କାନବେରା: ଅଷ୍ଟ୍ରେଲିଆରେ କୋରୋନା ସଂକ୍ରମଣ ଭୟ ପାଇଁ ବିଳମ୍ବରେ ସଂସଦ ଅଧିବେଶନ ଆୟୋଜିତ ହେବ । ଚଳିତ ସପ୍ତାହ ସଂସଦ ସ୍ବାଭାବିକ ହେବାର ଯୋଜନା ରହିଥିବା ବେଳେ ସଂକ୍ରମଣ ଭୟ ପାଇଁ ଏହି ତାରିଖ ପୁଣି କିଛି ସପ୍ତାହ ପାଇଁ ଘୁଞ୍ଚିଥିବା ଜଣା ପଡିଛି । ଦେଶରେ କୋରୋନା ସଂକ୍ରମଣ ପାଇଁ ପ୍ରଭାବିତ ହୋଇଥିବା ଦୁଇ ରାଜ୍ୟରେ ସଂସଦ ଭବନ ବିଳମ୍ବରେ ଖୋଲିବା ନେଇ ସ୍ପଷ୍ଟ ହୋଇଛି ।
ପ୍ରଧାନମନ୍ତ୍ରୀ ସ୍କଟ ମୋରିସନ ଏନେଇ ସଂସଦ ମୁଖପାତ୍ରଙ୍କୁ ଅଧିବେଶନ ଘୁଞ୍ଚାଇବା ପାଇଁ ନିର୍ଦ୍ଦେଶ ଦେଇଥିବା ଜଣା ପଡିଛି । ଅଗଷ୍ଟ 4ରେ ଆୟୋଜିତ ହେବାକୁ ଥିବା ଦୁଇ ସପ୍ତାହ ଅବଧିର ଅଧିବେଶନକୁ କୋରୋନା ସଂକ୍ରମଣ ପାଇଁ ବାତିଲ କରିବାକୁ ସ୍କଟ ନିର୍ଦ୍ଦେଶ ଦେଇଛନ୍ତି । ଏହାପରେ 24 ଅଗଷ୍ଟରେ ପରବର୍ତ୍ତୀ ଅଧିବେଶନ ଆୟୋଜିତ ହେବାର ଯୋଜନା ରହିଛି ।
ହେଲେ ବର୍ତ୍ତମାନର ପରିସ୍ଥିତି ପାଇଁ ଅଧିବେଶନ ଘୁଞ୍ଚାଇବାର ନିଷ୍ପତ୍ତି ନେଇ ସ୍କଟ ଏକ ବିଜ୍ଞପ୍ତି ଜରିଆରେ ପ୍ରକାଶ କରିଛନ୍ତି କି ବର୍ତ୍ତମାନ ସମୟରେ ଅଧିବେଶନ ହେବା ଦ୍ବାରା ସାଂସଦମାନେ କୋରୋନାରେ ସଂକ୍ରମିତ ହେବାର ଭୟ ରହିଛି । ଯାହା ଦେଶ ବର୍ତ୍ତମାନ ସହ୍ୟ କରିପାରିବ ନାହିଁ । କେବଳ ସାଂସଦ ନୁହେଁ, ସଂସଦରେ କାର୍ଯ୍ୟରତ ଅନ୍ୟ ସମସ୍ତ ଅଧିକାରୀ ଓ କର୍ମଚାରୀଙ୍କୁ ସଂକ୍ରମଣ ଯେପରି ନ ହୁଏ ତାହା ବର୍ତ୍ତମାନ ଦେଶର ପ୍ରାଥମିକତା ବୋଲି ସେ ପ୍ରକାଶ କରିଛନ୍ତି ।
ସେପଟେ ଭିକ୍ଟୋରିଆ ଓ ନ୍ୟୁ ସାଉଥ ୱେଲ୍ସରେ ଦିନକୁ ଦିନ କୋରୋନା ସଂକ୍ରମଣ ସଂଖ୍ୟା ବଢୁଥିବା ଦେଖାଯାଉଛି । କେବଳ ଶନିବାର ନ୍ୟୁ ସାଉଥ ୱେଲ୍ସରେ 15 ନୂଆ ସଂକ୍ରମଣ ମାମଲା ସାମ୍ନାକୁ ଆସିଥିବା ବେଳେ ଭିକ୍ଟୋରିଆରେ ନୂଆ 217ଟି ମାମଲା ଚିହ୍ନଟ ହୋଇଥିବା ଜଣା ପଡିଛି । ଏହାର ମୁକାବିଲା ପାଇଁ ଗତ ଜୁଲାଇ 8ରେ ଭିକ୍ଟୋରିଆରେ ଷ୍ଟେ ଆଟ୍ ହୋମର ନିର୍ଦ୍ଦେଶ ଜାରି କରାଯାଇଥିଲା । ଏଥିସହ ଅଷ୍ଟ୍ରେଲିଆରେ ବର୍ତ୍ତମାନ ସୁଦ୍ଧା 11,235 ଜଣ ଆକ୍ରାନ୍ତ ଚିହ୍ନଟ ହେବା ସହ 116 ଜଣଙ୍କ ମୃତ୍ୟୁ ହୋଇଥିବା ଜଣା ପଡିଛି ।
@IANS
