ତାଞ୍ଜାନିଆର ଏକ ଖଣିରେ ଭୂସ୍ଖଳନ, 22 ମୃତ

Tanzania landslide: ତାଞ୍ଜାନିଆର ବାରିଆଡି ଜିଲ୍ଲାର ଏକ ଖଣିରେ ଭୂସ୍ଖଳନ ହେବାରୁ 22 ଜଣଙ୍କର ମୃତ୍ୟୁ । ଅଧିକ ପଢନ୍ତୁ

ଡୋଡୋମା:ତାଞ୍ଜାନିଆରେ ଭୂସ୍ଖଳନ । ବାରିଆଡି ଜିଲ୍ଲାର ଏକ ଖଣିରେ ଭୟଙ୍କର ଭୂସ୍ଖଳନ ହେବାରୁ 22 ଜଣଙ୍କର ମୃତ୍ୟୁ ହୋଇଥିବା ସ୍ଥାନୀୟ ଗଣମାଧ୍ୟମ ରିପୋର୍ଟ କରିଛି । ସମସ୍ତ ମୃତଦେହ ଉଦ୍ଧାର କରାଯାଇଥିବା ବେଳେ ବର୍ତ୍ତମାନ ସୁଦ୍ଧା କେତେ ନିଖୋଜ ଅଛନ୍ତି ସେନେଇ କିଛି ସ୍ପଷ୍ଟ ସୂଚନା ମିଳିପାରିନାହିଁ । ଜାନୁଆରୀ 13 ତାରିଖରେ ହଠାତ୍‌ ଖଣିରେ ଭୂସ୍ଖଳନ ହୋଇଥିଲା । 2ଦିନ ଧରି ଉଦ୍ଧାର କାର୍ଯ୍ୟ ଜାରି ରହିଥିଲା ।

ସିମିୟୁ ଆଞ୍ଚଳିକ ଅଗ୍ନିଶମ ଏବଂ ଉଦ୍ଧାରକାରୀ ଟିମର କମାଣ୍ଡର ଫୌ ଷ୍ଟାଇନ୍ ମିତ୍ତୁ ସାମ୍ବାଦିକମାନଙ୍କ ସହ କଥାବାର୍ତ୍ତା ସମୟରେ କହିଛନ୍ତି ଯେ, ଜାନୁଆରୀ 13ରେ ସ୍ଥାନୀୟ ସମୟ ସକାଳ 11 ଟାରେ ବାରିଆଡି ଜିଲ୍ଲାର ଏକ ଖଣିରେ ଭୂସ୍ଖଳନ ହୋଇଥିଲା । ଏହା ପରେ ସଙ୍ଗେ ସଙ୍ଗେ ଉଦ୍ଧାର କାର୍ଯ୍ୟ ଆରମ୍ଭ ହୋଇଥିଲା । 2 ଦିନ ଧରି ଉଦ୍ଧାର କାର୍ଯ୍ୟ ଜାରି ରହିବା ପରେ 22 ଜଣଙ୍କ ମୃତଦେହ ଉଦ୍ଧାର କରାଯାଇଥିଲା । ଏହି ଘଟଣାରେ ତାଞ୍ଜାନିଆର ରାଷ୍ଟ୍ରପତି ସାମିଆ ସୁଲୁହୁ ହାସନ ମଧ୍ୟ ଦୁଃଖ ପ୍ରକାଶ କରିଛନ୍ତି ।

ରାଷ୍ଟ୍ରପତି କହିଛନ୍ତି, ‘‘ବାରିଆଡି ଜିଲ୍ଲାର ଏକ ଖଣିରେ ଭୂସ୍ଖଳନ ପରେ 22 ଜଣଙ୍କର ମୃତ୍ୟୁ ହୋଇଛି । ଏହି ଖବର ଶୁଣି ମୁଁ ଦୁଃଖିତ । ଆମର ପ୍ରତିରକ୍ଷା ଏବଂ ସୁରକ୍ଷା ଏଜେନ୍ସି ଉଦ୍ଧାର କାର୍ଯ୍ୟରେ ନିୟୋଜିତ ରହିଛନ୍ତି । ବର୍ତ୍ତମାନ ଖଣିଟିକୁ ବନ୍ଦ କରାଯାଇଛି ।’’

ଅନ୍ୟପଟେ ଶୁକ୍ରବାର ଦିନ କଲମ୍ବିଆର ପାର୍ବତ୍ୟାଞ୍ଚଳରେ ପାହାଡ ଧସିବାରୁ 34 ଜଣଙ୍କର ମୃତ୍ୟୁ ହୋଇଥିଲା । କୁଦିବୋ ଓ ମେଡେଲିନ ସହରର ମଧ୍ୟରେ ଥିବା ଏକ ପାହାଡ ଧସିଥିଲା । ଯାହା ଫଳରେ 34 ଜଣଙ୍କର ମୃତ୍ୟୁ ହୋଇଥିବା ବେଳେ ଅନେକ ଆହତ ହୋଇଥିଲେ । ମୃତକଙ୍କ ମଧ୍ୟରେ ଅନେକ ଶିଶୁ ମଧ୍ୟ ରହିଛନ୍ତି । ବର୍ତ୍ତମାନ ପର୍ଯ୍ୟନ୍ତ 14 ଜଣଙ୍କର ମୃତଦେହ ଉଦ୍ଧାର କରାଯାଇଥିବା କଲମ୍ବିଆ ବିପର୍ଯ୍ୟୟ ପ୍ରଶମନ ଅଧିକାରୀ ସୂଚନା ଦେଇଛନ୍ତି । ଉଦ୍ଧାର କାର୍ଯ୍ୟ ଏବେ ବି ଜାରି ରହିଛି । ପ୍ରବଳ ବର୍ଷା ହେବା କାରଣରୁ ପାହାଡ ଧସିଥିବା କୁହାଯାଉଛି ।