ସିଡନୀ: ସାରା ବିଶ୍ବରେ ଭୟଙ୍କର ପରିବେଶ ସୃଷ୍ଟି କରିଥିବା କୋରୋନା ମହାମାରୀରୁ ରକ୍ଷା ପାଇଁ ଡାକ୍ତର ତଥା ବିଶେଷଜ୍ଞମାନେ ମାସ୍କ ପିନ୍ଧିବା ପାଇଁ ପରାମର୍ଶ ଦେଉଛନ୍ତି । ଲୋକେ ଅଳ୍ପେ ବହୁତ ଏହି ନିୟମକୁ ମାନୁଛନ୍ତି ମଧ୍ୟ । ହେଲେ ଏହାକୁ ସଠିକ୍ ଭାବେ ବ୍ୟବହାର ଖୁବ କମ ଲୋକେ କରୁଥିବା ଦେଖାଯାଉଛି । ଏହା ପଛରେ ଉଦ୍ଦେଶ୍ୟ ହେଉଛି କୋରୋନା ସଂକ୍ରମଣର ଭୂତାଣୁକୁ ବ୍ୟାପିବାରେ ରୋକିବା । ମୁଖ୍ୟତଃ କଥା ହେବା ସମୟରେ କିମ୍ବା ଛିଙ୍କିବା ଓ କାଶିବା ସମୟରେ କୋରୋନା ଭୂତାଣୁ ବାୟୁରେ ମିଶିଥାଏ । ଯାହା ଅନ୍ୟ ସୁସ୍ଥ ବ୍ୟକ୍ତିଙ୍କ ଶରୀରରେ ପ୍ରବେଶ କରି ତାଙ୍କୁ ସଂକ୍ରମିତ କରିଥାଏ ।
ଏଥିପାଇଁ ସୁସ୍ଥ ବ୍ୟକ୍ତି ମାସ୍କ ବ୍ୟବହାର କଲେ ସେ ବାୟୁରୁ ଭୂତାଣୁକୁ ଗ୍ରହଣ କରିପାରିବେ ନାହିଁ ଓ ଅନ୍ୟପଟେ ସଂକ୍ରମିତ ମାସ୍କ ବ୍ୟବହାର କଲେ ତାଙ୍କଠାରୁ ସଂକ୍ରମଣ ବ୍ୟାପିବ ନାହିଁ । ତେବେ ଅନେକ ସମୟରେ ଘର ତିଆରି ବା ହାତ ତିଆରି ମାସ୍କ ପିନ୍ଧିବା ପାଇଁ ମଧ୍ୟ ବିଶେଷଜ୍ଞମାନେ ମତ ଦେଉଥିବା ଦେଖାଯାଉଛି । ତେବେ ନିଡ ଘରେ ତିଆରି ମାସ୍କକୁ ଅଧିକ ସୁରକ୍ଷିତ କରିବା ପାଇଁ ଏହାକୁ ଦୁଇରୁ ତିନି ପରସ୍ତ ରଖିବା ନିହାତି ଦରକାର ବୋଲି ଗବେଷକମାନେ ମତ ଦେଇଛନ୍ତି । ଏହାଦ୍ବାରା ଭୂତାଣୁ ଶରୀରରେ ପ୍ରବେଶ କରିପାରିବ ନାହିଁ ।