ମୁମ୍ବାଇ: ନିଜ ଆଗାମୀ ଫିଲ୍ମକୁ ନେଇ ବଲିଉଡ ଅଭିନେତ୍ରୀ ପୂଜା ହେଗଡେ ଖୁବ୍ ଉତ୍ସାହିତ । କାରଣ ତାଙ୍କ ଅପୋଜିଟରେ ଅଛନ୍ତି ବଲିଉଡର ଦବଙ୍ଗ ଷ୍ଟାର ସଲମାନ ଖାନ । ତେବେ ଭାଇଜାନଙ୍କ ସହ କାମ କରିବା ନେଇ ସେ ଭୟଭୀତ ଥିବା କହିଛନ୍ତି ।
ନିକଟରେ ଏକ ସାକ୍ଷାତକାରରେ ସେ କହିଛନ୍ତି ଯେ ବଲିଉଡରେ ସଲମାନ ବହୁତ ପୁରୁଣା । ତାଙ୍କ ପାଖରେ ଦୀର୍ଘ ଦିନର ଅଭିଜ୍ଞତା । ସଲମାନଙ୍କ ଅପୋଜିଟରେ ଆକ୍ଟିଂ କରିବା ଯେତିକି ଉତ୍ସାହ ସେତିକି ଭୟ । କାରଣ ତାଙ୍କ ଅଭିଜ୍ଞତା ସହ ମ୍ୟାଚ କରିବାକୁ ହେଲେ ଅନେକ କିଛି ଶିଖିବାକୁ ପଡିବ । ନିଜ ଆକ୍ଟିଂର ସ୍ତରକୁ ଅନେକ ବଢାଇବାକୁ ପଡିବ । ଜଣେ ଅଭିଜ୍ଞ ସୁପରଷ୍ଟାରଙ୍କ ସହ କାମ କରିବା କଷ୍ଟକର କାମ । ତେବେ ସଲମାନଙ୍କ ସହ ଆକ୍ଟିଂ ଏକ ନୂଆ ଅନୁଭୂତି ସହ ଶିକ୍ଷଣୀୟ ହେବ ବୋଲି ପୂଜା କହିଛନ୍ତି ।
ଗତ ଜାନୁୟାରୀ 10ରେ ସଲମାନ ନିଜ ଆଗାମୀ ଫିଲ୍ମ କଭି ଇଦ କଭି ଦିୱାଲୀ ଘୋଷଣା କରିଥିଲେ । ଫରହାଦ ସାମଜୀଙ୍କ ନିର୍ଦ୍ଦେଶନାରେ ଏଥିରେ ପୂଜା ହେଗଡେ ଫିମେଲ ଲିଡରେ ଆକ୍ଟିଂ କରିବେ । ଫେବୃୟାରୀରେ ଫିଲ୍ମର ପ୍ରଯୋଜନା ସଂସ୍ଥା ନାଡିଆଡୱାଲା ଗ୍ରାଣ୍ଡସନ ପକ୍ଷରୁ ଏନେଇ ଘୋଷଣା ହୋଇଥିଲା । ଆସନ୍ତାବର୍ଷ ଇଦରେ ଏହା ରିଲିଜ ହେବ ବୋଲି ଟ୍ବିଟରରେ ସଲମାନ ସୂଚନା ଦେଇଥିଲେ । ଅକ୍ଟୋବରରୁ ଏହାର ସୁଟିଂ ଆରମ୍ଭ ହେବାର ଥିଲା । ତେବେ କୋରୋନା ପ୍ରଭାବ ଯୋଗୁଁ ଏହା ଆରମ୍ଭ ହେବାରେ ବିଳମ୍ବ ହୋଇପାରେ ବୋଲି ପ୍ରଯୋଜନା ସଂସ୍ଥା ସୂଚନା ଦେଇଛି ।
ବର୍ତ୍ତମାନ ସଲମାନଙ୍କ ରାଧେ ସୁଟିଂ ଜାରି ରହିଛି । ଏବର୍ଷ ଇଦରେ ଫିଲ୍ମ ରିଲିଜ ହେବାର ଥିଲା । ତେବେ ବର୍ତ୍ତମାନ ଲକଡାଉନ ଯୋଗୁଁ ଏହାର ସୁଟିଂ ବନ୍ଦ ରହିଛି । ସେପଟେ ପୂଜାଙ୍କ ଅଭିନୀତ ଫିଲ୍ମ ହାଉସଫୁଲ 4 ବକ୍ସ ଅଫିସରେ ସୁପରହିଟ ହୋଇଥିଲା । ନିକଟରେ ସେ ତେଲୁଗୁ ଫିଲ୍ମ ଆଲା ବୈକୁଣ୍ଠପୁରମରେ ଅଲୁ ଅର୍ଜୁନଙ୍କ ସହ ନଜର ଆସିଥିଲେ ।
