ନୂଆଦିଲ୍ଲୀ: ପୁଣି କଳା ଜଗତରେ କୋରୋନା ଭୟ । ଟଳିଲା କିଛି ଫିଲ୍ମର ରିଲିଜ ତାରିଖ । ଏହି କ୍ରମରେ ସାମିଲ ଅଛି ଅଭିନେତା ସୈଫ ଅଲ୍ଲୀ ଖାନ ଏବଂ ରାନୀ ମୁଖାର୍ଜୀଙ୍କ ବହୁ ପ୍ରତୀକ୍ଷିତ ଚଳଚ୍ଚିତ୍ର 'ବଣ୍ଟି ଔର ବବଲି-2' ରିଲିଜ ଡେଟ । କୋରୋନା ମାମଲା ବୃଦ୍ଧି ପାଉଥିବାକୁ ଦୃଷ୍ଟିରେ ରଖି ଏହି ନିଷ୍ପତ୍ତି ନିଆଯାଇଛି ।
ଫିଲ୍ମଟି 23 ଏପ୍ରିଲ 2021ରେ ରିଲିଜ ହେବାର ଥିଲା । ବର୍ତ୍ତମାନ ନିର୍ମାତାମାନେ କହିଛନ୍ତି ଯେ ଏହି ଫିଲ୍ମ ସେହି ତାରିଖରେ ରିଲିଜ ହେବ ନାହିଁ । ୟଶ ରାଜ ଫିଲ୍ମସ ଏହି ଫିଲ୍ମର ନୂଆ ତାରିଖ ପରେ ଘୋଷଣା କରିବେ ।
ଏହି ଚଳଚ୍ଚିତ୍ରରେ ସୈଫ ଏବଂ ରାନୀଙ୍କ ସହ ସିଦ୍ଧାନ୍ତ ଚତୁର୍ବେଦୀ ଏବଂ ଶରଓ୍ବରୀ ବାଗ ମଧ୍ୟ ଅଭିନୟ କରିଛନ୍ତି।
ଫିଲ୍ମର ସୁଟିଂ ଗତ ବର୍ଷ ମାର୍ଚ୍ଚରେ ହିଁ ଶେଷ ହୋଇଥିଲା । ଲକଡାଉନ ପଡିଥିବାରୁ ଏହି ଫିଲ୍ମ ରିଲିଜ୍ ହୋଇପାରିଲା ନାହିଁ । ଏହି ଚଳଚ୍ଚିତ୍ରଟି ଗତ ବର୍ଷ 26 ଜୁନ୍ 2020ରେ ରିଲିଜ ହେବାର ଥିଲା, କିନ୍ତୁ ତାହା ହୋଇପାରିଲା ନାହିଁ । ଏବେ ତାଙ୍କ ପ୍ରଶଂସକଙ୍କୁ ଏହି ଫିଲ୍ମ ଦେଖିବାକୁ ଅଧିକ ଅପେକ୍ଷା କରିବାକୁ ପଡ଼ିବ ।
ୟଶ ରାଜ ଫିଲ୍ମସ୍ ଗତ ବର୍ଷ ଏକ ପୋଷ୍ଟ ମାଧ୍ୟମରେ କହିଥିଲେ ଯେ, କୋରୋନା ମହାମାରୀ ସହ ଜଡିତ ନିର୍ଦ୍ଦେଶାବଳୀ ଅନୁଯାୟୀ ଏହାର ସୁଟିଂ ଶେଷ ହୋଇଛି।
2005 ମସିହାରେ 'ବଣ୍ଟି ଔର ବବଲି' ମୁକ୍ତିଲାଭ କରିଥିଲା । ଯେଉଁଥିରେ ମୁଖ୍ୟ ଚରିତ୍ରରେ ଅଭିଷେକ ବଚ୍ଚନ ଏବଂ ରାନୀ ମୁଖାର୍ଜୀ ଥିଲେ। ଏହି ଫିଲ୍ମଟି ବକ୍ସ ଅଫିସରେ ହିଟ କରିଥିଲା ।
ପ୍ରକାଶ ଥାଉ ଯେ, ବର୍ତ୍ତମାନ ଦର୍ଶକମାନେ ଉତ୍ସାହର ସହିତ ଏହି ଚଳଚ୍ଚିତ୍ରର ଦ୍ବିତୀୟ ଭାଗକୁ ଅପେକ୍ଷା କରିଛନ୍ତି । ଏଥି ସହିତ, 11 ବର୍ଷ ପରେ ସୈଫ ଅଲି ଖାନ ଏବଂ ରାନୀ ମୁଖାର୍ଜୀଙ୍କ ଯୋଡି ବଡ଼ ପରଦାରେ ଦେଖିବାକୁ ମିଳିବ ।
