ହାଇଦ୍ରାବାଦ: ଆଉ ଏକ ସଫଳତା ହାତେଇଲା ଭାରତୀୟ ମହାକାଶ ଗବେଷଣା ସଂସ୍ଥା(ଇସ୍ରୋ)। ଭାରତର ସୂର୍ଯ୍ୟ ମିଶନକୁ ମିଳିଲା ବଡ ସଫଳତା। ଗନ୍ତବ୍ୟସ୍ଥଳ ଏଲ 1 ପଏଣ୍ଟରେ(ହାଲୋ ଅର୍ବିଟରେ) ପହଞ୍ଚିଲା ସୂର୍ଯ୍ୟ ମିଶନ ଆଦିତ୍ୟ-L1। ଶ୍ରୀହରିକୋଟାସ୍ଥିତ ସତୀଶ ଧାଓ୍ବନ ମହାକାଶ କେନ୍ଦ୍ରରୁ ଗତ ସେପ୍ଟେମ୍ବର 2 ତାରିଖରେ ଆଦିତ୍ୟ ଏଲ1କୁ ମହାକାଶକୁ ଉତକ୍ଷେପଣ କରାଯାଇଥିବା ବେଳେ ଧାର୍ଯ୍ୟ ସମୟ ଅନୁସାରେ ଆଜି ୧୫ ଲକ୍ଷ କିଲୋମିଟର ଦୂର ହାଲୋ ଅର୍ବିଟରେ ପହଞ୍ଚିଲା ଆଦିତ୍ୟ ଏଲ 1। ଏନେଇ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଟ୍ବିଟ କରି ସୂଚନା ଦେଇଛନ୍ତି। ନିଜ ଏକ୍ସ ହ୍ୟାଣ୍ଡେଲରେ ଟ୍ବିଟ କରି ସୂଚନା ଦେଇଛନ୍ତି।
ପ୍ରଧାନମନ୍ତ୍ରୀ ମୋଦି ଟ୍ବିଟ ଭାରତୀୟ ବୈଜ୍ଞାନିକଙ୍କୁ ଶୁଭେଚ୍ଛା ଜଣାଇ କହିଛନ୍ତି, "ଭାରତ ଆଉ ଏକ ଉପଲବ୍ଧି ହାସଲ କରିଛି। ଭାରତର ପ୍ରଥମ ସୌର ମିଶନ ଆଦିତ୍ୟ ଏଲ 1 ନିଜର ଗନ୍ତବ୍ୟସ୍ଥଳରେ ପହଞ୍ଚିଛି। ସବୁଠାରୁ ଜଟିଳ ଅନ୍ତରୀକ୍ଷ ଅଭିଯାନକୁ ସଫଳ କରିଛନ୍ତି ଆମ ବୈଜ୍ଞାନିକ। ମିଶନର ସଫଳକା ପାଇଁ ବୈଜ୍ଞାନିକମାନଙ୍କର ସମର୍ପଣର ଏହା ଏକ ପ୍ରମାଣ ଅଟେ। ଏହି ସଫଳତା ପରେ ଭାରତ ଆଉ ଏକ ମାଇଲଖୁଣ୍ଡ ଅତିକ୍ରମ କରିଲା। ଏହି ଅସାଧାରଣ ସଫଳତା ପାଇଁ ସେମାନେ ପ୍ରଶଂସାର ଯୋଗ୍ୟ ଅଟନ୍ତି। ମାନବଜାତିର ହିତ ପାଇଁ ବିଜ୍ଞାନକୁ ଆଗକୁ ବଢାଇବା ପାଇଁ ଆମେ ପ୍ରୟାସ ଜାରି ରଖିବୁ।"
ଏହା ମଧ୍ୟ ପଢନ୍ତୁ: ସୂର୍ଯ୍ୟରେ ବିଜୟ ଧ୍ବଜା ଉଡାଇବ ଇସ୍ରୋ, ଆଜି ହାଲୋ ଅର୍ବିଟରେ ପହଞ୍ଚିବ ଆଦିତ୍ୟ-L1