ମୁମ୍ବାଇ: ବଲିଉଡ ଅଭିନେତା ଋଷି କପୁରଙ୍କ ହଠାତ ଦେହାନ୍ତ ହେବା କାରଣରୁ ବଲିଉଡର ସମସ୍ତ ସେଲିବ୍ରିଟିମାନଙ୍କ ହୃଦୟ ଭାଙ୍ଗି ଯାଇଛି । ଆଜି ସକାଳେ ମୁମ୍ବାଇର ସାର ଏଚ. ଏନ. ରିଲାଏନ୍ସ ଫାଉଣ୍ଡେସନ ହସ୍ପିଟାଲରେ ଋଷି କପୁରଙ୍କ ଦେହାନ୍ତ ହୋଇଛି । ଦୀର୍ଘ ଦିନର ଅସୁସ୍ଥତା ପରେ, ଭେଟେରାଇନ ଅଭିନେତା ଶେଷରେ 67 ବର୍ଷ ବୟସରେ ଆମ ସମସ୍ତଙ୍କୁ ବିଦାୟ ଜଣାଇଲେ । ବଲିଉଡର ସମସ୍ତ ସେଲିବ୍ରିଟିମାନେ ସୋସିଆଲ ମିଡିଆ ମାଧ୍ୟମରେ ସ୍ୱର୍ଗତ ଋଷି କପୁରଙ୍କୁ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି । ଗତକାଲି ପ୍ରଖ୍ୟାତ ଅଭିନେତା ଇରଫାନ ଖାନ ମଧ୍ୟ କ୍ୟାନ୍ସର ଜନିତ ମୃତ୍ୟୁବରଣ କରିଛନ୍ତି ।
ଅଭିନେତା ଅନୁପମ ଖେର ଏକ ଭିଡିଓ ସେୟାର କରିଛନ୍ତି ଯାହା ତାଙ୍କର ଏବଂ ଋଷି କପୁରଙ୍କ ସହ ସାକ୍ଷାତର ଶେଷ ଭିଡିଓ ଥିଲା । ଏହି ଭିଡିଓ ସହିତ ଅନୁପମ ଖେର ଲେଖିଛନ୍ତି ଯେ, ଋଷି କପୁର ଜଣେ ଅତି ପ୍ରିୟ ବନ୍ଧୁ ତଥା ସହକର୍ମୀ ଥିଲେ । ଋଷି କପୁରଙ୍କ ଭିତରେ ପିଲାଳିଆମି ଗୁଣ ଭରପୁର ଥିଲା । ଋଷି କପୁର ସବୁବେଳେ ଆମ ହୃଦୟରେ ରହିବେ । ନମସ୍କାର ।
ସୁପରଷ୍ଟାର ସଲମାନ ଖାନ ମଧ୍ୟ ଦୁଖ ପ୍ରକାଶ କରି ଟ୍ୱିଟ କରି କହିଛନ୍ତି ଯେ, ଭଗବାନ ତୁମର ଆତ୍ମାକୁ ଶାନ୍ତି ଦିଅନ୍ତୁ ଚିଣ୍ଟୁ ସାର....ତୁମକୁ ଆମେ ସର୍ବଦା ମନେ ରଖିବୁ ।