ଲଣ୍ଡନ: ସାରା ବିଶ୍ବରେ ମହାମାରୀ ସାବ୍ୟସ୍ତ ହୋଇଥିବା କୋରୋନାକୁ ନେଇ ଲାନସେଟ୍ ଗ୍ଲୋବାଲ ହେଲଥ କିଛି ସମ୍ଭାବ୍ୟ ଦିଗ ଉପରେ ନିଜ ଜର୍ଣ୍ଣାଲରେ ଆଲୋଚନା କରିଛି । ଏଥିରେ ପ୍ରକାଶିତ ରିପୋର୍ଟ ମୁତାବକ ବିଶ୍ବରେ ପ୍ରାୟ 1.7 ବିଲିୟନ ଲୋକେ ଅଛନ୍ତି ଯେଉଁମାନଙ୍କ ଖରାପ ସ୍ବାସ୍ଥ୍ୟ ସେମାନଙ୍କୁ କୋରୋନା ଦ୍ବାରା ଗୁରୁତର ଆକ୍ରାନ୍ତ କରାଇପାରେ । ତେବେ ଏହି ଦିଗରେ ପ୍ରକାଶିତ ତଥ୍ୟ ବର୍ତ୍ତମାନ ସୃଷ୍ଟି ପରିସ୍ଥିତିର ମୁକାବିଲା ପାଇଁ କିଛି ପଥ ପରିଷ୍କାର କରିବ ବୋଲି ଲାନସେଟର ଗବେଷକମାନେ ମତ ଦେଇଛନ୍ତି ।
ଲାନସେଟ ନିଜ ରିପୋର୍ଟରେ ସ୍ପଷ୍ଟ କରିଛି କି ଏହି ଆକଳନ ଦ୍ବାରା ନ ଡରି ଯେଉଁମାନେ ନିଜ ଖରାପ ସ୍ବାସ୍ଥ୍ୟ ନେଇ ଚିନ୍ତିତ ଅଛନ୍ତି ସେମାନେ ବର୍ତ୍ତମାନ ଘରେ ସୁସ୍ଥ ପରିବେଶରେ ରହିବା ସହ ସାମାଜିକ ଦୂରତ୍ବକୁ ବିଶେଷ ଗୁରୁତ୍ବ ଦେବା ଦରକାର । କେବଳ ସେତିକ ନୁହେଁ ବରଂ ଘରେ ରହି ସୁସ୍ଥ ଅଭ୍ୟାସ ଯଥା ଖାଦ୍ୟପେୟ ଉପରେ ବିଶେଷ ଧ୍ୟାନ ଦେବାର ଆବଶ୍ୟକ । ଏହି ରିପୋର୍ଟରେ ଏହା ମଧ୍ୟ କୁହାଯାଇଛି କି ବିଶ୍ବର ସମୁଦାୟ ଜନସଂଖ୍ୟାର 4 ପ୍ରତିଶତ ଅର୍ଥାତ୍ 7.8 ବିଲିୟନରୁ 349 ମିଲିୟନ ଲୋକେ ଯଦି କୋରୋନାରେ ଆକ୍ରାନ୍ତ ହୁଅନ୍ତି ତେବେ ସେମାନଙ୍କୁ ଡାକ୍ତରୀ ସହାୟତାର ସବୁଠାରୁ ଅଧିକ ଆବଶ୍ୟକ ହେବ । କେତେକଙ୍କ ଶରୀରରେ ଏହା ସହିତ ଆପେ ଲଢିପାରୁଥିବା ବେଳେ କେତେକ ଏହାର ସାମାନ୍ୟତମ ପ୍ରଭାବକୁ ବି ବରଦାସ୍ତ କରିପାରିବେ ନାହିଁ ।