ହାଇଦ୍ରାବାଦ: ଆଜି ଆନ୍ତର୍ଜାତିକ ଆଣବିକ ପରୀକ୍ଷଣ ବିରୋଧୀ ଦିବସ । ଆଣବିକ ପରୀକ୍ଷଣ ଜନିତ ବିସ୍ପୋରଣକୁ ରୋକିବା ଏବଂ ଏହାର ପ୍ରଭାବ ବିଷୟରେ ସର୍ବସାଧାରଣକୁ ଅବଗତ କରାଇବା ପାଇଁ ପ୍ରତିବର୍ଷ ଅଗଷ୍ଟ 29 ତାରିଖକୁ ଆନ୍ତର୍ଜାତିକ ଆଣବିକ ପରୀକ୍ଷଣ ବିରୋଧୀ ଦିବସ ଭାବେ ପାଳନ କରାଯାଏ । ଆଣବିକ ମୁକ୍ତ ବିଶ୍ବ କରିବା ପାଇଁ ଲକ୍ଷ୍ୟ ରଖାଯାଇଛି ।
ଆନ୍ତର୍ଜାତିକ ଆଣବିକ ପରୀକ୍ଷଣ ବିରୋଧୀ ଦିବସର ଇତିହାସ:
- 1991 ମସହି ଅଗଷ୍ଟ 29 ତାରିଖରେ କାଜାଖସ୍ତାନ ସରକାର ସ୍ବଦେଶରେ ଥିବା ସେମିପାଲାଟିନସ୍କ୍ ଆଣବିକ ପରୀକ୍ଷା ସ୍ଥଳୀକୁ ବନ୍ଦ କରିଥିଲେ । ବିଶ୍ବର ଅନ୍ୟ ରାଷ୍ଟ୍ରମାନେ ଅନୁରୂପ ପଦକ୍ଷେପ ନେବା ଉପରେ ମଧ୍ୟ ଗୁରୁତ୍ବାରୋପ କରାଯାଇଥିଲା । ଏହାପରେ 2009 ମସିହାରେ ମିଳିତ ଜାତିସଂଘ ସାଧାରଣ ପରିଷଦର 64ତମ ଅଧିବେଶନରେ ସେମିପାଲାଟିନସ୍କ୍ କେନ୍ଦ୍ରର ବନେଦ ଦିବସକୁ ମନେ ରଖିବା ପାଇଁ ଅଗଷ୍ଟ 29 ତାରିଖକୁ ଆନ୍ତର୍ଜାତିକ ଆଣବିକ ପରୀକ୍ଷଣ ବିରୋଧୀ ଦିବସ ଭାବେ ପାଳନ କରିବା ପାଇଁ ଘୋଷଣା କରାଯାଇଥିଲା ।
- ଏକ ସୁରକ୍ଷିତ ବିଶ୍ୱ ପାଇଁ ଆଣବିକ ଅସ୍ତ୍ର ପରୀକ୍ଷା ଉପରେ ନିଷେଧାଦେଶର ଆବଶ୍ୟକତାକୁ ଅବଗତ କରାଇବା ପାଇଁ ଏହି ଦିବସ ଉଦ୍ଦିଷ୍ଟ ।
- ମିଳିତ ଜାତିସଂଘ, ସଦସ୍ୟ ରାଷ୍ଟ୍ର, ଆନ୍ତ-ସରକାରୀ ତଥା ବେସରକାରୀ ସଂଗଠନ, ଏକାଡେମିକ୍ ଅନୁଷ୍ଠାନ ଏବଂ ଗଣମାଧ୍ୟମ ଅନୁଷ୍ଠାନ ପକ୍ଷରୁ ଏହି ଦିବସ ପାଳନ କରାଯାଇଥାଏ ।
ଦିବସର ମହତ୍ତ୍ବ:
- ଆନ୍ତର୍ଜାତିକ ଆଣବିକ ପରୀକ୍ଷଣ ବିରୋଧୀ ଦିବସ ପରମାଣୁ ଯୁଦ୍ଧ ଏବଂ ଏହାର ବିପର୍ଯ୍ୟୟ ପରିଣାମକୁ ରୋକିବା ପାଇଁ ଏହି ଦିବସ ପାଳନ କରାଯାଏ ।
- ବିଶ୍ବବ୍ୟାପୀ ଶାନ୍ତି ଓ ସୁରକ୍ଷାକୁ ପ୍ରୋତ୍ସାହିତ କରିବା ସହିତ ପରମାଣୁ ଅସ୍ତ୍ର ମୁକ୍ତ ବିଶ୍ବର ଲକ୍ଷ୍ୟ ହାସଲର ଆବଶ୍ୟକତା ଉପରେ ଗୁରୁତ୍ବାରୋପ କରାଯାଉଛି ।
- ଆଣବିକ ପରୀକ୍ଷଣ ଦ୍ବାରା ମାନବ ସମାଜ ସହିତ ପରିବେଶ ଏବଂ ଜୀବଜଗତର କ୍ଷତି ହୋଇଥାଏ । ଜଳବାୟୁ, ମୃତ୍ତିକା ଏବଂ ଜଳ ମଧ୍ୟ ପ୍ରଦୂଷଣ ହୋଇଥାଏ ।
- ମହିଳା ଏବଂ ଶିଶୁମାନଙ୍କ ସ୍ବାସ୍ଥ୍ୟ ଉପରେ ମଧ୍ୟ ଏହାର ଖରାପ ପ୍ରଭାବ ପଡିଥାଏ ।