ମୁମ୍ବାଇ: ଅଭିନେତା ଦର୍ଶନ କୁମାର, ଆର ମାଧବନ ଏବଂ ଅପାରଶକ୍ତି ଖୁରାନାଙ୍କୁ ନେଇ ନୂଆ ଚର୍ଚ୍ଚା । ଶୁଣିବାକୁ ମିଳୁଛି ଏହି ତିନି ଅଭିନେତାଙ୍କୁ ଏକାଠି ପରଦାରେ ଦେଖିବାକୁ ମିଳିବ । ଆଜ୍ଞା ହଁ, ଏହି ତିନି ଷ୍ଟାର ସସପେନ୍ସ ଥ୍ରୀଲର ଫିଲ୍ମରେ ଅଭିନୟ କରିବାକୁ ଯାଉଛନ୍ତି । ଯାହାକୁ ନେଇ ବର୍ତ୍ତମାନ ମନ କଥା କହି ଚର୍ଚ୍ଚାରେ ଦର୍ଶନ । ତାଙ୍କ ଅନୁଯାୟୀ ଏକ ଭଲ ସ୍କ୍ରିପ୍ଟରେ ସେ ସବୁବେଳେ କାମ କରିବାକୁ ଚାହାଁନ୍ତି । ଯାହା ନୂଆ ବର୍ଷରେ ତାଙ୍କ ହାତରେ ଲାଗିଛି ।
ସେହିପରି ସେ ଜଣାଇଛନ୍ତି, ‘ଏବର୍ଷ ମୋ ପାଇଁ ଭଲ ସାବ୍ୟସ୍ତ ହୋଇଛି । ଆଜି ମୁଁ ମୋ ନୂଆ ପ୍ରୋଜେକ୍ଟର ସୁଟିଂ ଆରମ୍ଭ କରିଛି । ଯାହାକୁ ନେଇ ମୁଁ ବହୁତ ଉତ୍ସାହିତ । ସବୁବେଳେ ଭଲ ଭଲ ସ୍କ୍ରିପ୍ଟରେ କାମ କରିବାକୁ ଉତ୍ତମ ଅଟେ । ହେଲେ ଅନୁଭୂତିକୁ ଅଧିକ ସମୃଦ୍ଧ କରିଥାଏ ଯେତେବେଳେ ତୁମର ମହାନ ସହ-ତାରକା ଥାଆନ୍ତି । ମାଧବନ ଆମ ଇଣ୍ଡଷ୍ଟ୍ରିର ସର୍ବୋତ୍ତମ ଅଭିନେତାଙ୍କ ମଧ୍ୟରୁ ଅନ୍ୟତମ, ଯିଏ ସର୍ବଦା ଅଭିନୟ ଜରିଆରେ ଦର୍ଶକଙ୍କ ମନ କିଣନ୍ତି। ଏଭଳି ଅଭିନେତାଙ୍କ ସହ ପରଦାରେ କାମ କରିବାକୁ ନେଇ ମୁଁ ନିଜକୁ ଭାଗ୍ୟବାନ ମନେ କରୁଛି ।’