ରୋମ: କୋରୋନାର ଭୟାବହତା ପରେ ଏବେ ଧିରେ ଧିରେ ଶାନ୍ତ ପଡିବାରେ ଲାଗିଛି ଝଡ । ଦୈନିକ ଆକ୍ରାନ୍ତ ସଂଖ୍ୟା କମିବାରେ ଲାଗିଥିବା ବେଳେ ଏବେ ଲକଡାଉନ କଟକଣା ମଧ୍ୟ କୋହଳ ହେବା ନେଇ ଆରମ୍ଭ ହୋଇଛି ଦ୍ବିତୀୟ ପର୍ଯ୍ୟାୟ ପ୍ରସ୍ତୁତି । ସୋମବାରଠାରୁ ଆରମ୍ଭ ହୋଇଥିବା ଏହି ପ୍ରସ୍ତୁତିରେ ଦେଶରେ କେଉଁସବୁ କ୍ଷେତ୍ରରେ ଲକଡାଉନ ନିୟମ କୋହଳ ହେବ ସେନେଇ ବିସ୍ତୃତ ଘୋଷଣା କରାଯାଇଛି ।
ଏହି ଘୋଷଣା ଅନୁଯାୟୀ ଦେଶରେ ଟେକ୍ସଟାଇଲ ଓ ଫ୍ୟାସନ ଆଇଟମ, ନିର୍ମାଣ କାର୍ଯ୍ୟ ଓ ହୋଲସେଲ ଉଦ୍ୟୋଗ ଆଦି କାର୍ଯ୍ୟକାରୀ ହେବ । ଏଥିସହ କାର୍ଯ୍ୟକ୍ଷେତ୍ରକୁ ପ୍ରାୟ 4.4 ମିଲିୟନ ଲୋକେ ଫେରିବା ନେଇ ଆକଳନ କରାଯାଇଛି । ସେପଟେ ଦେଶରେ ବନ୍ଦ ରହିଥିବା ବାର ଓ ରେସ୍ତୋରାଁ ଖୋଲିବା ପାଇଁ ନିର୍ଦ୍ଦେଶ ଦିଆଯାଇଛି । କିନ୍ତୁ ଏସବୁ କେବଳ ଡେଲିଭରି ଓ ପାର୍ସଲ ପାଇଁ ଖୋଲିବାକୁ ଅନୁମତି ଦିଆଯାଇଛି । ଏହିସବୁ କ୍ଷେତ୍ର ଜୁନ 1ରେ ସମ୍ପୂର୍ଣ୍ଣ ଭାବେ କାର୍ଯ୍ୟକାରୀ କରିବା ପାଇଁ ଯୋଜନା ରହିଛି । ଯାହା ସେହି ସମୟରେ କୋରୋନା ସ୍ଥିତି ଉପରେ ନିର୍ଭରଶୀଳ ।
ଅପରପାର୍ଶ୍ବରେ ବନ୍ଦ ରହିଥିବା କିଓସ୍କ, ପର୍ସନାଲ ହାଇଜିନ, ଫାର୍ମାସି, ଟୋବାକୋନିଷ୍ଟ, ବହି ଦୋକାନ, ଶିଶୁଙ୍କ ପୋଷାକ ଦୋକାନ ଓ ଗଛ ଦୋକାନ ଆଦି ମେ 19ଯାଏଁ ବନ୍ଦ ରହିବ । ଘରେ ବସି ରହିଥିବାରୁ ଅନେକ ଲୋକେ ଚଲାବୁଲା ଓ ଖୋଲା ପବନରେ ବୁଲି ପାରୁନଥିବାରୁ ସେମାନଙ୍କୁ ସ୍ବାସ୍ଥ୍ୟଗତ ଅସୁବିଧା ହେଉଥିବା ଅଭିଯୋଗ କରିଥିଲେ । ଯାହାର ସମାଧାନ ସ୍ବରୂପ ସୋମବାରଠାରୁ ନିକଟସ୍ଥ ଅଞ୍ଚଳରେ ଚଲାବୁଲା ପାଇଁ ଅନୁମତି ମିଳିଛି । ଲୋକେ ଗ୍ରୀନ ଜୋନ ଯାଇ ବ୍ୟାୟାମ ଓ ଚଲାବୁଲା କରିପାରିବେ । ସେପଟେ କିନ୍ତୁ ବିନା ଅନୁମତିରେ ଛାତ୍ରଛାତ୍ରୀ ଓ ବାହାର ଦେଶର କର୍ମଚାରୀଙ୍କୁ ଯଦି ଅନ୍ୟ ସ୍ଥାନରେ ଦେଖାଯାଏ ତେବେ ସେମାନଙ୍କୁ ସେହି ସ୍ଥାନ ରେ କ୍ବାରେଣ୍ଟାଇନ କରାଯିବ ବୋଲ କଡା ନିର୍ଦ୍ଦେଶ ଜାରି ହୋଇଛି ।
ନିକଟସ୍ଥ ଅଞ୍ଚଳରେ ରହୁଥିବା ସାଙ୍ଗସାଥୀ, ପଡୋଶୀ ଓ ସମ୍ପର୍କୀୟଙ୍କ ଘରକୁ ଯିବା ପାଇଁ ନିୟମ କୋହଳ କରାଯାଇଛି । ହେଲେ ଅଧିକ ଗହଳି ନକରିବାର ସର୍ତ୍ତ ମଧ୍ୟ ଲାଗୁ କରାଯାଇଛି । ମୃତକଙ୍କ ଅନ୍ତ୍ୟେଷ୍ଟି କ୍ରିୟା ପାଇଁ ମଧ୍ୟ ଅନୁମତି ମିଳିଛି । ହେଲେ ଏଥିରେ କେବଳ 15 ଜଣ ଲୋକ ରହିବା ପାଇଁ ନିର୍ଦ୍ଦେଶ ଦିଆଯାଇଛି । ସୂଚନା ଅନୁଯାଯୀ ବର୍ତ୍ତମାନ ଦେଶରେ ମୋଟ ଆକ୍ରାନ୍ତ ସଂଖ୍ୟା 2,10,717 ରହିଥିବା ବେଳେ ମୃତ୍ୟୁ ସଂଖ୍ୟା 28,884 ଛୁଇଁଛି ।
@IANS
