ସେପ୍ଟେମ୍ବର 6 ରେ ଚୀନରେ ‘2.0’ର ଯାଦୁ

ସେପ୍ଟେମ୍ବର 12 ପରିବର୍ତ୍ତେ ଏବେ 6ରେ ରିଲିଜ ହେବ ଅକ୍ଷୟ ଓ ରଜନୀକାନ୍ତଙ୍କ ସୁପରହିଟ୍ ଫିଲ୍ମ ‘2.0’ । ସୋସିଆଲ ମିଡିଆରେ ସୂଚନା ଦେଲେ ଅଭିନେତ୍ରୀ ଏମି ଜ୍ୟାକସନ୍ ।

ମୁମ୍ବାଇ: ଖିଲାଡି ଅକ୍ଷୟ କୁମାର ଓ ଥଲାଇବା ରଜନୀକାନ୍ତଙ୍କ ଅଭିନୀତ ହିଟ୍ ଫିଲ୍ମ ‘2.0’ ଭାରତୀୟ ଦର୍ଶକଙ୍କ ଖୁବ୍ ମନ କିଣିଥିଲା । ଆଉ 2018ର ବିଗେଷ୍ଟ ରିଲିଜ ରୂପେ ସାବ୍ୟସ୍ତ ହୋଇଥିଲା ଏହି ଫିଲ୍ମ । ଓପନିଂ ଡେରେ ଫିଲ୍ମଟି 20 କୋଟି ଆୟ କରି ହିଟ୍ ଫିଲ୍ମରେ ସାମିଲ ହୋଇଥିଲା । ଆଉ ଏବେ ବିଦେଶ ମାଟିରେ ଫିଲ୍ମ ନିଜର ଯାଦୁ ଦେଖାଇବାକୁ ପ୍ରସ୍ତୁତ ହୋଇସାରିଲାଣି ।

ମେକର୍ସ ମଧ୍ୟ ରେଡି ହୋଇସାରିଲେଣି ‘2.0’କୁ ଚୀନରେ ରିଲିଜ କରିବା ପାଇଁ । ପୂର୍ବରୁ ସେପ୍ଟେମ୍ବର 12ରେ ଫିଲ୍ମ ରିଲିଜ ହୋଇଥାଆନ୍ତା । କିନ୍ତୁ ଏବେ ମେକର୍ସ ରିଲିଜ ତାରିଖ ପରିବର୍ତ୍ତନ କରି ସେପ୍ଟେମ୍ବର 6 କରିଦେଇଛନ୍ତି ।

ଏହି ଅବସରରେ ‘2.0’ର ଅଭିନେତ୍ରୀ ଏମି ଜ୍ୟାକସନ୍ ଫିଲ୍ମର ଚୀନ ପୋଷ୍ଟର ସୋସିଆଲ ମିଡିଆରେ ସେୟାର କରି ଫ୍ୟାନ୍ସଙ୍କୁ ଏହାର ସୂଚନା ଦେଇଛନ୍ତି । ଆଉ କ୍ୟାପସନରେ ଲେଖିଛନ୍ତି, ‘2.0 ଚୀନରେ ରିଲିଜ ହେବାକୁ ରେଡି ହୋଇସାରିଲାଣି । ସେପ୍ଟେମ୍ବର 6ରେ ପାଖାପାଖି 40,000 ଆଇମ୍ୟାକ୍ସ 3ଡି ସ୍କ୍ରିନ୍ସରେ ରିଲିଜ ହେବ ।’

ପ୍ରକାଶ ଥାଉକି ଫିଲ୍ମଟି ପୂର୍ବରୁ ବିଶ୍ବସ୍ତରରେ 10,500 ସ୍କ୍ରିନରେ ରିଲିଜ ହୋଇ ରେକର୍ଡ ସୃଷ୍ଟି କରିଥିଲା । ଯାହା ତେଲୁଗୁ ସୁପରଷ୍ଟାର ପ୍ରଭାସଙ୍କ ବହୁ ଚର୍ଚ୍ଚିତ ଫିଲ୍ମ ବହୁବଳୀ 2କୁ ଟକ୍କର ଦେଇଥିଲା । ଏହି ଫିଲ୍ମଟି 9000 ସ୍କ୍ରିନରେ ରିଲିଜ ହୋଇଥିଲା ।