Israel attack on Gaza: ପ୍ରାଣ ହରାଇଲେଣି 6 ଶିଶୁଙ୍କ ସମେତ 32 ପାଲେଷ୍ଟାଇନବାସୀ

ଗାଜା ଉପରେ ଇସ୍ରାଏଲରେ ଆକ୍ରମଣରେ 6 ଶିଶୁଙ୍କ ସମେତ 32 ପାଲେଷ୍ଟାଇନବାସୀ ହେଲେଣି ନିହତ । ଉଦବେଗ ପ୍ରକାଶ କଲା ଜାତିସଂଘ ମାନବଧିକାର ପରିଷଦ । ଅସ୍ତ୍ର ବିରତି ପାଇଁ ମଧ୍ୟସ୍ଥତା କରିପାରେ ଇଜିଷ୍ଟ । ଅଧିକ ପଢନ୍ତୁ

ଗାଜା (ପାଲେଷ୍ଟାଇନ): ଗାଜା-ଇସ୍ରାଏଲ ମଧ୍ୟରେ ଜାରି ରହିଥିବା ବିବାଦ ମଧ୍ୟରେ ଏକାଧିକ ଥର ଗାଜା ଉପରେ ଆକ୍ରମଣ କରି ସାରିଲାଣି ଇସ୍ରାଏଲ । ଏପର୍ଯ୍ୟନ୍ତ ଏହି ଆକ୍ରମଣରେ ମୋଟ 32ଜଣ ପାଲେଷ୍ଟାଇନ ସହରବାସୀ ପ୍ରାଣ ହରାଇ ସାରିଲେଣି । ନିହତଙ୍କ ମଧ୍ୟରେ 6 ଶିଶୁ ମଧ୍ୟ ରହିଛନ୍ତି । ଏବେ ମଧ୍ୟ ଆକ୍ରମଣ ଜାରି ରଖିଛି ଇସ୍ରାଏଲ ସେନା । ଯାହାକୁ ନେଇ ଜାତିସଂଘ ମାନବାଧିକାର ପରିଷଦ ଉଦବେଗ ପ୍ରକାଶ କରିଛି । ଉଭୟ ସେନାକୁ ଅସ୍ତ୍ରବିରତି ସହ ସାଧାରଣ ନାଗରିକଙ୍କ ଜୀବନ ସୁରକ୍ଷା ନିଶ୍ଚିତ କରିବା ପାଇଁ ଜାତିସଂଘ ମାନବାଧିକାର ପରିଷଦ କହିଛି ।

ଅନ୍ୟପଟେ କେହି ଜଣେ ତୃତୀୟ ପକ୍ଷଙ୍କ ହସ୍ତକ୍ଷେପରେ ଦୁଇ ଦେଶ ମଧ୍ୟରେ ଉତ୍ତେଜନା ହ୍ରାସ ପାଇବା ନେଇ ଚିନ୍ତା କରାଯାଇଛି । ଏହି କ୍ରମରେ ଇଜିପ୍ଟ ମଧ୍ୟସ୍ଥତା କରିପାରେ ବୋଲି ଆଶା ମଧ୍ୟ କରାଯାଉଛି । ଅନ୍ୟପଟେ ଏହି ପାରମ୍ପାରିକ ବିବାଦ ପୁଣି ଥରେ ତାଜା ହେବା ପରେ ଇସ୍ରାଏଲ ଗାଜାର ବିଭିନ୍ନ ସ୍ଥାନରେ କ୍ରମାଗତ ଆକ୍ରମଣ ଜାରି ରଖିଛି । ଆକାଶ ମାର୍ଗରୁ ଇସ୍ରାଏଲର ବୋମାବର୍ଷଣରେ ଏପର୍ଯ୍ୟନ୍ତ 32 ସାଧାରଣ ପାଲେଷ୍ଟାଇନ ସହରବାସୀ ପ୍ରାଣ ହରାଇଥିବା ସ୍ପଷ୍ଟ କରିଛି ଗାଜା । ସେହପରି ଏହି ଆକ୍ରମଣରେ 275ଜଣ ନାଗରିକ ଆହତ ମଧ୍ୟ ହୋଇଛନ୍ତି ।

ବ୍ୟୁରୋ ରିପୋର୍ଟ, ଇଟିଭି ଭାରତ