ହାଇଦ୍ରାବାଦ:ଚୀନର ରାଷ୍ଟ୍ରପତି ଜିନପିଙ୍ଗକୁ ନେଇ ସୋସିଆଲ ମିଡ଼ିଆରେ ଗୁଜବ ବ୍ୟାପିବାରେ ଲାଗିଛି (Chinese president Xi Jinping being under house arrest) । ତାଙ୍କୁ ବେଜିଙ୍ଗରେ ଗୃହବନ୍ଦୀ କରାଯାଇଥିବା ଚର୍ଚ୍ଚା ହେଉଛି । ତେବେ ଏନେଇ ବିଜେପି ନେତା ସୁବ୍ରମଣ୍ୟମ ସ୍ବାମୀ (BJP leader Subramanian Swamy) ଟ୍ବିଟ କରି ପ୍ରଶ୍ନ ଉଠାଇଛନ୍ତି ।
ଜିନପିଙ୍ଗ ଯେତେବେଳେ ଉଜବେକିସ୍ତାନର ସମରକନ୍ଦରେ ଆୟୋଜିତ ସଙ୍ଘାଇ ସହଯୋଗ ସଂଗଠନ (SCO)ରେ ସାମିଲ ହେବା ପାଇଁ ସମରକନ୍ଦ ଯାଇଥିଲେ, ସେବେଠୁ ତାଙ୍କୁ ସେନାର ଅଧ୍ୟକ୍ଷ ପଦରୁ ହଟାଯାଇଥିବା ଦାବି ହେଉଛି । ତେବେ ଏନେଇ ଏବେ ବିଧିବଦ୍ଧ ଭାବେ କୌଣସି ସ୍ପଷ୍ଟ ସୂଚନା ମିଳିନାହିଁ । ଅନ୍ୟପଟେ ଚୀନର କ୍ୟମୁନିଷ୍ଟ ପାର୍ଟି କିମ୍ବା ସେଠାକାର ସରକାର ଏଯାବତ ଏହି ଖବରକୁ ଖଣ୍ଡନ ମଧ୍ୟ କରିନାହିଁ । ଏହାସହିତ ଚୀନ ରାଷ୍ଟ୍ରପତିଙ୍କ ବିରୋଧରେ ବିଦ୍ରୋହ ଆରମ୍ଭ ହୋଇଥିବା ଗୁଜବ ଉଠିଛି ।
ସୋସିଆଲ ମିଡିଆ ପ୍ଲାଟଫର୍ମରେ #XiJinping ମଧ୍ୟ ଟ୍ରେଣ୍ଡ କରୁଛି । ଏହାକୁ ନେଇ ହଜାର ହଜାର ସଂଖ୍ୟାରେ ଟ୍ବିଟ ମଧ୍ୟ କରାଯାଉଛି । ବିଜେପି ନେତା ଓ ରାଜ୍ୟସଭା ସାଂସଦ ସୁବ୍ରମଣ୍ୟମ ସ୍ବାମୀଙ୍କ ଟ୍ବିଟ ପରେ ଏନେଇ ଅନେକ ପ୍ରଶ୍ନ ଉଠୁଥିବା ବେଳେ ଖବରଟି ଦ୍ରୁତ ଗତିରେ ବ୍ୟାପିବାରେ ଲାଗିଛି । ବିଜେପି ନେତା ନିଜ ଟ୍ବିଟରେ ଏ ଖବରର ସତ୍ୟତା ସମ୍ପର୍କରେ ଯାଞ୍ଚ କରିବା ପାଇଁ ମଧ୍ୟ ଅପିଲ କରିଛନ୍ତି ।