ପରୀକ୍ଷା ପରେ ଉଭୟଙ୍କୁ କୋର୍ଟରେ ଜଣେ ମାଜିଷ୍ଟ୍ରେଟଙ୍କ ନିକଟରେ ହାଜର କରାଯାଇଥିଲା । ଏନସିବି ଭାରତୀ ଏବଂ ହର୍ଷଙ୍କୁ ରିମାଣ୍ଡରେ ନେବାକୁ ଚାହୁଁଥିବାବେଳେ କୋର୍ଟ ଉଭୟଙ୍କୁ ନ୍ୟାୟିକ ହେପାଜତକୁ ପଠାଇଛନ୍ତି ।
ଅନ୍ୟପକ୍ଷରେ ଭାରତୀ ଏବଂ ହର୍ଷଙ୍କ ଜାମିନ ଆବେଦନର ସୋମବାର କୋର୍ଟ ଶୁଣାଣି କରିବେ ।
ଶନିବାର ଭାରତୀଙ୍କ ଘରେ ଏନସିବି ଚଢାଉ କରି 86.5 ଗ୍ରାମ ଗଞ୍ଜେଇ ଜବତ କରିଥିଲା । ଏହା ପରେ ଏନସିବି ଉଭୟ ସ୍ବାମୀ-ସ୍ତ୍ରୀଙ୍କୁ ସମନ ପଠାଇବା ସହ କାର୍ଯ୍ୟାଳୟକୁ ଡାକି ଜେରା କରିଥିଲା । ଶନିବାର ସନ୍ଧ୍ୟାରେ ଭାରତୀଙ୍କୁ ଗିରଫ କରାଯାଇଥିଲା । ଆଉ ସକାଳେ ଆଜି ହର୍ଷ ଗିରଫ ହୋଇଛନ୍ତି । ଭାରତୀ ଓ ହର୍ଷଙ୍କ ଘରେ କାମ କରୁଥିବା ସଦସ୍ୟକୁ ମଧ୍ୟ ଏନସିବି ଜେରା କରିଥିଲା । ସେମାନେ କେଉଁଠୁ ଡ୍ରଗ୍ସ ମଗାଉଥଲେ ସେନେଇ ମଧ୍ୟ ଜଣାପଡିଛି ।
ପ୍ରକାଶ ଥାଉ କି, ସୁଶାନ୍ତ ସିଂ ରାଜପୁତଙ୍କ ମୃତ୍ୟୁ ସହ ସମ୍ପୃକ୍ତ ଥିବା ଏହି ଡ୍ରଗ୍ସ ମାମଲାରେ ଏଯାବତ ଏନସିବି ଅନେକ ଡ୍ରଗ୍ସ ଡିଲରଙ୍କୁ ଗିରଫ କରିସାରିଲାଣି । ଆଉ ଅନେକ ସେଲିବ୍ରିଟିଙ୍କୁ ପଚାରାଉଚରା କରିବା ସହ ସେମାନଙ୍କ ଘରେ ଚଢାଉ କରୁଛି ।