ଲଣ୍ଡନ: ଦେଶରେ ଲକଡାଉନ ପରିସ୍ଥିତି ପାଇଁ ଦୀର୍ଘ 2ମାସରୁ ଉର୍ଦ୍ଧ୍ବ ସମୟ ଧରି ଜାରି ରହିଥିଲା ଅନଲାଇନ ଶିକ୍ଷାଦାନ । ହେଲେ ସମସ୍ତେ ଏହି ସୁବିଧା ପାଇପାରିନଥିବାରୁ କେତେକ ଛାତ୍ରଛାତ୍ରୀ ଲକଡାଉନ ସମୟରେ ପାଠପଢାରୁ ବଞ୍ଚିତ ରହିଥିଲେ । ଏମାନଙ୍କ କଥା ଚିନ୍ତା କରି ପ୍ରଧାନମନ୍ତ୍ରୀ ବୋରିସ ଜନଶନ ଏକ ନୂଆ ଯୋଜନା ପ୍ରସ୍ତୁତ କରିଛନ୍ତି । 1 ବିଲିୟନ ପାଉଣ୍ଡ ବା 1.24 ବିଲିୟନ ଡଲାର ବିନିମୟରେ ଏହି ଯୋଜନା ପ୍ରସ୍ତୁତ ହୋଇଥିବା ନେଇ ଶିକ୍ଷା ବିଭାଗ ସ୍ପଷ୍ଟ କରିଛି ।
ଏହି ଯୋଜନା ଦ୍ବାରା ବର୍ତ୍ତମାନର ଆଧୁନିକ ବ୍ୟବସ୍ଥାର ଲାଭ ଉଠାଇ ପାରୁନଥିବା ଲକ୍ଷଲକ୍ଷ ଛାତ୍ରଛାତ୍ରୀଙ୍କୁ ଶିକ୍ଷା ଯୋଗାଇବାରେ ବ୍ୟବହାର କରାଯିବ । ଏହି ଛାତ୍ରଛାତ୍ରୀଙ୍କ ପାଇଁ ସ୍ବତନ୍ତ୍ର ଟ୍ୟୁସନର ବ୍ୟବସ୍ଥା କରାଯାଇ ଶିକ୍ଷାଦାନ କରାଯିବାର ଯୋଜନା ରହିଛି । ତେବେ ଏହି ଯୋଜନାରେ ଖର୍ଚ୍ଚ ହେଉଥିବା ମୋଟ ଅର୍ଥରାଶିରୁ 350 ମିଲିୟନ ପାଉଣ୍ଡ ଅର୍ଥ ଜାତୀୟ ଶିକ୍ଷାଦାନ କାର୍ଯ୍ୟକ୍ରମରେ ବ୍ୟବହାର ହେବ । ଏଥିସହ ବଳକା 650 ମିଲିୟନ ପାଉଣ୍ଡ ଅର୍ଥକୁ 2020-21 ଶିକ୍ଷାବର୍ଷ ପାଇଁ ରାଜ୍ୟସ୍ତରୀୟ ସମସ୍ତ ପ୍ରାଥମିକ ଓ ମାଧ୍ୟମିକ ବିଦ୍ୟାଳୟମାନଙ୍କରେ ସୁରକ୍ଷିତ ଶିକ୍ଷାଦାନ ପାଇଁ ବ୍ୟବହାର କରାଯିବ ।