ଅର୍ଦ୍ଧାଧିକ ବୈଶ୍ବିକ ୱାର୍କ ଫୋର୍ସ ଉପରେ ଘନେଇଛି କୋରୋନା ବିପଦ

ବିଶ୍ବ ପାଇଁ ମହାମାରୀରେ ପରିଣତ ହୋଇଥିବା କୋରୋନା ସଂକ୍ରମଣ ଏବେ ବୈଶ୍ବିକ ସ୍ତରରେ ସୃଷ୍ଟି କରିଛି ଅତି ଭୟଙ୍କର ପରିସ୍ଥିତି । କେବଳ ସ୍ବାସ୍ଥ୍ୟ ନୁହେଁ ଏହି ମହାମାରୀ ଏବେ ଆର୍ଥିକ ସ୍ତରରେ ମଧ୍ୟ ପ୍ରଳୟଙ୍କରୀ ପ୍ରଭାବ ପକାଇଛି ।

ଜେନିଭା: ବିଶ୍ବ ପାଇଁ ମହାମାରୀରେ ପରିଣତ ହୋଇଥିବା କୋରୋନା ସଂକ୍ରମଣ ଏବେ ବୈଶ୍ବିକ ସ୍ତରରେ ସୃଷ୍ଟି କରିଛି ଅତି ଭୟଙ୍କର ପରିସ୍ଥିତି । କେବଳ ସ୍ବାସ୍ଥ୍ୟ ନୁହେଁ ଏହି ମହାମାରୀ ଏବେ ଆର୍ଥିକ ସ୍ତରରେ ମଧ୍ୟ ପ୍ରଳୟଙ୍କାରୀ ପ୍ରଭାବ ପକାଇଛି । ବିଶ୍ବର ଅର୍ଦ୍ଧାଧିକ କ୍ଷେତ୍ରରେ ବର୍ତ୍ତମାନ ଲୋକେ ନିଜ ଚାକିରୀରୁ ହାତ ଧୋଇ ବସିଥିବା ବେଳେ ସୃଷ୍ଟି ହୋଇଛି ବେରୋଜଗାରୀର ନୂଆ ଚିତ୍ର । ଏନେଇ ଅନ୍ତର୍ଜାତୀୟ ଶ୍ରମିକ ସଙ୍ଗଠନ (ଆଇଏଲଓ) ଏକ ରିପୋର୍ଟ ପ୍ରକାଶ କରିଛି ।

ଏହି ରିପୋର୍ଟ ମୁତାବକ କୋରୋନା ସଂକ୍ରମଣ ପାଇଁ ବର୍ତ୍ତମାନ ବିଶ୍ବରେ 1.6 ବିଲିୟନ କର୍ମଚାରୀଙ୍କ ଚାକିରୀରେ ବିପଦ ସୃଷ୍ଟି ହୋଇଛି । ସେହିପରି 436 ମିଲିୟନ ଉଦ୍ୟୋଗ କ୍ଷେତ୍ରରେ ଦେଖାଦେଇଛି ବିପତ୍ତି । ଏହି ରିପୋର୍ଟରେ ଏହା ମଧ୍ୟ ଦର୍ଶାଯାଇଛି କି ବର୍ଷର ଦ୍ବିତୀୟ ତ୍ରୈମାସିକ ଭାଗରେ କର୍ମଚାରୀଙ୍କ କାର୍ଯ୍ୟ ସମୟରେ ତୀବ୍ର ଅବନତି ଘଟିପାରେ । ଯାହା ପୂର୍ବ ନିର୍ଦ୍ଧାରିତ ଆକଳନର ସମ୍ପୂର୍ଣ୍ଣ ବିପରୀତ । 2019ର ଶେଷ ତ୍ରୈମାସିକ ଭାଗରେ ହୋଇଥିବା କ୍ଷତି ତୁଳନାରେ ବର୍ତ୍ତମାନ 10.5 ପ୍ରତିଶତ ଅଧିକ କ୍ଷତି ହେବା ନେଇ ଆକଳନ ହୋଇଛି ।

ଏହି ଆକଳନ ଅନୁଯାୟୀ ବିଶ୍ବରେ 305 ମିଲିୟନ ଫୁଲ-ଟାଇମ ଜବ ବର୍ତ୍ତମାନ ବିପଦ ସଙ୍କେତ ଘେରରେ ରହିଥିବା ଜଣାପଡିଛି । ପୂର୍ବ ମାସରେ ଏହି ମାତ୍ରା 6.7 ପ୍ରତିଶତ ଅର୍ଥାତ 195 ମିଲିୟନ ଫୁଲ-ଟାଇମ ଜବ ଉପରେ ବିପଦ ରହିଥିବା ଜଣାପଡିଥିଲା । ତେଣୁ ଯଦି ଏହିପରି ଅବସ୍ଥା ଲାଗି ରୁହେ ତେବେ ଆଗାମୀ ଦିନରେ ବିଶ୍ବର ଅର୍ଦ୍ଧାଧିକ ଚାକିରୀ ପ୍ରତି ବିପଦ ସୃଷ୍ଟି ହେବ ସେଥିରେ ସନ୍ଦେହ ନାହିଁ ।