ମୁମ୍ବାଇ: ଆକ୍ଟର ସଞ୍ଜୟ ମିଶ୍ରାଙ୍କ ଅପକମିଂ ଫିଲ୍ମ ‘କାମୟାବ’କୁ ନେଇ ଏକ୍ସାଇଟେଡ ଦର୍ଶକ। ଏହି ଫିଲ୍ମରେ ଜଣେ ସହଯୋଗୀ ଅଭିନେତାଙ୍କ ସଂଘର୍ଷମୟ କାହାଣୀକୁ ଦେଖିବାକୁ ପାଇବେ ଦର୍ଶକ। ନିକଟରେ ଫିଲ୍ମର ଟ୍ରେଲର ରିଲିଜ କରାଯାଇଥିଲା। ଯାହାର ପ୍ରଶଂସା କରିବାରେ ବ୍ୟସ୍ତ ଦର୍ଶକଙ୍କ ସହ ବଲିଉଡ ଷ୍ଟାର୍ସ ମଧ୍ୟ। ଏହି କ୍ରମରେ ସାମିଲ ଅଛନ୍ତି ବି-ଟାଉନର ମିଷ୍ଟର ପରଫକ୍ସେନିଷ୍ଟ ଆମୀର ଖାନ। ସେ ମଧ୍ୟ ସଞ୍ଜୟଙ୍କୁ ଶୁଭକାମନା ଜଣାଇଛନ୍ତି।
ଫଟୋ ସୌଜନ୍ୟ: ଟ୍ବିଟର@ଆମୀର ଖାନ ରବିବାର ‘କାମୟାବ’ ଫିଲ୍ମ ଟ୍ରେଲରର ପ୍ରଶଂସା କରି ଟ୍ବିଟରରେ ଆମୀର, ସଞ୍ଜୟଙ୍କ ଫଟୋ ପୋଷ୍ଟ କରି କ୍ୟାପସନରେ ଲେଖିଥିଲେ, ‘ଆପଣଙ୍କୁ ବହୁତ ବହୁତ ଶୁଭକାମନା ସଞ୍ଜୟ ମିଶ୍ରା ଜି। ମତେ ଟ୍ରେଲର ଖୁବ୍ ପସନ୍ଦ ଆସିଲା। ଏହାପାଇଁ ଆଉ ଅଧିକ ଦିନ ଅପେକ୍ଷା କରି ହେବନାହିଁ।’
ସେପଟେ ତାଙ୍କୁ ଟ୍ବିଟର ଜବାବ ଦେଇ ସଞ୍ଜୟ ଲେଖିଛନ୍ତି, ‘ଆପଣ ସର୍ବଦା ଭଲ ଜିନିଷ ଉପରେ ନଜର ରଖିଥାଆନ୍ତି। ଏହା ଜାଣି ଖୁସି ଲାଗିଲା ଯେ ଆପଣଙ୍କୁ କାମୟାବର ଟ୍ରେଲର ପସନ୍ଦ ଆସିଛି। ଆପଣଙ୍କ ସପୋର୍ଟ ପାଇଁ ଧନ୍ୟବାଦ।’ ପ୍ରକାଶ ଥାଉକି ‘କାମୟାବ’ ଫିଲ୍ମକୁ ବିଶ୍ବ ସ୍ତରରେ ବିଭିନ୍ନ ଅନ୍ତରାଷ୍ଟ୍ରୀୟ ଫିଲ୍ମ ସମାରୋହରେ ପ୍ରଦର୍ଶିତ କରାଯାଇଛି। ଫିଲ୍ମକୁ ଦର୍ଶକଙ୍କ ଶାନଦାର ପ୍ରତିକ୍ରିୟା ମଧ୍ୟ ମିଳିଛି। ଫିଲ୍ମର ଖଟ୍ଟା-ମିଠା କାହାଣୀ ଫିଲ୍ମ ଟ୍ରେଲର ରିଲିଜ ହେବା ପରଠୁ ଚର୍ଚ୍ଚାର ବିଷୟ ପାଲଟିଛି।
ମନୀଷ ମୁନ୍ଦ୍ରାଙ୍କ ଦୃଶ୍ୟମ ଫିଲ୍ମସ ଓ ଶାହରୁଖ ଖାନଙ୍କ ପ୍ରଡକ୍ସନ ହାଉସ ରେଡ ଚିଲିଜ ଏଣ୍ଟରଟେନମେଣ୍ଟ ଦ୍ବାରା ନିର୍ମିତ ଏହି ଫିଲ୍ମ । ଆସନ୍ତା ଶୁକ୍ରବାର ରିଲିଜ ହେବାକୁ ଯାଉଛି ଏହି ଫିଲ୍ମ । ହାର୍ଦ୍ଧିକ ଗୁପ୍ତାଙ୍କ ଦ୍ବାରା ନିର୍ଦ୍ଦେଶିତ ଏହି ଫିଲ୍ମରେ ସଞ୍ଜୟଙ୍କ ସହ ଦୀପକ ଡୋବରିୟାଲ ଓ ସରିସ୍କା ସିଂ ମୁଖ୍ୟ ଭୂମିକାରେ ଦେଖାଯିବେ।
