ରିୟାଦ: ବିଦେଶରେ ବସବାସ କରୁଥିବା ସାଉଦି ଆରବ ନାଗରିକଙ୍କ ସମ୍ପତ୍ତ ଜବତ ପ୍ରସଙ୍ଗରେ ପ୍ରତିକ୍ରିୟା ପ୍ରକାଶ କରିଛନ୍ତି କେନ୍ଦ୍ର ସରକାର । ଏହା ସମ୍ପୂର୍ଣ୍ଣ ମିଥ୍ୟା ଖବର ବୋଲି ମଙ୍ଗଳବାର ସରକାର ସ୍ପଷ୍ଟ କରିଛନ୍ତି । ତେବେ ବିଦେଶରେ ରହୁଥିବା ନାଗରିକ ଯେଉଁମାନେ ନିଜ ରୋଜଗାରଠାରୁ ଅଧିକ ସମ୍ପତ୍ତି ରହିଛି ସେମାନଙ୍କ ସମ୍ପତ୍ତି ଜବତ କରିବା ନେଇ କିଛି ଦିନ ତଳେ ଖବର ପ୍ରଚାର ହୋଇଥିଲା ।
ଏହି ପ୍ରସଙ୍ଗରେ ସାଉଦି ଆରବିଆ ମନିଟାରୀ ଅଥରିଟି(ସାମା) ଏକ ଟ୍ବିଟ କରି ସ୍ପଷ୍ଟ କରିଥିଲା କି ଗଣମାଧ୍ୟମରେ ପ୍ରଚାର ହେଉଥିବା ଖବର ସମ୍ପୂର୍ଣ୍ଣ ମିଥ୍ୟା । ଏହା କେବଳ ଏକ ଗୁଜବ । ଏହି ଖବର ଅନୁଯାୟୀ ଦେଶରେ ପରିଚାଳିତ ବ୍ୟାଙ୍କଗୁଡିକ ବିଦେଶରେ ଥିବା ନାଗରିକଙ୍କ ଆକାଉଣ୍ଟ ଫ୍ରିଜ କରିବା ନେଇ ପ୍ରକାଶ ପାଇଥିଲା । ଏହା ମିଥ୍ୟା ଏବଂ ଅପପ୍ରଚାରର ଏକ ହୀନ ମାନସିକତା ବୋଲି ସାମା ପ୍ରକାଶ କରିଛି ।
ବ୍ୟାଙ୍କଗୁଡିକ ସପକ୍ଷରେ ସାମା ଏହା ମଧ୍ୟ କହିଥିଲା କି ବ୍ୟାଙ୍କଗୁଡିକ ନିଜ ନିର୍ଦ୍ଧାରିତ ନୀତି ନିୟମ ମଧ୍ୟରେ ପରିଚାଳିତ ହେଉଛନ୍ତି । ଗ୍ରାହକଙ୍କ ସୁବିଧା ପାଇଁ ଏହା ଆବଶ୍ୟକୀୟ ସମସ୍ତ ପଦକ୍ଷେପ ଗ୍ରହଣ କରୁଛି । ଆଗକୁ ମଧ୍ୟ ନିଜର ଏହି ସେବା ଜାରି ରଖିବ । ତେବେ ସୂଚନା ମୁତାବକ ସାଉଦି ଆରବରେ 34.8 ମିଲିୟନ ଲୋକେ ରହୁଥିବା ବେଳେ ସେମାନଙ୍କ ମଧ୍ୟରେ 10.5 ମିଲିୟନ ନାଗରିକ ବିଦେଶରେ ବସବାସ କରୁଛନ୍ତି । କୋରୋନା ସ୍ଥିତି ପରେ ଦେଶରେ ଆର୍ଥିକ ସ୍ଥିତିକୁ ପୁଣି ମଜଭୂତ କରିବା ପାଇଁ ନିକଟରେ ବ୍ୟାଙ୍କ କର୍ତ୍ତୃପକ୍ଷ କିଛି ନୂଆ ପଦକ୍ଷେପ ଗ୍ରହଣ କରିଥିଲେ ।
ଏନେଇ ଜୁଲାଇ 1ରୁ ଦେଶରେ ଭାଟ ମୂଲ୍ୟରେ ବୃଦ୍ଧି କରାଯିବା ସହ ଟ୍ୟାକ୍ସକୁ ତିନିଗୁଣଆ ବଢାଇ 15 ପ୍ରତିଶତ କରାଯାଇଛି । ଏଥିସହ ନୂଆ ନିୟମ ଅନୁଯାୟୀ ସରକାରୀ କର୍ମଚାରୀଙ୍କୁ ଦିଆଯାଉଥିବା ଜୀବିକା ଭତ୍ତା ମଧ୍ୟ ଚଳିତ ବର୍ଷ ସ୍ଥଗିତ ରଖାଯାଇଥିବା ଜଣା ପଡିଛି ।
@IANS
