ବେଜିଂ: ଚାଇନାରେ ୟୁହାନ କୋରୋନାଭାଇରସ ଏବେ ପୂର୍ବାପେକ୍ଷା ଅତ୍ୟଧିକ ମାରାତ୍ମକ ହେବାରେ ଲାଗାଲାଣି । ମଙ୍ଗଳବାର ସୁଦ୍ଧା ଏହି ଭାଇରସରେ ଆକ୍ରାନ୍ତିତ ହୋଇ 9ଜଣଙ୍କ ମୃତ୍ୟୁ ହୋଇଥିବା ବେଳେ ଏବେ ଏହି ସଂଖ୍ୟା ବଢିବାରେ ଲାଗିଛି । ଏବେ ବୁଧବାର ରିପୋର୍ଟ ଅନୁଯାୟୀ ଏହି ରୋଗରେ ମୃତ୍ୟୁ ସଂଖ୍ୟା 17ରେ ପହଞ୍ଚିଛି । ଏହାସହ ଏଥିରେ ବର୍ତ୍ତମାନ ସୁଧା ପାଖାପଖି 547 ଜଣ ଆକ୍ରାନ୍ତ ରହିଛନ୍ତି ।
ଏହି ଭୟାନକ ଭାଇରସକୁ ନେଇ ଏବେ ଭାରତରେ ହାଇଆଲର୍ଟ ଜାରି କରାଯାଇଛି। ବିମାନ ବନ୍ଦରରେ ଚୀନରୁ ଆସୁଥିବା ପ୍ରତ୍ୟେକ ନାଗରିକଙ୍କୁ ତନ୍ନତନ୍ନ କରି ଯାଞ୍ଚ କରିବା ପାଇଁ ନିର୍ଦ୍ଦେଶ ଦିଆଯାଇଛି। ବର୍ତ୍ତମାନ ଏହି କୋରୋନା ଭାଇରସର ନମୁନା ଆମେରିକାରେ ମଧ୍ୟ ଚିହ୍ନଟ କରାଯାଇଛି।
ଏହି ଭାଇରସର ଆକ୍ରମଣରୁ ବର୍ତ୍ତିବା ପାଇଁ ଭାରତୀୟ ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ ଦେଶର ସବୁଠାରୁ ବଡ ଓ ବ୍ୟସ୍ତ ବହୁଳ ବିମାନ ବନ୍ଦରରେ ସ୍କ୍ରିନିଂର ବ୍ୟବସ୍ଥା କରାଯାଇଛି। ଦିଲ୍ଲୀ, ମୁମ୍ବାଇ, କୋଲକାତା, ଚେନ୍ନାଇ, ବେଙ୍ଗାଲୁରୁ, ହାଇଦ୍ରାବାଦ ଓ କୋଚିନ ଏୟାରପୋର୍ଟରେ ଚୀନରୁ ଆସୁଥିବା ଯାତ୍ରୀଙ୍କ ଥର୍ମାଲ ସ୍କ୍ରିନିଂ କରାଯାଉଛି। ଏହି ରହସ୍ୟମୟୀ ଭାଇରସକୁ ଭାରତରେ ବ୍ୟାପିବାରୁ ରୋକିବା ପାଇଁ ହାଇଆଲର୍ଟ ଜାରି କରାଯାଇଛି।
ଚୀନ ବ୍ୟତିରେକ ହଂକଂରୁ ଭାରତ ଆସୁଥିବା ଯାତ୍ରୀଙ୍କ ମଧ୍ୟ ଥର୍ମାଲ ସ୍କ୍ରିନିଂ କରାଯିବା ପାଇଁ ନିର୍ଦ୍ଦେଶ ରହିଛି। ଏହାସହ ସ୍ବାସ୍ଥ୍ୟ ମନ୍ତ୍ରଣାଳୟ ଓ ନ୍ୟାସନାଲ ସେଣ୍ଟର ଫ ଡିଜିଜ କଣ୍ଟ୍ରୋଲ ପକ୍ଷରୁ ମଧ୍ୟ କରୋନା ଭାଇରସ ନେଇ ସତର୍କତା ଜାରି କରାଯାଇଛି।
ଆତଙ୍କ ସୃଷ୍ଟି କରିଥିବା ଏହି ବିଚିତ୍ର ଭାଇରସ କେବଳ ଚୀନ ନୁହେଁ ଜାପାନ, ଥାଇଲାଣ୍ଡ ଓ ଦକ୍ଷିଣ କୋରିଆକୁ ମଧ୍ୟ ଗ୍ରାସ କରିବାରେ ଲାଗିଲାଣି। ଅନ୍ୟପଟେ ଆମେରିକାରେ ମଧ୍ୟ ଏହି ମାମଲାରେ ପ୍ରଥମ କେସ୍ ସାମ୍ନାକୁ ଆସିସାରିଛି
କୋରେନା ଭାଇରସ କଣ...
ଏହି କୋରୋନା ଭାଇରସ ଦ୍ରୁତ ଗତିରେ ବ୍ୟାପିବା ପରେ ଏହାକୁ ନେଇ ଅନେକ ବିଭ୍ରାନ୍ତିକର ଖବର ସାମ୍ନାକୁ ଆସୁଛି । କୋରୋନା ଭାଇରସ ସମ୍ପର୍କରେ ଅଧିକ ସୂଚନା ବିଶ୍ବ ସ୍ବାସ୍ଥ୍ୟ ସଙ୍ଗଠନ (ଡବ୍ଲ୍ୟୁଏଚ୍ଓ) ପକ୍ଷରୁ ଜାରି କରାଯାଇଛି। ୟୁହାନ ସିଫୁଡ ମାର୍କେଟରୁ ଏହି ଭୂତାଣୁ ଆସିଥିବା କୁହାଯାଇଛି । କୋରୋନା ଭାଇରସ ଲୋକ ଜଲଦି ରୋଗଗ୍ରସ୍ତ ହେବାର କାରଣ ଏହାର ବୀଜାଣୁ ସମୂହ ଶରୀରକୁ ସିଧା ଟାର୍ଗେଟ କରିଥାଏ। ଏହି ଭାଇରସ ଓଟ, ବିଲେଇ, ବାଦୁଡିଙ୍କ ଭଳି ଅନେକ ପଶୁଙ୍କ ଶରୀରରେ ପ୍ରବେଶ କରି ବ୍ୟାପିବାରେ ଲାଗୁଛି। ଏହାସହ ଏହି ଭାଇରସ ଦୁଇ ଅତି ନିକଟତର ସମ୍ପର୍କରେ ରହୁଥିବା ବ୍ୟକ୍ତିଙ୍କୁ ଅତି ସହଜରେ ବ୍ୟାପିଥାଏ ବୋଲି ମଧ୍ୟ ସୂଚନା ଦିଆଯାଇଛି।