ମସ୍କୋ: କୋଭିଡ ଭ୍ୟାକ୍ସିନ ପ୍ରସ୍ତୁତି ନେଇ ମଙ୍ଗଳବାର ଏକ ଆଶ୍ଚର୍ଯ୍ୟକର ଘୋଷଣା କରିଛି ଋଷିଆ ସେନା । ଘୋଷଣା ମୁତାବକ ସେନା କୋରୋନା ମୁକାବିଲା ପାଇଁ ଏକ ଭ୍ୟାକ୍ସିନ ବିକଶିତ କରିଛି । ଯାହା ପ୍ରଥମ ପର୍ଯ୍ୟାୟ ଟ୍ରାଏଲରେ ପାସ କରିଥିବା ବେଳେ ଆଗକୁ ଦ୍ବିତୀୟ ଓ ତୃତୀୟ ପର୍ଯ୍ୟାୟ ଟ୍ରାଏଲ ଆରମ୍ଭ ହେବ । ଏନେଇ ମସ୍କୋ ଟାଇମ୍ସ ଦ୍ବାରା ସୂଚନା ମିଳିଛି । ଏହା ପୂର୍ବରୁ ଗତ ସପ୍ତାହ ଋଷିଆନ ପ୍ରତିରକ୍ଷା ମନ୍ତ୍ରୀ ଦାବି କରିଥିଲେ କି ସେମାନେ ଏକ ସୁରକ୍ଷିତ ଆଡେନୋଭାଇରାଲ ଭେକ୍ଟର ଅଧିକୃତ କୋରୋନା ଭ୍ୟାକ୍ସିନ ବିକଶିତ କରିଛନ୍ତି ।
ଏହାର କ୍ଲିନିକାଲ ଟ୍ରାଏଲ ପାଇଁ ଏକ ଭଲ୍ୟୁଣ୍ଟିଅର ଦଳ ପ୍ରସ୍ତୁତ ରହିଛନ୍ତି । ସେପଟେ ଏନେଇ ପ୍ରଥମ ଡେପୁଟି ପ୍ରତିରକ୍ଷା ମନ୍ତ୍ରୀ ରୁସଲାନ ସାଲିକୋଭଙ୍କ କହିବା ଅନୁଯାୟୀ ମିଲିଟାରୀ ବିଶେଷଜ୍ଞ ଓ ବୈଜ୍ଞାନିକଙ୍କ ମିଳିତ ସହଯୋଗରେ ଗାମାଲେୟା ରିସର୍ଚ୍ଚ ଇନଷ୍ଟିଚ୍ୟୁଟ ଅଫ ଏପିଡେମିଓଲୋଜି ଓ ମାଇକ୍ରୋବାୟୋଲୋଜିଠାରେ ଏହି ପ୍ରତିଷେଧକକୁ ବିକଶିତ କରାଯାଇଛି ।
ତେବେ ଏହି ପ୍ରତିଷେଧକର ପ୍ରଥମ ପର୍ଯ୍ୟାୟ ଟ୍ରାଏଲରେ ଦେଖାଯାଇଥିଲା କି ଭଲ୍ୟୁଣ୍ଟିୟରମାନେ ବିନା କୌଣସି ଅସୁବିଧାରେ ଏଥିପ୍ରତି ସକାରାତ୍ମକ ପ୍ରତିକ୍ରିୟା ଦେଖାଇଥିଲେ । ଏଥିସହ ସେମାନଙ୍କ ଶରୀରରେ ରୋଗ ପ୍ରତିରୋଧକ ଶକ୍ତି ବୃଦ୍ଧି ହୋଇଥିବା ମଧ୍ୟ ଦେଖାଯାଇଥିଲା । ଏହାକୁ ଦୃଷ୍ଟିରେ ରଖି କୋରୋନା ଭୂତଣୁ ବିରୋଧରେ ପ୍ରଥମ ଘରୋଇ ଭ୍ୟାକ୍ସିନ ପ୍ରସ୍ତୁତ ଥିବା ନେଇ ଘୋଷଣା କରାଯାଇଥିଲା । ହେଲେ ପ୍ରତିରକ୍ଷା ବିଭାଗର ଏହି ଦାବିକୁ ଋଷିଆନ ସ୍ବାସ୍ଥ୍ୟ ବିଭାଗ ମାନିବାକୁ ନାମଞ୍ଜୁର ଥିବା ଦେଖାଯାଇଛି ।
ସ୍ବାସ୍ଥ୍ୟ ବିଭାଗର କହିବା ଅନୁଯାୟୀ ବର୍ତ୍ତମାନ ସୁଦ୍ଧା ଏହି ଭ୍ୟାକ୍ସିନର ସମସ୍ତ ଟ୍ରାଏଲ ଶେଷ ହୋଇନାହିଁ । ତେଣୁ ଏତେ ପୂର୍ବରୁ ଭ୍ୟାକ୍ସିନ ପ୍ରସ୍ତୁତି ନେଇ ଘୋଷଣା କରିବା ଭୁଲ । ସେପଟେ ଏହି ଭ୍ୟାକ୍ସିନର ଦ୍ବିତୀୟ ପର୍ଯ୍ୟାୟ ଟ୍ରାଏଲ ଶେଷ ହେବା ପରେ ଏହାର ଷ୍ଟେଟ ରେଜିଷ୍ଟ୍ରେସନ ପ୍ରକ୍ରିୟା କରାଇବା ପାଇଁ ବିଭାଗ ସୂଚନା ଦେଇଛି । ତେବେ ଏହି ପ୍ରତିଷେଧକ ଟ୍ରାଏଲ ସଫଳ ହେଲେ ଏହାର 200 ମିଲିୟନ ଡୋନ ପ୍ରସ୍ତୁତ କରିବା ପାଇଁ ପ୍ରତିରକ୍ଷା ବିଭାଗ ସୂଚନା ଦେଇଛି ।
@IANS
