ହାଇଦ୍ରାବାଦ: ପାଲେଷ୍ଟାଇନ ଆତଙ୍କବାଦୀଙ୍କ ଭୟଙ୍କର ଆକ୍ରମଣ ପରେ ଗାଜା ଉପରେ ଆକ୍ରମଣ ଜାରି ରଖିଛି ଇସ୍ରାଏଲ ସେନା । ତେବେ ଗତକାଲି ସକାଳୁ ଆରମ୍ଭ ହୋଇଥିବା ଏହିି ଆକ୍ରମଣ ଓ ପ୍ରତି ଆକ୍ରମଣରେ ବର୍ତ୍ତମାନ ସୁଦ୍ଧା ଉଭୟ ପକ୍ଷରୁ ପ୍ରାୟ ୧ ହଜାରରୁ ଅଧିକ ଲୋକଙ୍କ ପ୍ରାଣହାନୀ ଘଟିଥିବା ସୂତ୍ର ଆଶଙ୍କା ପ୍ରକାଶ ପାଇଛି । ଏବେ ସୁଦ୍ଧା ସାମ୍ନାକୁ ଆସିଥିବା ମୃତାହତଙ୍କ ସଂଖ୍ୟାଠାରୁ ପ୍ରକୃତ ସଂଖ୍ୟା ଢେର ଅଧିକ ହେବା ନେଇ ଅନେକ ସଂସ୍ଥା ଆଶଙ୍କା ପ୍ରକାଶ କରିଛନ୍ତି । ତେବେ ଏବେ ମଧ୍ୟ ଆକ୍ରମଣ ଜାରି ରହିଥିବା କାରଣରୁ ମୃତାହତଙ୍କ ସଂଖ୍ୟା ଆହୁରି ମଧ୍ୟ ବଢିବାର ଯଥେଷ୍ଟ ଆଶଙ୍କା ରହିଛି ।
ସୂତ୍ରରୁ ମିଳିଥିବା ସୂଚନା ଅନୁସାରେ, ଇସ୍ରାଏଲରେ ଅଧିକ ମୃତାହତଙ୍କ ସଂଖ୍ୟା ରହିଛି । ଏବେ ସୁଦ୍ଧା ଇସ୍ରାଏଲରେ ପ୍ରାୟ ୬୦୦ ଲୋକଙ୍କ ମୃତ୍ୟୁ ହୋଇଥିବା ସହ ହଜାରରୁ ଅଧିକ ଲୋକେ ଆହତ ହୋଇଛନ୍ତି । ସେହିପରି ଇସ୍ରାଏଲ ଗତକାଲି ଠାରୁ ପାଲେଷ୍ଟାଇନ ନିୟନ୍ତ୍ରଣାଧୀନ ଗାଜା ଷ୍ଟ୍ରିପ ଉପରେ ଘନ ଘନ ଆକ୍ରମଣ ଜାରି ରଖିଛି । ଏଥିରେ ପ୍ରାୟ ୪୦୦ ପାଲେଷ୍ଟାଇନ ନାଗରିକଙ୍କ ମୃତ୍ୟୁ ହୋଇଥିବା ସନ୍ଦେହ ପ୍ରକାଶ ପାଇଛି । ସେହିପରି ୧୭ ଶହରୁ ଅଧିକ ପାଲେଷ୍ଟାଇନ ନାଗିରକ ଆହତ ମଧ୍ୟ ହୋଇଛନ୍ତି ।
ଗତକାଲି (ଶନିବାର) ସକାଳେ ଗାଜା ପଟିରୁ ଆତଙ୍କୀ ସଂଗଠନ ‘ହମାସ’ ଇସ୍ରାଏଲ ଉପରେ ଅତର୍କିତ ଆକ୍ରମଣ କରିଥିଲା । ମାତ୍ର ୨୦ ମିନିଟ ମଧ୍ୟରେ ଗାଜାରୁ ଇସ୍ରାଏଲ ଅଞ୍ଚଳକୁ ପ୍ରାୟ ୫ ହଜାରରୁ ଅଧିକ ରକେଟ ମାଡ କରାଯାଇଥିଲା । ଏହା ଇସ୍ରାଏଲୀ ଗୁଇନ୍ଦା ବିଭାଗର ବିଫଳତା ବୋଲି ମଧ୍ୟ ଚର୍ଚ୍ଚା ହୋଇଛି । ବ୍ୟାପକ ରକେଟ ମାଡରେ ଭୟଙ୍କର ଭାବେ ଇସ୍ରାଏଲ କ୍ଷତିଗ୍ରସ୍ତ ହୋଇଥିଲା । ତୁରନ୍ତ ଜବାବ ଦେବାକୁ ଯାଇ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ ଯୁଦ୍ଧ ଘୋଷଣା କରିଥିଲେ ।