ଛପାକ-ତାନାଜୀ ମୁହାଁମୁହିଁ, କିଏ ଜିତିବ ବାଜି....

ଏକାଠି ରିଲିଜ ହୋଇଯାଇଛି ବହୁ ଚର୍ଚ୍ଚିତ ଫିଲ୍ମ ‘ଛପାକ’ ଓ ‘ତାନାଜୀ’ । ଗୋଟିଏ ପଟେ ଦୀପିକାଙ୍କ ଦମଦାର ଅଭିନୟ ଅନ୍ୟପଟେ ଅଜୟଙ୍କ ଶାନଦାର ଆକ୍ସନ । କାହାର ହେବେ ଫାଷ୍ଟଡେ କଲେକ୍ସନ ଜବରଦସ୍ତ ।

ମୁମ୍ବାଇ: ଆଜି ସିନେମା ହଲରେ ଦୁଇଟି ବଡ ଫିଲ୍ମ ରିଲିଜ ହୋଇଛି । ସିଂଘମ ଅଜୟ ଦେବଗନଙ୍କ ଐତିହାସିକ ଫିଲ୍ମ ‘ତାନାଜୀ: ଦ ଅନସଙ୍ଗ ୱାରିୟର’ ସହ ଟକ୍କର ଦେଇଛି ପଦ୍ମାବତୀ ଦୀପିକା ପାଦୁକୋନଙ୍କ ଫିଲ୍ମ ‘ଛପାକ’ । ଦୀର୍ଘ ସମୟରୁ ଏହି ଦୁଇ ଫିଲ୍ମ ଚର୍ଚ୍ଚାରେ ରହିଆସୁଛି । ଆଉ ଏମିତିରେ କେଉଁ ଫିଲ୍ମ ବକ୍ସ ଅଫିସରେ ବାଜି ମାରିବ, ଆସନ୍ତୁ ଜାଣିବା...

ଦୀପିକା ଓ ବିକ୍ରାନ୍ତ ମେସୀଙ୍କ ଅଭିନତୀ ‘ଛପାକ’କୁ କ୍ରିଟିକ୍ସିଙ୍କ ଶାନଦାର ପ୍ରତିକ୍ରିୟା ମିଳିଛି । ହେଲେ ବାସ୍ତବ ଘଟଣା ଉପରେ ଆଧାରିତ ‘ଛପାକ’ର ପ୍ରଥମଦିନ କଲେକ୍ସନ ଉପରେ ପ୍ରଭାବ ପଡିପାରେ । ଏହାର କାରଣ ଦୀପିକାଙ୍କ ଜେଏନୟୁ ଛାତ୍ରଛାତ୍ରୀଙ୍କ ବିରୋଧ ପ୍ରଦର୍ଶନରେ ସାମିଲ ହେବା । ସୋସିଆଲ ମିଡିଆରେ ‘ଛପାକ’କୁ ବଏକଟ କରିବା ଦାବି ହେବା ପରଠୁ, ଟ୍ରେଣ୍ଡ ଆନାଲିଷ୍ଟ ଗିରିଶ ଜୋହର ଅନୁମାନ ଲଗାଇ କହିଛନ୍ତି ‘ଛପାକ’ ରିଲିଜର ପ୍ରଥମଦିନରେ କେବଳ 5 କୋଟି ଟଙ୍କା ଆୟ କରିବାରେ ସଫଳ ହେବ ।

ସେହିପରି ଅନ୍ୟ କିଛି ଗଣନା ଅନୁଯାୟୀ ‘ଛପାକ’ ଓପନିଂ ଡେରେ 6-8 କୋଟି କଲେକ୍ସନ କରିପାରେ । ‘ଛପାକ’ ଫିଲ୍ମର ବଜେଟ 40 କୋଟି ଟଙ୍କା । ଆଉ ଫିଲ୍ମ ରିଲିଜକୁ କେବଳ 1500 ସ୍କ୍ରିନ୍ସ ମିଳିଛି । ଏତେ କମ ସ୍କ୍ରିନ୍ସ ମିଳିବା ମଧ୍ୟ ‘ଛପାକ’ର କଲେକ୍ସନରେ ପ୍ରଭାବ ପକାଇପାରେ ।

ଅନ୍ୟପଟେ ମରାଠା ଯୋଦ୍ଧା ତାନାଜୀ ମାଲୁସରେଙ୍କ ସାହାସିକତାକୁ ବଖାଣୁଥିବା ଫିଲ୍ମ ‘ତାନାଜୀ’ରେ ଅଜୟ, ସୈଫ ଓ କାଜୋଲଙ୍କୁ ମୁଖ୍ୟ ଭୂମିକାରେ ଦେଖିବାକୁ ପାଇଛନ୍ତି ଦର୍ଶକ । ରିପୋର୍ଟ ଅନୁଯାୟୀ ‘ତାନାଜୀ’କୁ ‘ଛପାକ’ ଅପେକ୍ଷା ଅଧିକ ସ୍କ୍ରିନ୍ସ ମିଳିଛି । 3500 ସ୍କ୍ରିନ୍ସରେ ରିଲିଜ ହୋଇଛି ଫିଲ୍ମ । ‘ତାନାଜୀ’ର ଫାଷ୍ଟଡେ କଲେକ୍ସନ ‘ଛପାକ’ରୁ ଅଧିକ ହେବ ବୋଲି ଗଣନା କରିଛନ୍ତି କ୍ରିଟିକ୍ସ । ପାଖାପାଖି 10 କୋଟି ଆୟ କରି ଖାତା ଖୋଲିବ ‘ତାନାଜୀ’ । ଏହି ମୁହାଁମୁହିଁରେ କେଉଁ ଫିଲ୍ମ ବାଜି ମାରୁଛି ତାହା ଖାଲି ଦେଖିବାକୁ ରହିଲା ବାକି।