ତେଲ୍ ଅଭିଭ୍: ଇସ୍ରାଏଲ ଓ ହମାସ୍ ମଧ୍ୟରେ ଚାଲିଛି ଘମାଘୋଟ ଲଢେଇ । ହମାସ୍ ଆତଙ୍କୀ ଗୋଷ୍ଠୀ ଇସ୍ରାଏଲ ଉପରେ ଘନ ଘନ ରକେଟ ମାଡ କରୁଥିବା ବେଳେ ଇସ୍ରାଏଲ ମଧ୍ୟ ପାଲଟା ଜବାବ ଦେଇ ଗାଜାକୁ ଧ୍ବଂସସ୍ତୁପରେ ପରିଣତ କରିଦେଇଛି । ଦୁଇ ପକ୍ଷର ଆକ୍ରମଣ ଓ ପ୍ରତିଆକ୍ରମଣରେ ଏବେ ସୁଦ୍ଧା ୩୦୦୦ ଲୋକଙ୍କ ମୃତ୍ୟୁ ହୋଇସାରିଲାଣି । ହଜାର ହଜାର ଲୋକ ଆହତ ହୋଇଛନ୍ତି । ସମୟ ବଢିବା ସହିତ ମୃତ୍ୟୁସଂଖ୍ୟା ବଢୁଥିବା ବେଳେ ସ୍ଥିତି ବେଳକୁ ବେଳ ଭୟଙ୍କର ହେବାରେ ଲାଗିଛି । ଏହାରି ମଧ୍ୟରେ ଇସ୍ରାଏଲକୁ ସହାୟତା କରିବା ପାଇଁ ଯୁଦ୍ଧାସ୍ତ୍ର ପଠାଇଛି ଆମେରିକା । ମଙ୍ଗଳବାର ରାତିରେ ଆମେରିକାର ଏକ ବିମାନ ଯୁଦ୍ଧାସ୍ତ୍ର ନେଇ ଇସ୍ରାଏଲର ନେଭାଟିମ୍ ଏୟାରବେସ୍ରେ ପହଞ୍ଚିଛି ।
ନେତାନ୍ୟାହୁଙ୍କ ସହ କଥାହେଲେ ବାଇଡେନ:ମଧ୍ୟପ୍ରାଚ୍ୟରେ ଯୁଦ୍ଧ ସ୍ଥିତି ନେଇ ମଙ୍ଗଳବାର ଆମେରିକା ରାଷ୍ଟ୍ରପତି ଜୋ ବାଇଡେନ ଓ ଉପରାଷ୍ଟ୍ରପତି କମଲା ହାରିସ୍ ଫୋନରେ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ ନେତାନ୍ୟାହୁଙ୍କ ସହ ଆଲୋଚନା କରିଥିଲେ । ହମାସ୍ ବିରୋଧରେ ଇସ୍ରାଏଲକୁ ସହାୟତା ପାଇଁ ଆମେରିକା ଏବଂ ସହଯୋଗୀ ରାଷ୍ଟ୍ରଙ୍କ ଗ୍ରହଣ କରିଥିବା ପଦକ୍ଷେପଗୁଡିକ ସମ୍ପର୍କରେ ବାଇଡେନ ନେତାନ୍ୟାହୁଙ୍କୁ ଜଣାଇଥିଲେ ଏବଂ ଆତଙ୍କବାଦୀଙ୍କ ବର୍ବରୋଚିତ କାଣ୍ଡକୁ କଡ଼ା ନିନ୍ଦା କରିଥିଲେ । ଏଥିସହ ଆମେରିକା ଇସ୍ରାଏଲ ସହ ଛିଡ଼ା ହୋଇଛି ଏବଂ ଯଥାସମ୍ଭବ ସହାୟତା ଯୋଗାଇଦେବ ବୋଲି କହିଥିଲେ ବାଇଡେନ ।