ହାଇଦ୍ରାବାଦ:ଇତିହାସ ରଚିବାକୁ ଯାଉଛି ଇସ୍ରୋର ମୁନ୍ ମିଶନ । ଭାରତୀୟ ମହାକାଶ ଗବେଷଣା ସଂସ୍ଥା(ଇସ୍ରୋର) ଚନ୍ଦ୍ରକୁ ଛୁଇଁବାର ଆଶା ଉଜ୍ଜିବୀତ ହେବାରେ ଲାଗିଛି । ସଫ୍ଟ୍ ଲ୍ୟାଣ୍ଡିଂ ପାଇଁ ଆଉ ଦୁଇ ଦିନର ଅପେକ୍ଷା ରହିଥିବା ବେଳେ ବିଶ୍ବବାସୀଙ୍କ ନଜର ଏବେ ଚନ୍ଦ୍ରଯାନ-3 ଉପରେ ରହିଛି । ଭାରତର ଦ୍ବିତୀୟ ମୁନ୍ ମିଶନ ଚନ୍ଦ୍ରଯାନ-2 ସଫ୍ଟ ଲ୍ୟାଣ୍ଡିଂ ସଫଳ ହୋଇ ପାରିନଥିଲା । ବର୍ତ୍ତମାନ ଚନ୍ଦ୍ରଯାନ-3 ଚନ୍ଦ୍ର ଦକ୍ଷିଣ ମେରୁରେ ସଫଳ ଲ୍ୟାଣ୍ଡିଂ କରିବ ବୋଲି ଆଶା ରଖା ଯାଇଛି । ତେବେ ଏହାରି ଭିତରେ ଚନ୍ଦ୍ରଯାନ-3ର ଲ୍ୟାଣ୍ଡରକୁ ଚନ୍ଦ୍ରଯାନ-2ର ଅର୍ବିଟର ସ୍ବାଗତ କରିଥିବା ନେଇ ଇସ୍ରୋ ପକ୍ଷରୁ ଟ୍ବିଟ ଯୋଗେ ସୂଚନା ଦିଆଯାଇଛି । କହି ରଖୁଛୁ କି ଚନ୍ଦ୍ରଯାନ-2ର ଅର୍ବିଟର ମଡ୍ୟୁଲଟି ବର୍ତ୍ତମାନ ସୁଦ୍ଧା ମଧ୍ୟ ଚନ୍ଦ୍ରକକ୍ଷରେ ସକ୍ରିୟ ରହିଛି ।
ଇସ୍ରୋ ପକ୍ଷରୁ ଟ୍ବିଟ କରି ସୂଚନା ଦିଆଯାଇଛି ଯେ, "ଚନ୍ଦ୍ରଯାନ-3ର ଲ୍ୟାଣ୍ଡରକୁ ଚନ୍ଦ୍ରଯାନ-2ର ଅର୍ବିଟର ସ୍ବାଗତ କରିଛି । ଚନ୍ଦ୍ରଯାନ-2ର ଅର୍ବିଟର ଏବଂ ଚନ୍ଦ୍ରଯାନ-3ର ଲ୍ୟାଣ୍ଡର ମଧ୍ୟରେ ଟୁ ଓ୍ବେ କମ୍ୟୁନିକେସନ ସ୍ଥାପିତ ହୋଇଛି । ଚନ୍ଦ୍ରଯାନ-3ର ଲ୍ୟାଣ୍ଡର ମଡ୍ୟୁଲ(ଏଲଏମ) ପାଇଁ ଏବେ ଦୁଇଟି ପଥ ରହିଛି । ବୁଧବାର ସନ୍ଧ୍ୟା 5ଟା 20 ମିନିଟରୁ ସିଧା ପ୍ରସାରଣ ଆରମ୍ଭ ହେବ।"
ଆସନ୍ତା 23 ତାରିଖ ସନ୍ଧ୍ୟା 6ଟା 4 ମିନିଟରେ ଚନ୍ଦ୍ରଯାନ-3 ଚନ୍ଦ୍ରପୃଷ୍ଠରେ ସଫ୍ଟ ଲ୍ୟାଣ୍ଡିଂ କରିବା ନେଇ ଆକଳନ କରାଯାଇଛି । ତେବେ ଭାରତର ବହୁ ପ୍ରତୀକ୍ଷିତ ମୁନ୍ ମିଶନ ଚନ୍ଦ୍ରଯାନ-3ର ସିଧାପ୍ରସାରଣ ଅଗଶ୍ଟ 23 ତାରିଖ ସନ୍ଧ୍ୟା 5ଟା 20 ମିନିଟରୁ ଆରମ୍ଭ ହେବ। ଇସ୍ରୋର ଓ୍ବେବସାଇଟ, ୟୁଟ୍ୟୁବ ଚ୍ୟାନେଲ, ଫେସବୁକ ଏବଂ ଦୂରଦର୍ଶନ ଚ୍ୟାନେଲରେ ସିଧାପ୍ରସାରଣ ଦେଖିପାରିବେ ।
ଏହା ମଧ୍ୟ ପଢନ୍ତୁ:Soft Landing: 'ଚନ୍ଦ୍ରଯାନ-୩କୁ ମିଳିବ ବିରାଟ ସଫଳତା'