ଲଣ୍ଡନ: ଆମେରିକା ଓ ଇଂଲଣ୍ଡରେ ସ୍ଥାନେ ସ୍ଥାନେ ବ୍ୟାପିଛି ବର୍ଣ୍ଣବୈଷମ୍ୟ ବିରୋଧୀ ଆନ୍ଦୋଳନ । ଯାହାକୁ ନେଇ ସୋମବାର ଏକ ଚାଞ୍ଚଲ୍ୟକର ବୟାନ ଦେଇଛନ୍ତି ୟୁକେ ପ୍ରଧାନମନ୍ତ୍ରୀ ବୋରିସ ଜନଶନ । ଆନ୍ଦୋଳନ କିଛି ଅସାମାଜିକ ଲୋକଙ୍କ ପାଇଁ ପ୍ରଭାବିତ ହୋଇ ବିଫଳତାର ରୂପ ନେଇଛି ବୋଲି ବୋରିସ ଆକ୍ଷେପ କରିଛନ୍ତି । ସେ ଏହା ମଧ୍ୟ କହିଛନ୍ତି କି ଏହାର ଅର୍ଥ ନବୁଝି କିଛି ଅସାମାଜିକ ବ୍ୟକ୍ତିଙ୍କ ପ୍ରବେଶ ଦ୍ବାରା ଆନ୍ଦୋଳନର ସ୍ବରରେ ପରିବର୍ତ୍ତନ ହୋଇଛି ।
ଶନିବାର ଓ ରବିବାର ହଜାର ହଜାର ବିକ୍ଷୋଭକାରୀ ଲଣ୍ଡନ ସମେତ ୟୁକେର ବିଭିନ୍ନ ସହର ଯଥା ବ୍ରିଷ୍ଟଲ, ମାଞ୍ଚେଷ୍ଟର, ୱୁଲଭରହ୍ୟାମ୍ପଟନ, ନଟିଙ୍ଗହାମ, ଗ୍ଲାସଗୋ ଓ ଏଡିନବର୍ଗରେ ଏକତ୍ରିତ ହୋଇଥିଲେ । ସାଧାରଣତଃ ବିକ୍ଷୋଭ ଶାନ୍ତିପୂର୍ଣ୍ଣ ଭାବେ ହୋଇଥାଏ । ହେଲେ ଏହି ଆନ୍ଦୋଳନରେ ଲୋକଙ୍କ ହିଂସ୍ର ଆଚରଣ ପାଇଁ ରବିବାର ଦେଶରେ 8ଜଣ ପୋଲିସ ଅଫିସର ଆହତ ହେବା ସହ 12 ଜଣ ବିକ୍ଷୋଭକାରୀ ଗିରଫ ହୋଇଥିଲେ ।
ବ୍ରିଷ୍ଟଲରେ ବିକ୍ଷୋଭକାରୀମାନେ ଉତ୍ତେଜିତ ହୋଇ ବ୍ୟାପକ ଭଙ୍ଗାରୁଜା କରିଥିଲେ । ଯେଉଁଥିରେ ଏଡୱାର୍ଡ କୋଲଷ୍ଟୋନଙ୍କ ପ୍ରତିମୂର୍ତ୍ତୀ ଭଙ୍ଗା ଯାଇଥିବା ଅଭିଯୋଗ ହୋଇଛି । ଏସବୁ ବିରୋଧରେ ବ୍ରିଷ୍ଟଲରେ ଅପରାଧିକ ମାମଲା ଦାୟର ହେବା ନେଇ ପୋଲିସ ସୂଚନା ଦେଇଛି । ଏହାକୁ ନଜରରେ ରଖି ବୋରିସ କହିଛନ୍ତି କି କିଛି ଅସାମାଜିକ ବିକ୍ଷୋଭକାରୀଙ୍କ ପାଇଁ ବିକ୍ଷୋଭ ଲକ୍ଷ୍ୟଚ୍ୟୁତ ହେବା ସହ ଅପରାଧ ସଂଖ୍ୟା ବଢିବାରେ ଲାଗିଛି । ଏହା ନା ଯେ କେବଳ ଅହିତକର ବରଂ ସରକାରୀ ଭାବେ ଅକ୍ଷମଣୀୟ ଅପରାଧ ।
ସେପଟେ ଏନେଇ ବ୍ରିଟେନର ଏକ ଟପ୍ ଖବରକାଗଜର ନିର୍ଦ୍ଦେଶକ ସିମ୍ପସନ କହିଛନ୍ତି କି ଲୋକେ ଏହି ବିଷୟରେ ଗୁରୁତ୍ବାରୋପ କରି ଧାରଣାକୁ ଓହ୍ଲାଇବା ଠିକ୍ ଅଛି । କିନ୍ତୁ ବିକ୍ଷୋଭକାରୀମାନେ ବର୍ତ୍ତମାନେ ଉଗ୍ର ହେବାରେ ଲାଗିଛନ୍ତି । ଅତ୍ୟଧିକ ଉତ୍ତେଜିତ ହୋଇ ସେମାନ ହିତାହିତ ଜ୍ଞାନ ଭୁଲିବାରେ ଲାଗିଛନ୍ତି । ତେଣୁ ସେମାନଙ୍କୁ ନିଜ ଭାବନାରେ ସଂଯମତା ରକ୍ଷା କରିବାକୁ ହେବ ଏବଂ ଶାନ୍ତିପୂର୍ଣ୍ଣ ଭାବେ ବିଶ୍ବକୁ ଏହି ଆନ୍ଦୋଳନ ପ୍ରତି ଆକର୍ଷିତ କରିବାକୁ ହେବ ।
@IANS
