ମୁମ୍ବାଇ:ବଲିଉଡ଼ ସୁପରଷ୍ଟାର ଅକ୍ଷୟ କୁମାରଙ୍କ ବହୁ ପ୍ରତିକ୍ଷିତ ଫିଲ୍ମ 'ସୂର୍ଯ୍ୟବଂଶୀ' ଆଜି ରିଲିଜ ହୋଇଛି । ପ୍ରଥମ ଦିନରେ ୬୬ଟି ଦେଶର ୧୩୦୦ଟି ସ୍କ୍ରିନରେ ରିଲିଜ ହୋଇଥିବା ବେଳେ ଭାରତରେ ମହାମାରୀ ସମୟରେ ୪୦୦୦ଟି ସ୍କ୍ରିନରେ ରିଲିଜ ହୋଇ ସୃଷ୍ଟି କରିଛି ରେକର୍ଡ । ସେପଟେ ଫିଲ୍ମ ଦେଖି 'ପୈସା ବସୁଲ' କହିଲେ ଦର୍ଶକ । ଏହି ଫିଲ୍ମରେ ଅକ୍ଷୟଙ୍କ ସହିତ ମୁଖ୍ୟ ଭୂମିକାରେ ଅଜୟ ଦେବଗନ, ରଣବୀର ସିଂ ଓ କ୍ୟାଟ୍ରିନା କୈଫଙ୍କୁ ଦେଖିବାକୁ ମିଳିଛି ।
ଫିଲ୍ମଟି ନିର୍ଦ୍ଦେଶକ ରୋହିତ ସେଟ୍ଟୀଙ୍କ ନିର୍ଦ୍ଦେଶନାରେ ତିଆରି ହୋଇଛି । ଏହି ଫିଲ୍ମଟି ମହାମାରୀ ସମୟରେ ସବୁଠୁ ଅଧିକ ଅନ୍ତର୍ଜାତୀୟ ସ୍ତରରେ ରିଲିଜ ହୋଇଛି । ଦକ୍ଷିଣ ଆମେରିକାର ପ୍ରାୟ ୪୯୦ଟି ସ୍ଥାନରେ ଫିଲ୍ମଟି ୫୨୦ ସ୍କ୍ରିନରେ ରିଲିଜ ହୋଇଛି । UAEର ୧୩୭ଟି ସ୍କ୍ରିନରେ ରିଲିଜ ହୋଇଥିବା ବେଳେ ଅଷ୍ଟ୍ରେଲିଆରେ ୧୦୭ଟି ସ୍କ୍ରିନ, ୟୁରୋପରେ ୧୫୮ଟି ସ୍କ୍ରିନ, ଫ୍ରାନ୍ସରେ ୨୯ଟି ସ୍କ୍ରିନ, ଜର୍ମାନୀରେ ୩୬ଟି ସ୍କ୍ରିନ, ସ୍ପେନରେ ୨୦ଟି ସ୍କ୍ରିନ ଓ ଇଟାଲୀରେ ୧୯ଟି ସ୍କ୍ରିନରେ ହୋଇଛି ରିଲିଜ । ଏହାସହିତ ଇସ୍ରାଏଲ, ଜାପାନ, ଇଜିପ୍ଟ, ଇରାକ ଆଦି ରାଷ୍ଟ୍ରରେ ମଧ୍ୟ ଫିଲ୍ମଟି ରିଲିଜ ହୋଇଛି ।