ହାଇଦ୍ରାବାଦ:ଭାରତର ମୁନ ମିଶନ ଇତିହାସ ରଚିବା ପାଇଁ ଆଉ ମାତ୍ର ଅଳ୍ପ ଦୂରରେ ରହିଛି। ବର୍ତ୍ତମାନ ମୁନ ମିଶନ ଚନ୍ଦ୍ରାୟନ ଉପରେ ସମଗ୍ର ବିଶ୍ୱବାସୀଙ୍କ ନଜର ରହିଛି। ସଫ୍ଟ ଲ୍ୟାଣ୍ଡିଂ ପାଇଁ ପ୍ରୟାସ ଜାରି ରଖିଛି ଇସ୍ରୋ। ଏହାରି ଭିତରେ ଇସ୍ରୋ ପକ୍ଷରୁ ଏକ ନୂଆ ଭିଡିଓ ଜାରି କରାଯାଇଛି। ଇସ୍ରୋ ପକ୍ଷରୁ ଏକ୍ସରେ ପୋଷ୍ଟ କରି କୁହାଯାଛି ଯେ, "କାର୍ଯ୍ୟସୂଚୀ ଅନୁସାରେ ଆଗକୁ ବଢି ଚାଲିଛି ଚନ୍ଦ୍ରଯାନ-3 । ସିଷ୍ଟମ ମଧ୍ୟ ନିୟମିତ ଯାଞ୍ଚ କରାଯାଉଛି। ସଫ୍ଟ ଲ୍ୟାଣ୍ଡିଂ କରିବ ଚନ୍ଦ୍ରଯାନ-3 । ଲ୍ୟାଣ୍ଡିଂ ଅପରେସନର ସିଧାପ୍ରସାରଣ ଆସନ୍ତାକାଲି(ବୁଧବାର) ସନ୍ଧ୍ୟା 5ଟା 20 ମିନିଟରୁ ଆରମ୍ଭ ହେବ। ଇତିହାସ ସୃଷ୍ଟି କରିବା ପାଇଁ ଭାରତର ଚନ୍ଦ୍ର ମିଶନ ଚନ୍ଦ୍ରୟାନ -3 ଅଳ୍ପ ଦୂରରେ।" ବିକ୍ରମ ଲ୍ୟାଣ୍ଡରରେ ଲାଗିଥିବା ଲ୍ୟାଣ୍ଡର୍ ପୋଜିସନ୍ ଡିଟେକସନ୍ କ୍ୟାମେରା (LPDC) ଦ୍ୱାରା 19 ଅଗଷ୍ଟ 2023 ରେ ନିଆଯାଇଥିବା କିଛି ଚିତ୍ର ମଧ୍ୟ ଇସ୍ରୋ ପକ୍ଷରୁ ସେୟାର କରାଯାଇଛି। ଚନ୍ଦ୍ରଠାରୁ 70 କିମି ଦୂରରେ ଏହି ଫଟୋ ନିଆଯାଇଥିବା ନେଇ ଇସ୍ରୋ ପକ୍ଷରୁ ସୂଚନା ଦିଆଯାଇଛି।
ସଫ୍ଟ ଲ୍ୟାଣ୍ଡିଂ ନେଇ ଇସ୍ରୋର ଦୃଢୋକ୍ତି:ଚନ୍ଦ୍ରଯାନ-3କୁ ସଫଳତାର ସହ ଲ୍ୟାଣ୍ଡିଂ କରାଇ ଇତିହାସ ରଚିବା ଲକ୍ଷ୍ୟରେ ଇସ୍ରୋ । ଏକ ମିଡିଆ ରିପୋର୍ଟ ଅନୁସାରେ, ଚନ୍ଦ୍ରଯାନ-3କୁ ନେଇ ସୋମନାଥ କହିଛନ୍ତି , "ସଫ୍ଟ ଲ୍ୟାଣ୍ଡିଂକୁ ନେଇ ଆମେ ଆଶା କରୁଛୁ। ବର୍ତ୍ତମାନ ସୁଦ୍ଧା ସମସ୍ତ କାର୍ଯ୍ୟ ଠିକ ଭାବେ ହେଉଥିବାରୁ ଆମେ ଆଶା ରଖିଛୁ। ବର୍ତ୍ତମାନ ସୁଦ୍ଧା କୌଣସି ଅସୁବିଧାର ସାମ୍ନା କରିନାହୁଁ। ଆମେ ପୁରା ପ୍ରସ୍ତୁତ ରହିଛୁ। ସିଷ୍ଟମ ଉପରେ ମଧ୍ୟ ନଜର ରହିଛି। ବର୍ତ୍ତମାନ ଆମେ ରିମ୍ୟୁଲେସନ୍ସ, ଭେରିଫିକେସୱ ଏବଂ ସିଷ୍ଟମର ଡବଲ ଭେରିଫିକେସନ ସହିତ ଲ୍ୟାଣ୍ଡିଂ ପ୍ରକ୍ରିୟା ଆରମ୍ଭ କରିଛୁ। କାଲି ସିଷ୍ଟମର ଯାଞ୍ଚ କରାଯାଇଥିବା ବେଳେ ଆଜି ମଧ୍ୟ ସମସ୍ତ ପ୍ରକାର ଯାଞ୍ଚ କରାଯାଇଛି।"