ହାଇଦ୍ରାବାଦ:ଗାଜା ସ୍ଥିତ ଏକ ହସ୍ପିଟାଲ ଉପରେ ଆକ୍ରମଣରେ ପ୍ରାୟ 5 ଶହ ନାଗରିକଙ୍କ ମୃତ୍ୟୁ ହେବା ଘଟଣାରେ ଏବେ ନୂଆ ମୋଡ । ଗତକାଲିଠାରୁ ଏହି ଆକ୍ରମଣକୁ ଖଣ୍ଡନ କରିଆସିଥିବା ଇସ୍ରାଏଲ ସେନା ଆଜି ଡିଜିଟାଲ ପ୍ରମାଣ ସହ ଏହା ‘ହମାସ’ ଆତଙ୍କୀ ଗୋଷ୍ଠୀଙ୍କ ଦ୍ବାରା ହୋଇଥିବା ଦାବି ଦୋହରାଇଛି । ଇସ୍ରାଏଲ ଡିଫେନ୍ସ ଫୋର୍ସ (ଆଇଡିଏଫ) ଆଜି ଆକ୍ରମଣ ସମ୍ପର୍କରେ ଏକ ଅଡିଓ କ୍ଲିପ ଜାରି କରିଛି । ଯେଉଁଥିରେ ଏହି ରକେଟ ଆଟାକ ‘ହମାସ’ ଦ୍ବାରା କରାଯାଇଥିବା ଦୁଇ ଜଣ ହମାସ ଆତଙ୍କୀ କଥା ହେଉଥିବା ଇସ୍ରାଏଲ ପକ୍ଷରୁ ଦାବି କରାଯାଇଛି ।
ଅନ୍ୟପଟେ ଆଜି ଟେଲ-ଆଭିଭରେ ପହଞ୍ଚିଥିବା ଆମେରିକା ରାଷ୍ଟ୍ରପତି ଜୋ ବାଇଡେନ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁଙ୍କ ସହ ଆଲୋଚନା କରିଛନ୍ତି । ଇସ୍ରାଏଲକୁ ସମର୍ଥନ ଘୋଷଣା କରିବା ସହ ଗାଜାର ହସ୍ପିଟାଲ ଉପରେ ହୋଇଥିବା ଆକ୍ରମଣ ଇସ୍ରାଏଲ ସେନା ନୁହେଁ ବରଂ ଅନ୍ୟ ଗୋଷ୍ଠୀ ଦ୍ବାରା ହୋଇଥିବା ବାଇଡେନ କହିଛନ୍ତି । ଗାଜା ହସ୍ପିଟାଲ ଆକ୍ରମଣରେ ବାଇଡେନ ଶୋକ ମଧ୍ୟ ପ୍ରକାଶ କରିଛନ୍ତି ।
ଏହି ଆକ୍ରମଣ ପାଇଁ ଇସ୍ରାଏଲ ସେନାକୁ ଦାୟୀ କରାଯାଉଥିବା ବେଳେ ଆଜି ଇସ୍ରାଏଲ ଡିଫେନ୍ସ ଫୋର୍ସର ପ୍ରବକ୍ତା ଡାନିଏଲ ହଗାରୀ ଏହି ଆକ୍ରମଣ ନେଇ ଏକ ଡିଜିଟାଲ ପ୍ରମାଣ ସାମ୍ନାକୁ ଆଣିଛନ୍ତି । ଯେଉଁଥିରେ ସ୍ଥାନୀୟ ଭାଷାରେ ବାର୍ତ୍ତାଳାପ କରୁଥିବା ଦୁଇ ବ୍ୟକ୍ତି ହମାସ କମାଣ୍ଡର ବୋଲି ସେ ଦାବି କରିଛନ୍ତି । ଏହି ଦୁଇ ବ୍ୟକ୍ତି ହସ୍ପିଟାଲ ଆକ୍ରମଣ ସମ୍ପର୍କରେ କଥା ହେଉଛନ୍ତି । ଇସ୍ରାଏଲ ଫୋର୍ସ ଉପରେ ଏହି ରକେଟ ମାଡ କରାଯାଉଥିବା ବେଳେ ଏହାର ମିସଫାଏର ହୋଇ ହସ୍ପିଟାଲ ଉପରେ ପଡିଥିବା ସେମାନେ କଥା ହେଉଥିବା ଇସ୍ରାଏଲ ସେନା ଜାରି କରିଥିବା କ୍ଲିପରେ ଶୁଣିବାକୁ ମିଳୁଛି । ମାତ୍ର ଆକ୍ରମଣ ପରେ ଏହା ଇସ୍ରାଏଲ ଫୋର୍ସର ଏୟାର ଷ୍ଟ୍ରାଇକ ବୋଲି ହମାସ ପକ୍ଷରୁ ଅଭିଯୋଗ କରାଯାଇଛି । ଏଥିରେ ଚିକିତ୍ସାଧୀନ ଆହତଙ୍କ ସମେତ ପ୍ରାୟ 5 ଶହ ସାଧାରଣ ନାଗରିକଙ୍କ ମୃତ୍ୟୁ ହୋଇଛି ।