ମସ୍କୋ:ଋଷ-ୟୁକ୍ରେନ ମଧ୍ୟରେ ଲାଗି ରହିଥିବା ଯୁଦ୍ଧ କ୍ରମିଆ ପୋଲ ବିସ୍ଫୋରଣ ପରେ ପୁଣି ଥରେ ଉଗ୍ର ମୋଡ ନେବାରେ ଲାଗିଛି (Russia US counterpart discuss Ukraine situation)। ଏହାରି ମଧ୍ୟରେ ଏବେ ଅନ୍ତର୍ଜାତୀୟ ସମ୍ପର୍କ ଓ ସମୀକରଣ ପୁଣି ଥରେ ବଦଳିବାରେ ଲାଗିଛି । ଆଜି ଋଷର ପ୍ରତିରକ୍ଷା ମନ୍ତ୍ରୀ ନିଜ ଆମେରିକା ପ୍ରତିପକ୍ଷଙ୍କ ସହ କଥା ହେବା ସହ ୟୁକ୍ରେନ ସଙ୍କଟର ସାମ୍ପ୍ରତିକ ସ୍ଥିତି ନେଇ ଆଲୋଚନା କରିଛନ୍ତି । ଏହି କଥାବାର୍ତ୍ତା ନେଇ ଋଷର ବୈଦେଶିକ ମନ୍ତ୍ରଣାଳୟ ପକ୍ଷରୁ ସୂଚନା ମିଳିଛି ।
ଏନେଇ କିଛି ଅନ୍ତର୍ଜାତୀୟ ଗଣମାଧ୍ୟମରେ ମଧ୍ୟ ରିପୋର୍ଟ ପ୍ରକାଶ ପାଇଛି । ଋଷ ବୈଦେଶିକ ମନ୍ତ୍ରଣାଳୟର ସୂଚନା ଅନୁସାରେ କେବଳ ଏହି ଦ୍ବିପାକ୍ଷିକ କଥାବାର୍ତ୍ତା ଆମେରିକା ସହ ନୁହେଁ ବରଂ ଫ୍ରାନ୍ସ ଏବଂ ତୁର୍କୀ ପ୍ରତିପକ୍ଷଙ୍କ ସହ ମଧ୍ୟ କରିଛନ୍ତି ଋଷ୍ ପ୍ରତିରକ୍ଷା ମନ୍ତ୍ରୀ । ତେବେ ଆମେରିକା ସମେତ ଅନ୍ୟ କିଛି ପଶ୍ଚିମ ରାଷ୍ଟ୍ର ୟୁକ୍ରେନକୁ ଆର୍ଥିକ ଓ ସାମରିକ ସହାୟତା ଯୋଗାଣ ଜାରି ରଖିବା ସହ ଯୁଦ୍ଧକୁ ଆହୁରି ଜଟିଳ କରିବା ପାଇଁ ପ୍ରାୟସ କରୁଥିବା ନେଇ ମସ୍କୋ ଅଭିଯୋଗ କରିଆସୁଛି । ଆମେରିକା ଓ ଅନ୍ୟ ନାଟୋ ସଦସ୍ୟ ରାଷ୍ଟ୍ର ମସ୍କୋର ଏପରି ଅଭିଯୋଗକୁ ଖଣ୍ଡନ କରି ଆସିଛନ୍ତି ।