ବେଜିଂ:କୋରୋନାରେ ଅଣାୟତ୍ତ ଚୀନ । କୋରୋନା ଯୋଗୁଁ ଚୀନରେ ବସ୍ଫୋରକ ସ୍ଥିତି ସୃଷ୍ଟି ହୋଇଛି । ଆକ୍ରାନ୍ତଙ୍କ ସଂଖ୍ୟା ବଢି ଚାଲିଥିବା ବେଳେ ମୃତ୍ୟୁ ସଂଖ୍ୟା ମଧ୍ୟ ବୃଦ୍ଧି ପାଉଛି । ଗତକାଲି ଚୀନରେ ସମୁଦାୟ ଜନସଂଖ୍ୟାର ୯୦ କୋଟି ଲୋକ କୋରୋନାରେ ଆକ୍ରାନ୍ତ ହୋଇଥିବା ଖବର ସାମ୍ନାକୁ ଆସିଥିବା ବେଳେ ଏବେ ଆଉ ଏକ ଚକିତ କରିଲା ଭଳି ଖବର ସାମ୍ନାକୁ ଆସିଛି । କୋରାନା ଯୋଗୁଁ ୩୫ ଦିନ ମଧ୍ୟରେ ୬୦ ହଜାର ଲୋକ ପ୍ରାଣ ହରାଇଥିବା ନେଇ ରିପୋର୍ଟରେ ପ୍ରକାଶ ପାଇଛି ।
ଚୀନର ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ଦିଆଯାଇଥିବା ତଥ୍ୟ ଅନୁସାରେ, "ଡିସେମ୍ବର ୮ରୁ ଜାନୁଆରୀ ୧୨ ତାରିଖ ମଧ୍ୟରେ ୬୦ ହଜାରରୁ ଅଧିକ ଲୋକ ପ୍ରାଣ ହରାଇଛନ୍ତି । ସେମାନଙ୍କ ମଧ୍ୟରେ ୬୫ ବର୍ଷରୁ ଉର୍ଦ୍ଧ୍ବଙ୍କ ସଂଖ୍ୟା ଅଧିକ ରହିଛି । " କିନ୍ତୁ ଚୀନ ସରକାରଙ୍କ ପକ୍ଷରୁ ଦିଆଯାଇଥିବା ବିବୃତ୍ତିରେ କୁହାଯାଇଛି,"କୋରୋନାରେ ସଂକ୍ରମିତ ହୋଇ ୫ହଜାର ୫୦୩ଜଣଙ୍କ ମୃତ୍ୟୁ ହୋଇଥିବା ବେଳେ କୋଭିଡ ସହ ଅନ୍ୟାନ୍ୟ ରୋଗ ପାଇଁ ୫୪ ହଜାର ୪୩୫ ଜଣଙ୍କ ମୃତ୍ୟୁ ହୋଇଛି । " ତେଣୁ ଏହି ଅନ୍ୟାନ୍ୟ ରୋଗକୁ ସରକାର କୋଭିଡ ମୃତ୍ୟୁରେ ସାମିଲ କରିନାହାନ୍ତି । ଚୀନ ମୃତ୍ୟୁ ସଂଖ୍ୟା କମ କରି ତଥ୍ୟ ଲୁଚାଉଥିବା ନେଇ ବିଶ୍ବ ସ୍ବାସ୍ଥ୍ୟ ସଙ୍ଗଠନ ପକ୍ଷରୁ କୁହାଯାଇଛି ।