ହାଇଦ୍ରାବାଦ:ଇସ୍ରାଏଲ-ଗାଜା ମଧ୍ୟରେଅସ୍ତ୍ରବିରତି ଅବଧି ମଧ୍ୟରେ ପଣବନ୍ଦୀଙ୍କୁ ମୁକ୍ତି ପ୍ରକ୍ରିୟା ଜାରି ରହିଥିବା ବେଳେ ଅଚାନକ ଗାଜା ଷ୍ଟ୍ରିପରେ ପହଞ୍ଚିଛନ୍ତି ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁ । ନେତାନ୍ୟାହୁଙ୍କ ଏହି ଗସ୍ତ ସମ୍ପର୍କରେ ଇସ୍ରାଏଲ ସେନା କିମ୍ବା ସରକାର ପୂର୍ବରୁ କୌଣସି ସୂଚନା ସାର୍ବଜନୀନ କରିନଥିଲେ । ମାତ୍ର ଏହି ଗସ୍ତ ପରେ ସେଠାରୁ ହିଁ ଏକ ଭିଡିଓ ନେତାନ୍ୟାହୁଙ୍କ କାର୍ଯ୍ୟାଳୟ ଟ୍ବିଟ କରିଛି । ନେତାନ୍ୟାହୁ ଗାଜାରେ ଜାରି ରହିଥିବା ଅପରେସନର ସମ୍ପର୍କରେ ସମୀକ୍ଷା କରିବା ସହ ସେନା ସହ ଆଲୋଚନା କରିଛନ୍ତି । ଏବେ ସାମରିକ ଅପରେସନ ସାମୟିକ ଭାବେ ସ୍ଥଗିତ ରହିଥିବା ବେଳେ ଇସ୍ରାଏଲର ସାମରିକ ଅପରେସନକୁ କେହି ବନ୍ଦ କରିପାରିବେ ନାହିଁ ବୋଲି ନିଜ ସେନାର ଯବାନଙ୍କୁ କହିଛନ୍ତି ନେତାନ୍ୟାହୁ ।
ନେତାନ୍ୟାହୁଙ୍କ କାର୍ଯ୍ୟାଳୟ ଜାରି କରିଥିବା ଭିଡିଓରେ ନେତାନ୍ୟାହୁ ସେନା ପୋଷାକରେ ସେନାଧିକାରୀଙ୍କ ସହ ଗାଜା ଅପରେସନ ସମ୍ପର୍କରେ ସମୀକ୍ଷା କରୁଛନ୍ତି । ଯବାନଙ୍କ ସହ ବାର୍ତ୍ତାଳାପ କରି ତାଙ୍କ ମନୋବଳ ବୃଦ୍ଧି କରିବା ଉଦ୍ଦେଶ୍ୟରେ ଏକ ଭିଡିଓ ବାର୍ତ୍ତା ମଧ୍ୟ ଜାରି କରିଛନ୍ତି । ଯେଉଁଥିରେ ସେ କହିଛନ୍ତି, “କେହି ଆମକୁ ଅଟକାଇ ପାରିବ ନାହିଁ ଓ ଆମେ ନିଶ୍ଚିତ ଯେ ଏହି ଯୁଦ୍ଧର ସମସ୍ତ ଲକ୍ଷ୍ୟ ହାସଲ କରିବୁ । ଆମର ଶକ୍ତି, ଇଚ୍ଛା ଓ ସଂକଳ୍ପ ଅଛି ଏବଂ ତାହା ହିଁ ଆମେ କରିବୁ ।’’
ଅନ୍ୟପଟେ ଆଜି ତୃତୀୟ ଦିନରେ ପଣବନ୍ଦୀ ହସ୍ତାନ୍ତର ପ୍ରକ୍ରିୟା ଜାରି ରହିଛି । ଇସ୍ରାଏଲ ସେନାର ସୂଚନା ଅନୁସାରେ, ରେଡକ୍ରସର ସ୍ବଚ୍ଛାସେବୀଙ୍କ ମାଧ୍ୟମରେ ହମାସ ଆତଙ୍କୀମାନେ ଇସ୍ରାଏଲୀ ନାଗରିକଙ୍କୁ ମୁକ୍ତ କରୁଛନ୍ତି । ଆଜି 14 ଇସ୍ରାଏଲୀ ଓ 3 ବିଦେଶୀ ନାଗରିକଙ୍କୁ ରେଡକ୍ରସକୁ ହସ୍ତାନ୍ତର କରାଯାଇଛି । ସମସ୍ତଙ୍କୁ ଇସ୍ରାଏଲ ସେନା ରେଡକ୍ରସ ସ୍ବଚ୍ଛାସେବୀଙ୍କଠାରୁ ଗ୍ରହଣ କରିବ । 3 ବିଦେଶୀଙ୍କ ପରିଚୟ ସ୍ପଷ୍ଟ ହୋଇନି ।