କାନବେରା: ଅଷ୍ଟ୍ରେଲିଆରେ ଦ୍ରୁତ ବେଗରେ କୋହଳ ହେବାରେ ଲାଗିଛି କୋରୋନା କଟକଣା । ଇତି ମଧ୍ୟରେ ଦେଶରେ ଏକାଧିକ ନୂଆ ଆକ୍ରାନ୍ତ ଚିହ୍ନଟ ହେବା ସତ୍ତ୍ବେ ସରକାର ନିଜ ପଦକ୍ଷେପ ଉପରେ ବିଶ୍ବାସ ଜାହିର କରିଛନ୍ତି । ସାମାନ୍ୟ ସଚେତନତା ଦ୍ବାରା କୋରୋନା ସଂକ୍ରମଣ ସ୍ଥିତିକୁ ଏଡାଇ ଦିଆଯାଇପାରିବ ବୋଲି ରାଜ୍ୟ ସରକାରମାନେ ଆଶା ରଖିଛନ୍ତି । ସେପଟେ ଖୁବଶୀଘ୍ର ଦେଶରେ କ୍ରୀଡାଭିତ୍ତିକ କାର୍ଯ୍ୟକ୍ରମ ଆୟୋଜନ ହେବା ନେଇ ଜଣା ପଡିଛି ।
ଦେଶରେ କଟକଣା କୋହଳ ହେବା ସହ ସିନେମା ହଲ, ପବ୍, ରେସ୍ତୋରାଁ, ଜିମ୍ ଖୋଲିଛି । ଏଥିସହ ବିଭିନ୍ନ ପର୍ବପର୍ବାଣୀ ପାଳନ ଆରମ୍ଭ ହୋଇଛି । ଦେଶରେ ଖୁବଶୀଘ୍ର କ୍ରୀଡା ପ୍ରତିଯୋଗିତା ଆୟୋଜନ ନେଇ ମଧ୍ୟ ସୂଚନା ରହିଛି । ଏଥିପାଇଁ ଜଣଙ୍କ ପ୍ରତି 4 ବର୍ଗ ମିଟର ସ୍ଥାନ ହିସାବରେ ଗୋଟିଏ ଷ୍ଟାଡିୟମର କ୍ଷମତାକୁ 40,000ରୁ 10,000କୁ ହ୍ରାସ କରାଯାଇଛି । ସେପଟେ ଜୁଲାଇ 1ରୁ ନ୍ୟୁ ସାଉଥ ୱେଲ୍ସରେ ସମସ୍ତ ବ୍ୟବସାୟ ସ୍ବାଭାବିକ ସ୍ଥିତିକୁ ଫେରିବା ନେଇ ଜଣା ପଡିଛି ।