ପାଣାଜୀ/ନୂଆଦିଲ୍ଲୀ: ଇଷ୍ଟର ସନ୍ଡେ ଅବସରରେ ରକ୍ତରଞ୍ଜିତ ହୋଇଯାଇଛି ଶ୍ରୀଲଙ୍କାର ବାଣିଜ୍ୟକ ସହର ତଥା ରାଜଧାନୀ କଲମ୍ବୋ । ସହରରେ ଅବସ୍ଥିତ ଥିବା ଚର୍ଚ୍ଚ ଏବଂ ବିଳାସମୟ ହୋଟଲରେ ହୋଇଥିବା 8ଟି ବିସ୍ଫୋରଣରେ 200ରୁ ଊର୍ଦ୍ଧ୍ୱ ଲୋକଙ୍କ ମୃତ୍ୟୁ ଘଟିଛି । ଅନୁରୂପ ଭାବେ ଗତ ମାର୍ଚ୍ଚ ମାସର ଶେଷ ସପ୍ତାହରେ ନ୍ୟୁଜିଲାଣ୍ଡର ଖ୍ରୀଷ୍ଟଚର୍ଚ୍ଚ ସହରର ମସଜିଦରେ ହୋଇଥିବା ଗୁଳିକାଣ୍ଡରେ ପ୍ରାୟ 40ରୁ ଅଧିକ ଲୋକଙ୍କ ମୃତ୍ୟୁ ଘଟିଥିଲା।
ଯେଉଁ ଘଟଣାକୁ ନେଇ ବର୍ତ୍ତମାନ ସମଗ୍ର ବିଶ୍ବରେ ଖେଳିଯାଇଛି ଚାଞ୍ଚଲ୍ୟ । ଏହାର ପ୍ରଭାବ ଦେଖିବାକୁ ମିଳିଛି ଭାରତରେ । ସାମ୍ଭାବ୍ୟ ଆକ୍ରମଣ କିମ୍ବା ବୋମା ବିସ୍ଫୋରଣ ଆଶଙ୍କାରେ ଦେଶରେ ବିଭିନ୍ନ ସ୍ଥାନରେ ଥିବା ଚର୍ଚ୍ଚରେ ସୁରକ୍ଷା ବ୍ୟବସ୍ଥାକୁ ବଢାଇ ଦିଆଯାଇଛି । ଯାହା ମଧ୍ୟରେ ରହିଛି ଦିଲ୍ଲୀ ଏବଂ ଗୋଆରେ ଥିବା ଚର୍ଚ୍ଚ।
ଗୋଆର ବିଭିନ୍ନ ସ୍ଥାନରେ ଥିବା ଚର୍ଚ୍ଚରେ ସୁରକ୍ଷା ବ୍ୟବସ୍ଥାକୁ କଡାକଡି କରାଯାଇଛି । ଏ ସମ୍ପର୍କରେ ପ୍ରତିକ୍ରିୟା ରଖି ଗୋଆ ମୁଖ୍ୟମନ୍ତ୍ରୀ ପ୍ରମୋଦ ସାୱନ୍ତ କହିଛନ୍ତି, " ଘଟଣା ସମ୍ପର୍କରେ ରାଜ୍ୟର ବରିଷ୍ଠ ପୋଲିସ ଅଧିକାରୀଙ୍କୁ ଅବଗତ କରାଯାଇଛି । ଏଥିସହିତ ରାଜ୍ୟର ବିଭିନ୍ନ ସ୍ଥାନରେ ଥିବା ଚର୍ଚ୍ଚରେ ସୁରକ୍ଷା ଉପରେ ଗୁରୁତ୍ବ ଦିଆଯାଇଛି । " 2011 ଜନଗଣନା ଅନୁସାରେ ଗୋଆର ମୋଟ ଜନସଂଖ୍ୟାର 25 ପ୍ରତିଶତ ଖ୍ରୀଷ୍ଟ ଧର୍ମାବଲମ୍ବୀ।
ଅନ୍ୟପଟେ ଶ୍ରୀଲଙ୍କା ଘଟଣାକୁ ନେଇ ସୁରକ୍ଷା ଏଜେନ୍ସି ପକ୍ଷରୁ ଦିଲ୍ଲୀରେ ଅନେକ ସତର୍କତା ମୂଳକ ପଦକ୍ଷେପ ନିଆଯାଇଛି । ଏହି ମର୍ମରେ ବିଭିନ୍ନ ଧାର୍ମିକସ୍ଥଳ ଏବଂ ସମ୍ବେଦନଶୀଳ ସ୍ଥାନ ଆଦି ଉପରେ ଦୃଢ ନଜର ରଖାଯାଇଛି । ଦିଲ୍ଲୀରେ ସର୍ବମୋଟ 245ଟି ଚର୍ଚ୍ଚ ରହିଛି । ଗତକାଲି ଭାରତ ସମେତ ବିଶ୍ୱର ଅନ୍ୟରାଷ୍ଟ୍ରରେ ମଧ୍ୟ ଇଷ୍ଟର ସନ୍ଡେ ପାଳିତ ହୋଇଯାଇଛି ।
