ନୂଆଦିଲ୍ଲୀ: କଡ଼ା କାର୍ଯ୍ୟାନୁଷ୍ଠାନ ନେଲା ଲୋକପ୍ରିୟ ମେସେଜିଂ ଆପ୍ ହ୍ବାଟ୍ସଆପ୍ । ଚଳିତ ବର୍ଷ ଫେବୃଆରୀ ମାସରେ ଏହା ପ୍ରାୟ ୧ ଲକ୍ଷରୁ ଅଧିକ ଭାରତୀୟ ଆକାଉଣ୍ଟକୁ ବ୍ୟାନ କରିଛି । ନୂତନ ଆଇଟି ନିୟମାବଳୀ 2021 ଅନୁଯାୟୀ କିଛି କ୍ଷତିକାରକ ଆକାଉଣ୍ଟକୁ ନିଷିଦ୍ଧ କରିଛି । ତେବେ ଏ ସମ୍ପର୍କରେ ଗତ ଶୁକ୍ରବାର କମ୍ପାନୀ ପକ୍ଷରୁ ସୂଚନା ଦିଆଯାଇଛି । ଏହାପୂର୍ବରୁ ଜାନୁଆରୀ ମାସରେ ହ୍ବାଟସଆପ୍ 18 ଲକ୍ଷ 58 ହଜାର ଆକାଉଣ୍ଟ ଉପରେ ପ୍ରତିବନ୍ଧକ ଲଗାଇଥିଲା ।
କମ୍ପାନୀ କହିଛି ଯେ ଗୋଟିଏ ମାସ ମଧ୍ୟରେ ଏହା ଦେଶରୁ 335ଟି ଅଭିଯୋଗ ଗ୍ରହଣ କରିଛି ଏବଂ ସେଥିମଧ୍ୟରୁ 21 ଟି ଜାନୁଆରୀରେ କାର୍ଯ୍ୟ କରାଯାଇଛି । ଏ ନେଇ କମ୍ପାନୀ କହିଛି ଯେ ଫେବୃଆରୀ ୧ ତାରିଖରୁ ଫେବୃଆରୀ ୨୮ ତାରିଖ ମଧ୍ୟରେ ହ୍ବାଟସଆପ ବ୍ୟବହାରର ଦୁରୂପଯୋଗ କରୁଥିବା ଆକାଉଣ୍ଟକୁ ଖୋଜିବା ପାଇଁ ଏକ ସ୍ବତନ୍ତ୍ର ଫିଚରର ଉପଯୋଗ କରାଯାଇଥିଲା । ଏହା ପରେ ଅନେକ ଦୁରୂପଯୋଗ ଆକାଉଣ୍ଟ ପ୍ରକାଶ ପାଇଥିଲା । ଏହି ଆକାଉଣ୍ଟଗୁଡ଼ିକ ବିବାଦୀୟ କଣ୍ଟେଣ୍ଟକୁ ଅଧିକ ସେୟାର କରୁଥିବା ଦେଖିବାକୁ ମିଳିଥିଲା ।