କଲମ୍ବୋ: କୋରୋନା ଚିକିତ୍ସାରେ ଶ୍ରୀଲଙ୍କାରେ ମିଳିଛି ସଫଳତା । ଦେଶରେ ଗତ 3 ଦିନ ହେବ କୌଣସି ନୂଆ ମାମଲା ସାମ୍ନାକୁ ଆସିନଥିବା ବେଳେ ସ୍ଥିତିରେ ସୁଧାର ଆସୁଥିବା ପରିଲକ୍ଷିତ ହୋଇଛି । ସୋମବାର ଦେଶରେ ସୁସ୍ଥଙ୍କ ସଂଖ୍ୟା 1500 ପାର କରିଥିବା ପ୍ରକାଶ ପାଇଥିବା ବେଳେ ମଙ୍ଗଳବାରର ଏହି ସୂଚନା ଶ୍ରୀଲଙ୍କାରେ କୋରୋନାର ସଫଳ ଲଢେଇ ସୂଚିତ କରେ ।
ଦେଶରେ ବର୍ତ୍ତମାନ କୋରୋନା ଆକ୍ରାନ୍ତ ସଂଖ୍ୟା 1951ରେ ସ୍ଥିର ରହିଛି । ସେପଟେ ମୃତ୍ୟୁ ସଂଖ୍ୟା ମାତ୍ର 11 ରହିଛି । ତେବେ ବିଦେଶରୁ ଶ୍ରୀଲଙ୍କାକୁ ଫେରିଥିବା 691 ପ୍ରବାସୀ ପଜିଟିଭି ଚିହ୍ନଟ ହୋଇଥିଲେ । ଏନେଇ ମହାମାରୀ ବିଶେଷଜ୍ଞ ସୂଚନା ଦେଇଛନ୍ତି କି ଦେଶରେ ଚିହ୍ନଟ ମୋଟ ଆକ୍ରାନ୍ତଙ୍କ ମଧ୍ୟରେ 938 ଜଣ ନେଭିର ଜବାନ ରହିଛନ୍ତି । ସେମାନଙ୍କ ସଂସ୍ପର୍ଶରେ ଆସି 313 ଜଣ ଆକ୍ରାନ୍ତ ହୋଇଥିଲେ । ଏଥିସହ 5ଜଣ ବିଦେଶୀ ନାଗରିକଙ୍କ ସମେତ 413 ଜଣ ଆକ୍ରାନ୍ତଙ୍କ ଚିକିତ୍ସା ବର୍ତ୍ତମାନ ଜାରି ରହିଛି ।