ମଝି ଆକାଶରେ ବିମାନରେ ଲାଗିଲା ନିଆଁ, ଜରୁରୀ ଅବତରଣ କଲା ଆମେରିକା ବିମାନ

ଟଳିଗଲା ବଡ ବିପଦ । ମଝି ଆକାଶରେ ବିମାନରେ ପକ୍ଷୀ ମାଡ ହୋଇ ଲାଗିଗଲା ନିଆଁ । ଯାତ୍ରୀଙ୍କୁ ନେଇ ସୁରକ୍ଷିତ ଭାବେ ଜରୁରୀ ଅବତରଣ କଲା ଆମେରିକୀୟ ବିମାନ । ଅଧିକ ପଢନ୍ତୁ

ଓ୍ବାଶିଂଟନ: ମଝି ଆକାଶରେ ବିମାନ ଉଡୁଥିବା ବେଳେ ମାଡ ହେଲା ପକ୍ଷୀ । ଫଳରେ ଇଞ୍ଜିନରେ ଲାଗିଗଲା ନିଆଁ । ଫଳରେ ଜରୁରୀ ଅବତରଣ କଲା ଆମେରିକୀୟ ଏୟାରଲାଇନ୍ସ । ସମସ୍ତ ଯାତ୍ରୀ ସୁରକ୍ଷିତ ରହିଥିବା ନେଇ ସୂଚନା ଦିଆଯାଇଛି । ତେବେ ଅଘଟଣ ସମୟରେ ବିମାନରେ ୧୭୩ଜଣ ଯାତ୍ରୀ ରହିଥିଲେ ବୋଲି ଜଣାପଡିଛି ।

ସୂଚନାଅନୁସାରେ, ରବିବାର ଦିନ ଆମେରିକୀୟ ଏୟାର୍‌ଲାଇନ୍ସର ଏକ ବିମାନ ଫିନିକ୍ସ ଅଭିମୁଖେ ଯାଉଥିଲା । ଏହି ସମୟରେ ଏକ ମଝି ଆସି ଇଞ୍ଜିନରେ ମାଡ ହୋଇଥିଲା । ଫଳରେ ମଝି ଆକାଶରେ ବିମାନର ଇଞ୍ଜିନରେ ନିଆଁ ଲାଗିଯାଇଥିଲା । ଏହାପରେ ଓହିଓର ଜନ ଗ୍ଲେନ କଲମ୍ବସ ଆନ୍ତର୍ଜାତିକ ବିମାନ ବନ୍ଦରରେ ଜରୁରୀ ଅବତରଣ କରିଥିଲା ବିମାନ । ସେହି ସମୟର ଭିଡିଓ ବର୍ତ୍ତମାନ ସୋସିଆଲ ମିଡିଆରେ ବେଶ ଭାଇରାଲ ହେବାରେ ଲାଗିଛି ।

ଏନେଇ ଏକ ଟ୍ବିଟର ୟୁଜର୍ସ ଏହି ଭିଡିଓକୁ ସୋସିଆଲ ମିଡିଆରେ ସେୟାର କରି ଲେଖିଛନ୍ତି, " AA1958 ଆମେରିକୀୟ ଏୟାରଲାଇନ୍ସ ବିମାନରେ ପକ୍ଷୀ ମାଡ ହେବାରୁ ଇଞ୍ଜିନରେ ନିଆଁ ଲାଗି ଯାଇଖଥିଲା । ଏହାପରେ ବିମାନ ମଧ୍ୟରେ ଯାତ୍ରୀମାନେ ଆତଙ୍କିତ ହେବା ସହ ପାଟି କରି ଚିଲେଇ ଥିଲେ । କିନ୍ତୁ ସମସ୍ତ ଯାତ୍ରୀଙ୍କୁ ସୁରକ୍ଷିତ ଭାବେ ଅବତରଣ କରାଇଛି ବିମାନ ।"

ସ୍ଥାନୀୟ ଗଣମାଧ୍ୟମର ରିପୋର୍ଟ ଅନୁସାରେ, ବୋଇଙ୍ଗ ୭୩୭ ବିମାନ ଫୋଇନିକ୍ସରୁ କଲୋମ୍ବସକୁ ଉଡାଣ ଭରିଥିବା ବେଳେ ବିମାନରେ ପକ୍ଷୀ ମାଡ ହୋଇଥିବା ନେଇ କ୍ରୁ ମେମ୍ବର ଖବର ଦେଇଥିଲେ । ଏହାପରେ ବିମାନଟି ପୁଣି ଜରୁରୀ ଅବତରଣ କରିଥିଲା । ସମସ୍ତ ଯାତ୍ରୀ ସୁରକ୍ଷିତ ଅଛନ୍ତି । କାହାର କୌଣସି କ୍ଷତି ହୋଇନାହିଁ । ଘଟଣାକୁ ନେଇ ଅଧିକ ତଦନ୍ତ ଜାରି ରହିଛି ।

ଅନ୍ୟପଟେ ଜନ ଗ୍ଲେନ କଲମ୍ବସ ଆନ୍ତର୍ଜାତିକ ବିମାନ ବନ୍ଦର ପକ୍ଷରୁ ଟ୍ବିଟ କରି କୁହାଯାଇଛି,"ରବିବାର ସକାଳେ ବିମାନ ଉଡାଣ ଭରିଥିବା ବେଳେ ପକ୍ଷୀ ମାଡ ହୋଇ ଇଞ୍ଜିନରେ ନିଆଁ ଲାଗିଯାଇଥିଲା । ଫଳରେ ବିମାନଟି ଜରୁରୀ ଅବତରଣ କରିଥିଲା । ବର୍ତ୍ତମାନ ଏୟାରପୋର୍ଟ ଖୋଲି ରହିଛି । ତଦନ୍ତ ଆରମ୍ଭ କରାଯାଇଛି ।"

ଏନେଇ ବିମାନରେ ରହିଥିବା ଜଣେ ଯାତ୍ରୀ କହିଛନ୍ତି, " ବିମାନଟି ଉଡୁଥିବା ସମୟରେ ହଠାତ ଏକ ଶବ୍ଦ ଶୁଣାଯାଇଥିଲା । ଲୋକମାନେ ଭୟଭୀତ ହୋଇ ଚିତ୍କାର କରିଥିଲେ । ତେବେ ବିମାନରେ ପକ୍ଷୀ ମାଡ ହୋଇଥିବା ନେଇ କ୍ରୁମେମ୍ବର କହିଥିଲେ । ଏହାପରେ ବିମାନକୁ ଜରୁରୀ ଅବତରଣ କରାଯାଇଥିଲା । ଏହାପରେ ଆମକୁ ଅନ୍ୟ ଏକ ବିମାନରେ ଗନ୍ତବ୍ୟସ୍ଥଳକୁ ପଠାଯାଇଥିଲା ।"