ମୁମ୍ବାଇ: ଲୋକପ୍ରିୟ ଅଭିନେତା ପଙ୍କଜ ତ୍ରିପାଠୀଙ୍କ ଦମଦାର ଅଭିନୟ ନିକଟରେ ରିଲିଜ ହୋଇଥିବା ଫିଲ୍ମ ‘ଲୁଡୋ’ରେ ଦେଖିବାକୁ ମିଳିଥିଲା । ଭିଲେନ ହୋଇ ଜବରଦସ୍ତ କମେଡି ଫିଲ୍ମରେ ଅଭିନୟ କରିଥିଲେ ସେ । ଅନୁରାଗ ବାସୁଙ୍କ ଏହି ମଲ୍ଟି ଷ୍ଟାରର ଫିଲ୍ମରେ ନଜର ଆସିଥିଲେ ଅଭିଷେକ ବଚ୍ଚନ, ରାଜକୁମାର ରାଓ, ଆଦିତ୍ୟ ରୟ କପୁର, ଫତିମା ସନା ସେଖ ଓ ସନୟା ମଲହୋତ୍ରା ଭଳି କଳାକାର । ଏବେ ପୁଣି ପରଦାରେ ଦେଖିବାକୁ ମିଳିବ ପଙ୍କଜଙ୍କ ଅଭିନୟ । ସେ ସେକ୍ସୀ ଅଭିନେତ୍ରୀ ରିଚା ଚଡ୍ଡାଙ୍କ ଆଗାମୀ ଫିଲ୍ମ ‘ସକିଲା’ରେ ନଜର ଆସିବେ । ଯେଉଁଥିରୁ ତାଙ୍କ ଫାଷ୍ଟଲୁକ ପୋଷ୍ଟର ଜାରି ହୋଇଛି ।
ଏହାକୁ ଇନଷ୍ଟାଗ୍ରାମରେ ସେୟାର କରି କ୍ୟାପସନରେ ଲେଖିଛନ୍ତି, ‘ମୁଁ ଖୁସି ଯେ ଆମର ପ୍ରେମଭରା ସକିଲା ଏହି ଖ୍ରୀଷ୍ଟମାସରେ ସିନେମାହଲରେ ରିଲିଜ ହେବାକୁ ନେଇ । ମୁଁ ଫିଲ୍ମ ପାଇଁ ବହୁତ ଉତ୍ସାହିତ ଅଛି, କାରଣ ମୁଁ ଏଥିରେ ବହୁତ ପ୍ରତିଭାବାନ ବନ୍ଧୁ ରିଚା ଚଡ୍ଡାଙ୍କ ସହ କାମ କରିଛି ।’
ସେହିପରି ସେ ଫିଲ୍ମରେ ନିଜ ଭୂମିକା ବିଷୟରେ ଆଲୋଚନା କରି ଜଣାଇଛନ୍ତି, ‘ଫିଲ୍ମରେ ମୋର ଏକ ସୁନ୍ଦର ଅଂଶ ଅଛି । ମୁଁ ମୋ କ୍ୟାରିୟରରେ ପ୍ରଥମ ଥର ପାଇଁ ଜଣେ ଅଭିନେତା ରୂପେ ଅଭିନୟ କରିଛି । ମୁଁ ସବୁବେଳେ ପରଦାରେ ଜଣେ ଅଭିନେତା ରୂପେ ଅଭିନୟ କରିବାକୁ ଚେଷ୍ଟା କରିଆସୁଥିଲି । ସକିଲାରେ ମୋର ଏକ ଆକର୍ଷଣୀୟ ଏବଂ ରଙ୍ଗୀନ ଭୂମିକା ସମସ୍ତେ ଦେଖିବେ ।’