ମୁମ୍ବାଇ: ବି-ଟାଉନର କୁଇନ କଙ୍ଗନା ରଣାୱତ ବର୍ତ୍ତମାନ କଣ୍ଟ୍ରୋଭର୍ସି କୁଇନ ସାଜିଛନ୍ତି । କିଛି ଦିନ ହେବ ଦେଶର ବଡ ପ୍ରସଙ୍ଗ ରୂପେ ଦେଖିବାକୁ ମିଳୁଛି ଶିବସେନା ଓ କଙ୍ଗନାଙ୍କ ୱାର୍ । ସୋମବାର ସକାଳେ କଙ୍ଗନାଙ୍କୁ ଗୃହ ମନ୍ତ୍ରାଳୟ ତରଫରୁ ୱାଇ ପ୍ଲସ ସୁରକ୍ଷା ଦିଆଯିବାର ଘୋଷଣା କରାଯାଇଥିଲା । ସେପଟେ ବିଏମସି ଅଧିକାରୀମାନେ ସୋମବାର ଅପରାହ୍ନରେ ବାନ୍ଦ୍ରା ୱେଷ୍ଟର ପାଲି ହିଲରେ କଙ୍ଗନାଙ୍କ କାର୍ଯ୍ୟାଳୟ ପରିଦର୍ଶନ କରିଥିଲେ । ବିଏମସି ଅଧିକାରୀଙ୍କ ଅନୁଯାୟୀ ତାଙ୍କ କାର୍ଯ୍ୟାଳୟରେ ଏକ ବେଆଇନ ସମ୍ପ୍ରସାରଣ ରହିଛି ଏବଂ ବିଲ୍ଡିଂ ପ୍ରସ୍ତାବ ବିଭାଗର ଏକ ଟିମ୍ ଅନୁମୋଦିତ ଯୋଜନାରୁ ଯାଞ୍ଚ କରିବା ପାଇଁ ପରିସର ଯାଞ୍ଚ କରିଛନ୍ତି ।
ବିଏମସିର ଏହି କାର୍ଯ୍ୟକଳାପରେ କଙ୍ଗନା କ୍ରୋଧିତ ହୋଇ ଟ୍ବିଟ କରିଛନ୍ତି । ଯେଉଁଥିରେ ସେ ଲେଖିଛନ୍ତି, ‘ବିଏମସି ଜବରଦସ୍ତି ମୋ କାର୍ଯ୍ୟାଳୟ ଯାଞ୍ଚ କରିଛନ୍ତି । ବିଏମସି ଅନୁମତିର ସମସ୍ତ କାଗଜପତ୍ର ମୋ ପାଖରେ ଅଛି । ମୋ ସମ୍ପତ୍ତିରେ ବେଆଇନ ଭାବେ କୌଣସି କାର୍ଯ୍ୟ କରାଯାଇ ନାହିଁ, ବିଏମସି ଏକ ବିଜ୍ଞପ୍ତି ସହିତ ବେଆଇନ ନିର୍ମାଣକୁ ଦେଖାଇବା ପାଇଁ ଏକ ସଂରଚନା ଯୋଜନା ପଠାଇବା ଉଚିତ, ଆଜି ସେମାନେ ମୋ ଜାଗାରେ ଚଢାଉ କରିଛନ୍ତି ଏବଂ ଆସନ୍ତାକାଲି ବିନା କୌଣସି ନୋଟିସରେ ସେମାନେ ସମ୍ପୂର୍ଣ୍ଣ କାର୍ଯ୍ୟାଳୟକୁ ଧ୍ବସଂ କରିବାକୁ ଯାଉଛନ୍ତି ।’