କିଭ:ପୁଣି ଆକ୍ରମଣକୁ ଜୋରଦାର କରିଛି ଋଷ । ବୁଧବାର ପୁଣି ୟୁକ୍ରେନର ରାଜଧାନୀ କିଭ୍ ଉପରେ ଋଷ ସେନାର ମିସାଇଲ ମାଡ଼ କରିଛି । ଏଥିରେ 3 ଜଣଙ୍କ ମୃତ୍ୟୁ ହୋଇଥିବା ବେଳେ 6 ଜଣ ଆହତ ହୋଇଛନ୍ତି । ଏକାଧିକ ଗୁରୁତ୍ୱପୂର୍ଣ୍ଣ ପ୍ରତିଷ୍ଠାନ ମିସାଇଲ ମାଡ଼ରେ କ୍ଷତିଗ୍ରସ୍ତ ହୋଇଥିବା ନେଇ କହିଛନ୍ତି କିଭ ମେୟର । ଏହାକୁ ନେଇ ସ୍ଥାନୀୟ ଲୋକଙ୍କ ମଧ୍ୟରେ ଆତଙ୍କ ଖେଳି ଯାଇଛି । ଲୋକମାନଙ୍କୁ ସହର ଛାଡି ଏୟାର ରେଡ ଆଶ୍ରୟସ୍ଥଳୀରେ ରହିବାକୁ ପରାମର୍ଶ ଦିଆଯାଇଛି । ପୂର୍ବରୁ ମଧ୍ୟ ଋଷ ସେନା କିଭ୍ର କିଛି ସ୍ଥାନରେ ମିସାଇଲ ମାଡ଼ କରି ବ୍ୟାପକ କ୍ଷୟକ୍ଷତି ଘଟାଇଥିଲେ ।
ଏହା ମଧ୍ୟ ପଢନ୍ତୁ: ବଲିଉଡ ଅଭିନେତା ବିକ୍ରମ ଗୋଖଲେଙ୍କ ପରଲୋକ
ୟୁକ୍ରେନର ପ୍ରଥମ ଡେପୁଟି ବୈଦେଶିକ ମନ୍ତ୍ରୀ ଇମିନେ ଡଝେପାର ଟ୍ୱିଟ କରି କହିଛନ୍ତି," ୟୁକ୍ରେନର କିଭ ସମେତ ଅନେକ ସହରରେ ଋଷସେନା ମିସାଇଲ ମାଡ କରିଛନ୍ତି । ଏହି ମିସାଇଲ ମାଡରେ ଅନେକ ପ୍ରତିଷ୍ଠାନ ଧ୍ବଂସ ହୋଇଯାଇଛି । ଫଳରେ ସହରରେ ବିଜୁଳି ସମସ୍ୟା ଦେଖାଯାଇଛି । ସହରର ଅନେକ ଲୋକ ଅନ୍ଧାରରେ ରହିଛନ୍ତି ।"